समर्थ कार्यक्रमको सिकाई विमर्श कार्यशाला नेपालगन्जमा

समाचार

गृहपृष्ठ
समाचार
समर्थ कार्यक्रमको सिकाई विमर्श कार्यशाला नेपालगन्जमा

समर्थ कार्यक्रमको सिकाई विमर्श कार्यशाला नेपालगन्जमा

बुधबार, जेठ २०, २०८३ बागेश्वरी पोस्ट

नेपालगन्ज । समर्थ कार्यक्रमले बुधबार नेपालगन्जमा प्रदेश स्तरीय अनुभव तथा सिकाई विमर्श कार्यशाला गरेको छ । समर्थ लैंगिक तथा मानव विकास परिणामहरुमा वृद्धिका लागि संचालित प्रणाली सबलीकरण कार्यक्रम हो । समर्थ कार्यक्रम कार्यान्वयनका लागि अर्थ मन्त्रालय र ब्रिटिश दूतावासबीच समझदारी छ ।

ब्रिटिश दूतावासको आर्थिक सहयोगमा तीनै तहका सरकारको प्रणालीगत सुदृढीकरणको लागि लुम्बिनी र मधेश प्रदेशका सम्बन्धित मन्त्रालय, विभाग, स्थानीय सरकार र सम्बन्धित कार्यालयहरुसंग समन्वय तथा सहकार्य गर्न समर्थ कार्यक्रमले विभिन्न क्रियाकलापहरु संचालन गर्दै आएको छ ।

समर्थले विशेषगरी शिक्षा, स्वास्थ्य, सुशासन र लैंगिक समानता तथा सामाजिक समावेशिता 'थिम' मा काम गर्दछ । एडम स्मिथ इन्टरनेशनल (ASI) ले यो कार्यक्रम संचालन गर्दछ ।

कार्यशाला खजुरा गाउँपालिकाका अध्यक्ष डम्बर बहादुर विकको अध्यक्षतामा सम्पन्न भएको हो । त्यसक्रममा कोहलपुर नगरपालिकाका उपप्रमुख संगिता सुवेदी, राप्तीसोनारी गाउँपालिकाका कार्यवाहक अध्यक्ष मनिषा सिंह थारु लगायतले बोलेका थिए । कार्यक्रममा समावेशी शासनका विषयमा प्यानल छलफल पनि गरिएको थियो । जसमा खजुरा गाउँपालिका अध्यक्ष विक, कोहलपुर उपप्रमुख सुवेदी, लुम्बिनी प्रदेश योजना आयोगका पूर्व उपाध्यक्ष डा. नहकुल केसी, प्याब्सन बाँकेका अध्यक्ष विकास बज्राचार्य प्यानलिष्टका रुपमा थिए ।

कार्यशालामा स्वागत तथा कार्यक्रमको उद्देश्यमाथि मन्जु थापा तुलाधरले प्रकाश पारेकी थिइन् भने कार्यक्रम संचालन राप्तीसोनारी गाउँपालिकाका शिक्षा शाखा प्रमुख मोहन बुढा क्षेत्रीले गरेका थिए । त्यसक्रममा समूहगत छलफल तथा विभिन्न प्रस्तुतिकरण समेत गरिएका थिए ।

प्रकाशित मिति: बुधबार, जेठ २०, २०८३ १८:३६

प्रतिक्रिया दिनुहोस्