नेपालगन्जमा भूकम्पमा आधारित 'कृत्रिम घटना अभ्यास'

समाचार

गृहपृष्ठ
समाचार
नेपालगन्जमा भूकम्पमा आधारित 'कृत्रिम घटना अभ्यास'

नेपालगन्जमा भूकम्पमा आधारित 'कृत्रिम घटना अभ्यास'

शुक्रबार, असार ५, २०८३ बागेश्वरी पोस्ट

नेपालगञ्ज । नेपालगन्जमा भूकम्पमा आधारित 'कृत्रिम घटना अभ्यास' गरिएको छ । विपद् पूर्व तयारी तथा प्रतिकार्य क्षमता अभिवृद्धि गर्ने उद्देश्यले कृत्रिम विपद् घटना अभ्यास (टेबल टप सिमुलेशन) कार्यक्रम आज नेपालगन्जमा सम्पन्न भएको हो । नेपालगञ्ज उपमहानगरपालिकाको आयोजना तथा सहरी विपद् तथा भूकम्पीय जोखिम पूर्व तयारी परियोजना (सुपर) को प्राविधिक सहयोगमा आयोजित कार्यक्रममा उपमहानगरपालिकाका प्रमुख प्रशासकीय अधिकृत मानबहादुर बमको अध्यक्षता रहेको थियो ।

कार्यक्रममा विपद् विज्ञ डा. सिर्जन मल्ल र दामोदर अधिकारीले प्रशिक्षकको भूमिका निर्वाह गर्दै विपद्का समयमा समन्वय, निर्णय प्रक्रिया र प्रतिकार्य व्यवस्थापनका विषयमा सहजीकरण गरेका थिए । सशस्त्र प्रहरी बलका नायब उपरीक्षक पुरुषोत्तम भण्डारीले विपद् व्यवस्थापन कार्यविधि तथा व्यवहारिक पक्षका विषयमा प्रस्तुतिकरण गरेका थिए । कार्यक्रमका क्रममा सहभागीहरूलाई तीन समूहमा विभाजन गरी भूकम्पसँग सम्बन्धित काल्पनिक घटनामा आधारित टेबल टप सिमुलेशन अभ्यास सञ्चालन गरिएको थियो । अभ्यासमार्फत विपद्को अवस्थामा विभिन्न निकायबीच हुने समन्वय, सूचना आदानप्रदान, स्रोत परिचालन तथा निर्णय प्रक्रियाको परीक्षण गरिएको थियो ।

आपतकालीन कार्य सञ्चालन केन्द्रका सूचना व्यवस्थापन अधिकृत रुपन ज्ञवालीका अनुसार स्थानीय आपतकालीन कार्य सञ्चालन केन्द्र, स्थानीय विपद् व्यवस्थापन समिति तथा विषयगत समितिहरूबीचको समन्वय र कार्य सम्पादन क्षमताको मूल्याङ्कन तथा सुदृढीकरणका लागि उक्त अभ्यास गरिएको हो । कार्यक्रममा स्थानीय विपद् व्यवस्थापनसँग सम्बन्धित विभिन्न निकायका प्रतिनिधि तथा सरोकारवालाहरूको सहभागिता रहेको थियो । सहभागीहरूले यस्ता अभ्यासले वास्तविक विपद्का बेला प्रभावकारी प्रतिकार्य तथा समन्वयमा महत्वपूर्ण योगदान पुग्ने विश्वास व्यक्त गरेका थिए ।

युरोपियन युनियनको सहयोगमा नेपालगञ्ज उपमहानगरपालिकामा सहरी विपद तथा भूकम्पीय पूर्व तयारी परियोजना (सुपर) सञ्चालनमा रहेको छ । युरोपियन युनियनको आर्थिक सहयोग तथा युएनडिपी, युनिसेफ, युएन ओमन र एचआईको साझेदारी एवम् सिडिएम नेपालको प्राविधिक सहयोगमा नेपालगञ्ज उपमहानगरपालिकामा सञ्चालित सहरी विपद् तथा भूकम्पीय पूर्व तयारी परियोजना (सुपर) ले विपद पूर्व तयारी र प्रतिकार्यका लागि काम गरिरहेको छ ।

प्रकाशित मिति: शुक्रबार, असार ५, २०८३ १७:३३

प्रतिक्रिया दिनुहोस्