नेपालगन्जमा सहकारी संस्थाको रकम अपचलन गर्ने चार जना जेल चलान

समाचार

गृहपृष्ठ
समाचार
नेपालगन्जमा सहकारी संस्थाको रकम अपचलन गर्ने चार जना जेल चलान

नेपालगन्जमा सहकारी संस्थाको रकम अपचलन गर्ने चार जना जेल चलान

आइतबार, कात्तिक १७, २०७६ बागेश्वरी पोस्ट

नेपालगन्ज। नेपालगन्जमा सहकारी संस्थाको रकम अपचलन गर्ने चार जनालाई जिल्ला अदालत बाँकेले पुर्पक्षका लागि थुनामा राख्न आदेश दिदै कारागार चलान गरेको छ ।

नेपालगन्जको सहकारी वित्तीय विकास संस्था लिमिटेडको ४३ करोड रुपैयाँ अपचलन भएको भनिएको अभियुक्तहरुको सुनुवाई गर्दै न्यायाधीश धनिश्वर पौडेलको इजलाशले आइतवार सहकारीका प्रमुख प्रबन्धक गोपाल भण्डारी, सहायक प्रमुख प्रबन्धक गंगाधर सुबेदी, बैंकिङ्ग प्रबन्धक अरुणकुमार पाठक र सह उपसहायक बलराम यादवलाई थुनामा राख्न आदेश दिएको हो । अभियुक्तद्वय लेखा समिति सदस्य स्थिरमणी बज्राचार्य र ओमप्रकाश चौधरीसँग जनही २० लाख रूपैयाँ धरौटी मागिएको छ ।

बज्राचार्य दिउँसो २० लाख नगद धरौटी बुझाएर रिहा भएका छन् भने चौधरीले धरौटीमा जायजेथा राखिपाउँ भनेर निवेदन दिएका छन् । जग्गाको मूल्याङ्कन लगायतका प्रक्रियामा कम्तीमा एक साता लाग्ने भएकाले चौधरीलाई थुनामै बस्नु पर्नेछ । बाँके प्रहरीले गठन गरेको विज्ञ समूहको सहयोगमा भएको छानबिनमा सहकारीको कूल पूँजी ५२ करोडबाट ४३ करोड रूपैयाँ अपचलन भएको दाबी गरेको छ ।

जिल्ला अदालत बाँकेमा सहकारीका सञ्चालक र कर्मचारी गरी ४१ जनाविरुद्ध सहकारी रकम हिनामिना, ठगी र संगठित अपराधअन्र्तगत अभियोग पत्र दायर गरेको छ । चारजना कर्मचारी र दुईजना लेखा समिति सदस्य गरी ६ जना मात्र पक्राउ परेका थिए । ३५ जना अभियुक्त फरार छन् ।

सहकारीका ११ हजार नौ सय ८ निक्षेपकर्ता र एक हजार आठ सय ६० शेयरधनीमध्ये एक हजार नौ निक्षेपकर्ता र शेयर धनीले जिल्ला प्रहरी कार्यालय बाँकेमा आफ्नो रकम फिर्ता गरी अभियुक्तमाथि कारबाहीको माग गर्दै जाहेरी दिएका छन् ।

प्रकाशित मिति: आइतबार, कात्तिक १७, २०७६ २०:३६

प्रतिक्रिया दिनुहोस्