नेपालगञ्जमा जेठ १५ गते “प्रथम मेयर सांस्कृतिक कप” हुने

संस्कृति-साहित्य

गृहपृष्ठ
संस्कृति-साहित्य
नेपालगञ्जमा जेठ १५ गते “प्रथम मेयर सांस्कृतिक कप” हुने

नेपालगञ्जमा जेठ १५ गते “प्रथम मेयर सांस्कृतिक कप” हुने

बिहीबार, वैशाख २४, २०८३ बागेश्वरी पोस्ट

नेपालगञ्ज । बाँके कला केन्द्र नेपालगञ्जले “प्रथम मेयर सांस्कृतिक कप” आयोजना गर्ने भएको छ । नेपालगञ्ज उपमहानगरपालिकाको आर्थिक सहयोगमा अन्तर माध्यमिक विद्यालय स्तरीय सामूहिक लोक नृत्य प्रतियोगिताका रूपमा आयोजना गरिने कार्यक्रमबारे आयोजकले आज पत्रकार सम्मेलनमार्फत जानकारी दिएको हो ।

आगामी जेठ १५ गते गणतन्त्र दिवसको अवसर पारेर प्रतियोगिता आयोजना गरिने बाँके कला केन्द्रका उपाध्यक्ष एवम् कार्यक्रम संयोजक विरेन्द्र यादवले जानकारी दिए । कार्यक्रममा नेपालगञ्ज उपमहानगरपालिकाभित्रका सामुदायिक तथा संस्थागत माध्यमिक तहका विद्यालयमा कक्षा ६ देखि १२ सम्म अध्ययनरत विद्यार्थीहरूले सहभागिता जनाउन पाउनेछन् । प्रतियोगितामा विभिन्न जातजातिको मौलिक संस्कृति झल्किने सामूहिक लोक नृत्य प्रस्तुत गरिने आयोजकले जनाएको छ । प्रत्येक समूहमा न्यूनतम ६ जना र अधिकतम १२ जना कलाकार सहभागी हुन सक्ने व्यवस्था गरिएको छ ।

सामुदायिक विद्यालयका लागि २ हजार ५ सय तथा संस्थागत विद्यालयका लागि ३ हजार ५ सय रुपैयाँ दर्ता शुल्क निर्धारण गरिएको छ । प्रतियोगितामा प्रथम हुने समूहलाई नगद ५१ हजार, दोस्रो हुनेलाई ३१ हजार र तेस्रोलाई २१ हजार रुपैयाँसहित ट्रफी तथा प्रमाणपत्र प्रदान गरिनेछ । अन्य सहभागी सबै समूहलाई प्रमाणपत्र उपलब्ध गराइने जनाइएको छ ।

कार्यक्रममा नेपालगञ्जमा लामो समयदेखि कला क्षेत्रमा योगदान पुर्‍याएका एक जना वरिष्ठ तथा अग्रज कलाकारलाई “दोसल्ला अवार्ड” सहित सम्मानपत्र र नगद ५ हजार रुपैयाँद्वारा सम्मान गरिने भएको छ । कार्यक्रमको कुल बजेट ३ लाख ३० हजार रुपैयाँ रहेको जनाइएको छ । जसमा नेपालगञ्ज उपमहानगरपालिकाबाट ३ लाख सहयोग प्राप्त भएको र बाँकी ३० हजार रुपैयाँ संस्था स्वयंले व्यहोर्ने उल्लेख गरिएको छ । कार्यक्रम वीपी चोकस्थित सुनाखरी रेष्टरेन्ट एण्ड पार्टी प्यालेसमा विहान ११ बजेदेखि सुरु हुनेछ ।

पत्रकार सम्लेनलनमा बाँके कला केन्द्रका अध्यक्ष सुन्दर गुरुङले कला र संस्कृतिको क्षेत्र उपेक्षामा परिरहेको महसूस भइरहेको बेला यो इभेन्टलाई संस्थागत गर्न सबैको सहयोग आवश्यक रहेकोमा जोड दिए । त्यस अवसरमा नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाई र बाँके शाखा अध्यक्ष नवीन गिरीले पनि कार्यक्रम सफलताको शुभकामना ब्यक्त गरे ।

प्रकाशित मिति: बिहीबार, वैशाख २४, २०८३ १३:४८

प्रतिक्रिया दिनुहोस्