सृजना बुढा मगर 'जलन' मृत्यु प्रकरणः फरार थप दुई अभियुक्त पक्राउ

सुरक्षा-अपराध

गृहपृष्ठ
सुरक्षा-अपराध
सृजना बुढा मगर 'जलन' मृत्यु प्रकरणः फरार थप दुई अभियुक्त पक्राउ

सृजना बुढा मगर 'जलन' मृत्यु प्रकरणः फरार थप दुई अभियुक्त पक्राउ

मंगलबार, वैशाख १, २०८३ बागेश्वरी पोस्ट

नेपालगञ्ज । नेपालगञ्ज उपमहानगरपालिका–१२ कोरियनपुरमा भएको सृजना बुढा मगरको मृत्यु प्रकरणमा बाँके प्रहरीले थप दुई जना अभियुक्तलाई पक्राउ गरेको छ । जिल्ला प्रहरी कार्यालय बाँकेका निमित्त सूचना अधिकारी प्रहरी निरीक्षक रमेश विष्टद्वारा जारी प्रेस विज्ञप्तीमा उल्लेख भए अनुसार पक्राउ पर्नेमा फरार रहेका ५० वर्षीय रहमद ढपाली र २१ वर्षीय मो. आदिल ढपाली रहेका छन् । उनीहरू मृतकका प्रेमी आरिफ ढपालीका बुवा र भाइ हुन् ।

बाँके प्रहरीका एक अधिकृतका अनुसार घटनापछि फरार रहेका दुवै जनालाई बाँके प्रहरी प्रमुख एसपी अंगुर जिसीको अनुरोधमा भारतको नयाँ दिल्लीबाट भारतीय प्रहरीको सहयोगमा पक्राउ गरी नेपाल ल्याइएको हो । सोमबार राति उनीहरूलाई बाँके ल्याइएको हो । उनीहरू घटनापछि नयाँ दिल्ली भागेर गएको पाइएको छ ।

यसअघि नै प्रहरीले अनुसन्धानका क्रममा संलग्नताको आशंकामा मृतक सृजनाको प्रेमी आरिफ ढपाली, उनकी आमा र दिदीसहित तीन जनालाई नियन्त्रणमा लिइसकेको छ । अब पक्राउ परेका दुई जनासहित घटनामा संलग्न पाँच जनामाथि अनुसन्धान भइरहेको जिल्ला प्रहरी कार्यालय बाँकेले जनाएको छ ।

चैत १४ गते राति करिब ११.३५ बजे नेपालगन्ज–१२ कोरियनपुरस्थित सडकमा २२ वर्षीया सृजना बुढा मगर जलेको अवस्थामा मृत फेला परेकी थिइन् । प्रहरीले घटनाको विभिन्न कोणबाट अनुसन्धान तीव्र पारेको जनाएको छ ।

प्रारम्भिक जानकारी अनुसार मृतक सृजना श्रीमानसँगको सम्बन्ध विच्छेदपछि विगत दुई वर्षदेखि आरिफ ढपालीसँग लिभिङ टुगेदरमा बस्दै आएकी थिइन् । प्रहरीले घटनाको वास्तविक कारण पत्ता लगाउन थप अनुसन्धान जारी रहेको जनाएको छ ।

May be an image of text