भन्सार कडाईले वैध व्यापार प्रवर्द्धन र स्वदेशी बजार संरक्षणमा टेवा

बिचार

गृहपृष्ठ
बिचार
भन्सार कडाईले वैध व्यापार प्रवर्द्धन र स्वदेशी बजार संरक्षणमा टेवा

भन्सार कडाईले वैध व्यापार प्रवर्द्धन र स्वदेशी बजार संरक्षणमा टेवा

मंगलबार, वैशाख ८, २०८३ बागेश्वरी पोस्ट

मख्खन धामी

नेपाल सरकारले मित्रराष्ट्रबाट रु. १०० भन्दा बढी मूल्यका सामान खरिद गर्दा अनिवार्य भन्सार प्रक्रिया लागू गर्ने निर्णय गरेकोमा हामी हार्दिक स्वागत तथा उच्च सम्मान व्यक्त गर्दछौँ । यो कदम सीमापार व्यापारलाई निरुत्साहित गर्ने नभई वैध, पारदर्शी र व्यवस्थित व्यापार प्रणालीलाई संस्थागत गर्ने दूरदर्शी निर्णय हो । यसले स्वदेशी बजार संरक्षण, राजस्व अभिवृद्धि तथा अनुशासित व्यापार संस्कृतिको विकासमा महत्वपूर्ण योगदान पुर्‍याउने विश्वास लिएका छौँ ।

नेपालगञ्ज उद्योग वाणिज्य संघ सधैं विधि, नीति र कानुनको पक्षमा दृढतापूर्वक उभिँदै आएको जिम्मेवार संस्था हो । राज्यद्वारा लागू गरिएका सकारात्मक नीतिहरूको सफल कार्यान्वयनका लागि निजी क्षेत्रको सहकार्य, जिम्मेवारीबोध र सक्रिय सहभागिता अपरिहार्य छ भन्ने हाम्रो स्पष्ट धारणा रहेको छ । राष्ट्र निर्माण सरकार मात्रको दायित्व होइन, यो नागरिक, व्यवसायी र राज्यबीचको साझा जिम्मेवारी हो ।

सीमा सुरक्षा, भन्सार अनुशासन तथा राजस्व संरक्षणका लागि खटिएको सशस्त्र प्रहरी बल नेपाल अन्तर्गत नम्बर ३० गणको सक्रियता प्रशंसनीय छ ।विशेषगरी सशस्त्र प्रहरी उपरीक्षक भीम चन्दको नेतृत्वमा देखिएको कडाई, पारदर्शिता र निष्पक्षता राष्ट्रसेवाको उत्कृष्ट उदाहरण बनेको छ । यस्ता कर्तव्यनिष्ठ राष्ट्रसेवकहरूप्रति हार्दिक सम्मान तथा धन्यवाद व्यक्त गर्दछौँ ।

No photo description available.

सीमावर्ती क्षेत्रका सम्पूर्ण व्यवसायीहरूलाई उपभोक्तामैत्री सेवा, गुणस्तरीय सामग्री र उचित मूल्यमा वस्तु उपलब्ध गराई स्थानीय बजारलाई अझ विश्वासिलो र प्रतिस्पर्धी बनाउन अनुरोध गर्दछौँ । जब स्थानीय बजारमा विश्वास र गुणस्तर कायम हुन्छ, तब उपभोक्ताको आकर्षण स्वतः स्वदेशीतर्फ बढ्छ, जसले रोजगारी वृद्धि र पूँजीको आन्तरिक परिचालनलाई बलियो बनाउँछ ।

राष्ट्रहित, आर्थिक स्वाधीनता र आत्मनिर्भर भविष्यका लागि सबै पक्षले जिम्मेवार भूमिका निर्वाह गर्नुपर्ने समय आएको छ । राष्ट्रप्रेम केवल नारामा सीमित हुँदैन, यो कानुनको पालन, कर तिर्ने संस्कार, अनुशासन र स्वदेशी उत्पादनप्रतिको सम्मानबाट प्रकट हुन्छ ।

साथै, कालोबजारी, कृत्रिम अभाव, अवैध मूल्यवृद्धि, तस्करी तथा सुदखोरी जस्ता गतिविधिमा संलग्न जोसुकैमाथि कडा कारबाही हुनुपर्ने हाम्रो स्पष्ट माग छ । कानुन सबैका लागि समान हुनुपर्छ र वैध व्यापारको संरक्षण बिना समुन्नत अर्थतन्त्र सम्भव छैन ।

वर्तमान महँगीको सन्दर्भमा सरकारले कर तथा राजस्व संरचनाको पुनरावलोकन गरी जनमुखी र व्यावहारिक सहुलियतका उपाय अवलम्बन गर्नु आवश्यक देखिन्छ । नीति कठोर मात्र होइन, सन्तुलित र न्यायपूर्ण पनि हुनुपर्छ ।

आजको आवश्यकता आरोप होइन सहकार्य, विरोध होइन विवेक, स्वार्थ होइन राष्ट्रहित हो । नागरिक, व्यवसायी र सरकार एउटै लक्ष्यमा एकताबद्ध भए मात्र समुन्नत, आत्मनिर्भर र समृद्ध नेपाल निर्माण सम्भव हुनेछ ।

राष्ट्रप्रेमको साँचो रूप यही हो—स्वदेशी उत्पादनलाई प्राथमिकता दिने, आफ्नै बजारलाई बलियो बनाउने र कानुनको सम्मान गर्दै राष्ट्र निर्माणमा योगदान गर्ने । यही भावनासहित सबै पक्षबीच सहकार्य, समन्वय र समृद्धिको वातावरण निर्माण होस् भन्ने हार्दिक शुभेच्छा व्यक्त गर्दछौँ ।

(धामी नेपालगञ्ज उद्योग वाणिज्य संघका कोषाध्यक्ष हुन् ।)

प्रकाशित मिति: मंगलबार, वैशाख ८, २०८३ २०:२०

प्रतिक्रिया दिनुहोस्