टिकटकमा खुकुरी प्रदर्शन गर्ने दुई जना पक्राउ

सुरक्षा-अपराध

गृहपृष्ठ
सुरक्षा-अपराध
टिकटकमा खुकुरी प्रदर्शन गर्ने दुई जना पक्राउ

टिकटकमा खुकुरी प्रदर्शन गर्ने दुई जना पक्राउ

मंगलबार, वैशाख २२, २०८३ बागेश्वरी पोस्ट

नेपालगञ्ज । सामाजिक सञ्जालमार्फत हतियार प्रदर्शन गरी सर्वसाधारणलाई त्रसित बनाउने गतिविधिमा संलग्न रहेको आरोपमा बाँके प्रहरीले दुई जनालाई पक्राउ गरेको छ । जिल्ला प्रहरी कार्यालय बाँकेका अनुसार नेपालगञ्ज उपमहानगरपालिका–४ निवासी ३० वर्षीय अजय कुमाल र डुडुवा गाउँपालिका–४ निवासी २६ वर्षीय अनिल खटिकलाई नियन्त्रणमा लिइएको हो ।

उनीहरूले क्रमशः ‘अजय मगर’ र ‘अनिल सोनकर’ नामका टिकटक आइडी प्रयोग गरी हातमा खुकुरी बोकेको भिडियो सार्वजनिक गर्दै जनमानसमा डरत्रास फैलाउने खालका सामग्री पोस्ट गरेको प्रहरीले जनाएको छ । प्रहरीले दुवै जनामाथि साइबर अपराधसहित अन्य सम्बन्धित कसुरमा अनुसन्धान अगाडि बढाएको जानकारी दिएको छ ।

यसैबीच जिल्ला प्रहरी कार्यालय बाँकेले सामाजिक सञ्जालमा आपराधिक वा त्रास सिर्जना गर्ने सामग्री प्रकाशन नगर्न सर्वसाधारणलाई आग्रह गरेको छ । यस्ता गतिविधिमाथि कडा निगरानी राखिएको र दोषीमाथि कानुनी कारबाही गरिने चेतावनी समेत प्रहरीले दिएको छ ।

प्रकाशित मिति: मंगलबार, वैशाख २२, २०८३ १९:३०

प्रतिक्रिया दिनुहोस्