'मान्छेदेखि सावधान’ लघु कथा संग्रह विमोचन

संस्कृति-साहित्य

गृहपृष्ठ
संस्कृति-साहित्य
'मान्छेदेखि सावधान’ लघु कथा संग्रह विमोचन

'मान्छेदेखि सावधान’ लघु कथा संग्रह विमोचन

शनिबार, फागुन ८, २०७७ बागेश्वरी पोस्ट

नेपालगञ्ज । साहित्यकार सृजन लम्सालको लघु कथा संग्रह ‘मान्छेदेखि सावधान’ विमोचन गरिएको छ ।

नेपालगन्जमा आज एक कार्यक्रमका बीच नेपाल प्रज्ञा प्रतिष्ठानका पूर्व सदस्य सचिव एवं वरिष्ठ कथाकार सनत रेग्मी, प्राज्ञ सभा सदस्य हरि प्रसाद तिमिल्सेना लगायतले संयुक्तरुपमा कृतिको विमोचन गर्नुभएको हो । मध्पश्चिम स्रष्टा समाजद्वारा प्रकाशित संग्रहमा ७३ वटा लघुकथाहरु समावेश छन् । ५ दशकदेखि साहित्यमा क्रियाशील निवन्धकार लम्सालको यो संग्रह नवौं कृतिका रुपमा सार्वजनिक भएको हो ।

विमोचन कार्यक्रममा पुस्तकमाथि टिप्पणी गर्दै साहित्यकार इन्द्र बहादुर भण्डारी (इन्द्रेणी)ले संग्रहमा समाजका विविध पाटो उठान गर्न खोजिएपनि सामाजिक विषयवस्तु र सन्देश भने प्रभावकारी रहेको जिकिर गर्नुभयो । लम्सालका लघुकथाले निवन्धकारको पहिचानलाई कमजोर बनाउन सक्नेतर्फ ध्यान दिन उहाँले कृतिकारलाई सुझाउनुभयो ।

पुस्तकका अर्का टिप्पणीकर्ता पुस्कर रिजालले लघुकथा संग्रहले वर्तमान समाजको चित्रणसँगै नैतिकताको मार्ग निर्देश गरेको बताउनुभयो ।

कार्यक्रमका प्रमुख अतिथि वरिष्ठ कथाकार रेग्मीले लम्सालको लघु कथा संग्रहले नयाँ पहिचान स्थापित गरेको भन्दै थप परिस्कृत रचनाको अपेक्षा गर्नुभयो ।

यस्तै प्राज्ञ तिमिल्सेनाले संग्रहमा समावेश स्थान र विषयले आञ्चलिकता झल्काएको भन्दै कथाका विषयवस्तु गहन भएको दावी गर्नुभयो । कृतिकार लम्सालले साहित्य सिर्जना सीमामा नबाँधिने भएकाले नयाँ विधामा पनि कलम चलाइरने दृढता व्यक्त गर्नुभयो ।

स्रष्टा समाजका उपाध्यक्ष अमृत ढकालले सञ्चालन गरेको कार्यक्रमको अध्यक्षता समाजका अध्यक्ष शुक्रऋषि चौलार्गाले गर्नुभएको थियो । एक सय २८ पेजको सो संग्रहको मूल्य २ सय रुपैयाँ तोकिएको छ ।

प्रकाशित मिति: शनिबार, फागुन ८, २०७७ १९:००

प्रतिक्रिया दिनुहोस्