चाडवाडको नाममा जुवा खाल सञ्चालन नगर्न चेतावनी

समाचार

गृहपृष्ठ
समाचार
चाडवाडको नाममा जुवा खाल सञ्चालन नगर्न चेतावनी

चाडवाडको नाममा जुवा खाल सञ्चालन नगर्न चेतावनी

शुक्रबार, कात्तिक ८, २०७६ बागेश्वरी पोस्ट

प्रहरी उपरीक्षक दीप शमशेर जबरा

कपिलवस्तु । चाडवाडको नाममा जुवा खाल सञ्चालन गर्न नपाइने प्रहरी उपरीक्षक दीप शमशेर जबराले बताउनुभएको छ । लाखौँ रुपैया हारजित हुने ढंगबाट जुवा खाल सञ्चालन गर्नु पूर्ण रुपमा गैरकानुनी रहेको भन्दै त्यस प्रकारका क्रियाकलाप गर्ने जो कोहीलाई छुट नदिइने एस्पी जबराले बताउनुभयो ।

यस प्रकारका जुवा खाल सञ्चालन गर्ने र खेल्नेहरु उपर प्रहरीले तीव्र निगरानी बढाएको घटना र विचारसँग कुरा गर्दै प्रहरी उपरीक्षक जबराले भन्नु भयो, “चाडबाडका बेला घर परिवार इष्टमित्र, साथीभाइ बसेर सामान्य ढंगले तास खेल्दा खासै फरक पर्दैन तर लाखौँ रुपैयाँ हारजित हुने गरी जुवा खाल सञ्चालन गर्न पाइँदैन ।”

एकैक्षणमा लाखौं रुपैया हार्ने र जित्ने खेलले समाजमा अपराध बढाउने उहाँको तर्क छ । यसले एकातिर समाजमा अपराध बढ्न सक्छ, अर्कोतर्फ घरपरिवार आर्थिक संकटमा पर्छ । त्यसकारण पनि जूवालाई कानुनी रुपमै बन्देज लगाइएको उहाँले स्मरण गराउनुभयो ।

जिल्लाका कुनै पनि स्थानमा यस्ता जुवा खाल सञ्चालन भएको खबर पाउनासाथ प्रहरी एक्सनमा उत्रने उल्लेख गर्दै उहाँले यसरी अवैध ढंगबाट जुवातास भएको बारे सोझै आफ्नो मोबाईल नम्बर ९८५७०८५५५५ मा कल गरी सूचना दिन पनि सर्वसाधारणलाई आग्रह गर्नु भएको छ । चाडवाड भन्दैमा अवैध धन्धा सञ्चालन गर्न कसैलाई छुट नरहेको चेतावनी एस्पी जबराले दिनुभयो ।

केही दिनअघि मात्रै कपिलवस्तु नगरपालिका वडा नं. २ को वरगदवा गाउँमा सञ्चालित जुवा खालमा प्रहरीले छापा मारी ३ लाख ४५ हजार नगदसहित १४ जना जुवाडे पक्राउ गरेको थियो । जुवाडेहरु उपर मुद्धा दर्ता गरी ४ दिन थुनामा रही उनीहरु धरौटीमा छुटेका छन् । १४ जुवाडेमध्ये एक जना १ लाख ५९ हजार ५ सय र बाँकी १३ जुवाडे जनही २७ हजार रुपैयाँ धरौटीमा रिहा भएका हुन् ।

प्रकाशित मिति: शुक्रबार, कात्तिक ८, २०७६ १५:०७