पत्रकार महिलाहरुका लागि क्षमता अभिबृद्धि तालिम नेपालगञ्जमा सुरु

समाचार

गृहपृष्ठ
समाचार
पत्रकार महिलाहरुका लागि क्षमता अभिबृद्धि तालिम नेपालगञ्जमा सुरु

पत्रकार महिलाहरुका लागि क्षमता अभिबृद्धि तालिम नेपालगञ्जमा सुरु

शुक्रबार, असार ५, २०८३ बागेश्वरी पोस्ट

नेपालगञ्ज । क्रियाशील पत्रकार महिलाहरुका लागि तीन दिने क्षमता अभिबृद्धि तालिम नेपालगञ्जमा सुरु भएको छ । सामाजिक विकास डिभिजन कार्यालयको सहयोग, क्रियाशील पत्रकार महिला बाँकेको समन्वय तथा बास नेपालको आयोजनामा आजदेखि तालिम सुरु भएको हो । नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईको प्रमुख आतिथ्यतामा भएको तालिमको उद्घाटन सत्रमा बोल्दै चौलागाईले समय सान्दर्भिक तालिमको आयोजना गरिएको बताए । उनले तीन दिने क्षमता अभिबिृद्ध तालिमले पत्रकार महिलाहरुको कार्यशैलीमा निखारता ल्याउने विश्वास ब्यक्त गरे ।

नेपाल पत्रकार महासंघ बाँकेका अध्यक्ष नवीन गिरीले पत्रकार महिलाहरुका लागि क्षमता अभिबृद्धि तालिम आयोजना गर्नु अत्यन्तै सुखद रहेको बताउँदै तालिमले सहभागीहरुको क्षमता र आत्मविश्वास बढाउने बताए । उनले यस्ता तालिम आयोजना गर्ने संस्थाहरुलाई धन्यबाद ज्ञापन गर्दै तालिमको सफलताको शुभकामना ब्यक्त गरे । नेपाल पत्रकार महासंघका पूर्व केन्द्रीय सदस्य झलक गैरेले ब्यवसायिक पत्रकारिताको खाँचो रहेका बेला महिला पत्रकारहरुको क्षमता अभिबृद्धिका लागि तालिम आयोजना गरिनुले थप आशा पलाएको बताए । उनले पत्रकारितामा भविष्य रहेको बताउँदै सबैलाई पत्रकार आचारसंहिताको पालना गर्दै निडर भएर व्यवसायिक पत्रकारिता गर्न अनुरोध गरे । तालिममा क्रियाशील पत्रकार महिला बाँकेका संस्थापक अध्यक्ष अछरी पोख्रेल र अध्यक्ष साबित्री गिरीले पनि शुभकामना मन्तब्य ब्यक्त गरेका थिए ।

बास नेपालका केन्द्रीय अध्यक्ष शिव कुमार वर्माको अध्यक्षतामा भएको तालिम उद्घाटन कार्यक्रममा स्वागत तथा तालिमको उद्देश्यमाथि बास नेपालका कार्यकारी निर्देशक नमस्कार शाहले प्रकाश पारेका थिए । बास नेपालका केन्दीय महासचिब कल्पना अधिकारीले सञ्चालन गरेको तालिमको उद्घाटन सत्रमा धन्यबाद ज्ञापनसहित समापन बास नेपालका केन्द्रीय अध्यक्ष बर्माले गरेका थिए । तालिमको पहिलो दिन नेतृत्व विकास, पत्रकारितामा महिलाहरुको संलग्नता र आत्मविश्वास, खोजमूलक पत्रकारिता, समाचारको तथ्य चेक, मिथ्या सूचना र मोबाइल पत्रकारिताका बिषयमा प्रशिक्षक कृष्ण अधिकारी, अछरी पोख्रेल र हेमराज भट्टले सहजीकरण गरेका थिए ।

क्रियाशील पत्रकार महिलाहरूको व्यवसायिक र प्राविधिक क्षमता विकास गर्ने, डिजिटल प्रविधि, खोजमूलक पत्रकारिता र आधुनिक लेखन शैलीबारे व्यवहारिक ज्ञान प्रदान गर्ने, लैंगिक संवेदनशील रिपोर्टिङ र सामाजिक समावेशीकरणका मुद्दाहरू उठाउने सीपको विकास गर्ने, मोफसलमा कार्यरत महिला पत्रकारहरूबीच व्यवसायिक सञ्जाल र आपसी सहयोगको भावना सुदृढ बनाउने उद्देश्यले आयोजना गरिएको तालिममा २५ जना क्रियाशील पत्रकार महिलाहरुको सहभागिता रहेको छ । तालिम आइतबारसम्म सञ्चालन हुनेछ ।

प्रकाशित मिति: शुक्रबार, असार ५, २०८३ १८:१४

प्रतिक्रिया दिनुहोस्