पत्रकारमाझ बाँकेका सिडिओ तामाङ: तपाईंहरुको साथ-सहयोगसंगै आलोचनाको पनि अपेक्षा छ

सुरक्षा-अपराध

गृहपृष्ठ
सुरक्षा-अपराध
पत्रकारमाझ बाँकेका सिडिओ तामाङ: तपाईंहरुको साथ-सहयोगसंगै आलोचनाको पनि अपेक्षा छ

पत्रकारमाझ बाँकेका सिडिओ तामाङ: तपाईंहरुको साथ-सहयोगसंगै आलोचनाको पनि अपेक्षा छ

मंगलबार, कात्तिक १८, २०८२ बागेश्वरी पोस्ट

नेपालगन्ज । जिल्ला प्रशासन कार्यालय बाँकेमा सरुवा भएर आएका प्रमुख जिल्ला अधिकारी (सिडिओ) दिल कुमार तामाङले सोमबारदेखि कार्यभार सम्हालेका छन् । कार्यभार सम्हालेको भोलिपल्ट मंगलबार पत्रकारहरुसंग 'परिचयात्मक कार्यक्रम' गरेका तामाङले आफ्नो भूमिका निभाउन इमान्दार प्रयास गर्ने बताए ।

उनले जेनजी आन्दोलनपछि भएको आगजनी र क्षतिका कारण रोकिएको राहदानी सेवा विहीबारदेखि सुचारु गर्ने तयारीमा रहेको बताए । तामाङले नागरिकता र राष्ट्रिय परिचयपत्रको काम आंशिक रुपमा भइरहे पनि पूर्णरुपमा सुचारु हुन नसकेको जानकारी दिँदै कार्यालय मर्मत-सम्भार/पुन:निर्माण गर्दै बिस्तारै लयमा लैजाने कोसिसमा लाग्ने उल्लेख गरे ।

तामाङले शान्ति सुव्यवस्था, अपराध नियन्त्रण लगायत अन्य कुराहरुको समन्वय र सहजीकरण गर्ने कार्यमा सरोकारवाला सबैसँग समन्वय र सहकार्य गरेर कार्य सम्पादन गर्ने इमान्दार प्रयास गर्ने बताए । त्यसका लागि मिडियाको साथ सहयोग लिएर अघि बढ्ने उल्लेख गरेका प्रमुख जिल्ला अधिकारी तामाङले खबरदारी पनि आफूले अपेक्षा गर्ने बताए । "सार्वजनिक पदमा बसेका अधिकारीलाई नागरिक, सरोकारवालाले खबरदारी गर्नुपर्दछ । तपाईंहरुको खबरदारी र आलोचनाको अपेक्षा गर्दछु," उनले प्रष्ट्याए-"खाली तपाईंहरुसंग मेरो निवेदन छ कि व्यक्तिगतरुपमा लान्छित गर्ने प्रवृत्तिका कतिपय कुराहरु एकचोटी मेरो तहमा मसंग जोडिएको विषयमा भेरिफाई गरिदिनुहोला ।" उनले जिल्लाको संवेदनशिलतालाई पनि ख्याल गरेर मिडिया कर्म गरी सहयोग गर्न पत्रकारहरुलाई आग्रह पनि गरे । जिल्लामा आपसी सद्भाव, सहिष्णुता कायम गर्ने कुरामा पनि उनले मिडियाको भूमिकाको अपेक्षा गरेको बताए ।

तामाङ कपिलवस्तुबाट बाँके सरुवा भएका हुन् । पाँचथरका तामाङले प्रमुख जिल्ला अधिकारीको रुपमा बाँके आफ्नो छैटौं जिल्ला भएको बताए । कार्यक्रममा पत्रकारहरुले जिल्लाको विशिष्टता र संवेदनशिलता बुझेर काम गर्न सुझाव दिए । सिडिओसंग छिटो-छरितो सूचना प्रवाहको वातावरण र मिडियामैत्री ब्यवहारको अपेक्षा राखेको पत्रकारहरुले बताए । कार्यक्रममा सहायक प्रमुख जिल्ला अधिकारी पुर्ण खत्री, नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई, बाँके शाखा अध्यक्ष नवीन गिरी लगायत पत्रकारहरुको उपस्थिति थियो ।

प्रकाशित मिति: मंगलबार, कात्तिक १८, २०८२ १६:३१

प्रतिक्रिया दिनुहोस्