म मतदातालाई सपना होइन विकास बाँड्छुः इश्तियाक राई

आम निर्वाचन-२०७९

गृहपृष्ठ
आम निर्वाचन-२०७९
म मतदातालाई सपना होइन विकास बाँड्छुः इश्तियाक राई

म मतदातालाई सपना होइन विकास बाँड्छुः इश्तियाक राई

आइतबार, असोज ३०, २०७९ बागेश्वरी पोस्ट

नेपालगञ्ज । बाँके क्षेत्र नम्बर २ प्रतिनिधिसभा सदस्यका उम्मेदवार मोहम्मद इश्तियाक राईले ‘सपना बाँड्नेहरू’ र विकास ल्याउने उम्मेदवारहरू छुट्याएर मतदाता गर्न आह्वान गरेका छन् । बाँकेको निर्वाचनमा यसपाली जनतामा सपना अनि धर्म, सम्प्रदायको नाममा विभाजन निम्त्याउने र विकास ल्याउनेहरू बीच प्रतिष्पर्धा रहेको भन्दै आम मतदाताले निकै सचेत भएर मतदान गर्नुपर्ने अवस्था आएको उनले बताए ।

जनता समाज पार्टीका केन्द्रीय नेता एबम् निर्वतमान भौतिक योजना तथा यातायात मन्त्री रहेका उनले बाँकेको समग्र विकासका र त्यसको निरन्तरताका लागि फेरि एकपटक जसपाका उम्मेदवारहरूलाई मौका दिन पनि मतदाताहरूलाई आग्रह गरे । बाँकेका विभिन्न वडाहरूमा पार्टीले चुनाव प्रचारप्रसारका लागि खोलेका सम्पर्क कार्यालयहरूको उद्घाटन गर्दै उनले यस्तो बताएका हुन् ।

‘फेरि पनि जनतालाई झुक्याउनका लागि सपना बाँड्ने बेला आएको छ । धर्म र जातजाति अनि सम्रदायको नाममा समाजमा विभाजन ल्याउन खोज्नेहरू धर्मको राजनीति गरिरहेका छन्’ उनले भने ‘तर हामी कसैलाई सपना र आश्वासन होइन, हामी काम गरेर देखाउँछौं । सपना होइन, विकासको लहर देखाउँछौं ।’ उम्मेदवार राईले आफ्नो क्षेत्रको विकासमा लागिपर्ने, समाज र समुदायका लागि सधैं साथमा रहने उम्मेदवार छान्न पनि आग्रह गरे ।

‘हामीले पहिलादेखि नै भन्दै आएका छौं कि अब धर्म र सम्प्रदायको नाममा होइन विकासको नाममा राजनीति गरौं’ उनले भने ‘समाजमा विभाजन ल्याउन र विखण्डन होइन, विकासका योजना ल्याउन र जनताका लागि काम गर्न प्रतिस्पर्धा गरौं।’ आफू पटक-पटक सांसद र मन्त्री हुँदा बाँकेको मुहारै फेरिने गरी विकासका योजनाहरू ल्याएको र अझै कतिपय योजनाहरू पूरा गर्न बाँकी रहेको भन्दै त्यसका लागि एकपटक फेरि आफू र आफ्नो समूहलाई मौका दिन पनि मतदातासँग अपिल गरे ।

‘धेरै गर्न सकेँ कि सकिनँ त्यो तपाईंहरूको घर आँगनमै छ । बाटोघाटो र पुलपुलेसाहरू हाम्रै वरिपरि छन्। अस्पतालको भवन उठिसकेको छ । सहरभरिको सबैभन्दा ठूलो हल अब खुल्नेवाला छ । मन्दिर र मस्जिदहरू बनाएका छौं । सडकहरू उज्यालिएका छन्’ उनले भने ‘अझै धेरै काम गर्न बाँकी नै छ । ती काम पूरा गर्नका लागि अनि अरू पनि विकासका योजनाहरू यहाँ ल्याउनका लागि फेरि एकपटक मौका दिनुस् । तपाईंहरूको विश्वास तोड्नेछैन । म भाग्नेवाला पनि छैन । यहीँ छु । यहीँ हुनेछु । काम गर्न सकिनँ भने त्यसको सजाय भोग्न तयार पनि छु ।’

चुनाव प्रचारप्रसारलाई तीव्रता दिएको जसपाले क्षेत्र नम्बर २ का सबै वडाहरूमा प्रचारप्रसारका लागि कार्यालयहरू खोलिरहेको छ । नेपालगञ्ज उपमहानगरपालिका १३ को लालापुरवा, बुलबुलिया, मदनचोकको घसियारन मोहल्ला, १९ को कण्ठीपुर, वडा नम्बर १४ को बालेगाउँ, नेपालगञ्ज २ मा, वडा नम्बर ९ को बाँकेगाउँ, वडा नम्बर ४ को गणेशपुर, वडा नम्बर ६ फुल्टेक्रा तथा वडा नम्बर १५ को पिप्रहवामा प्रचारप्रसारका लागि सम्पर्क कार्यालयहरू उद्घाटन भइसकेका छन् ।

त्यस्तै बाँके क्षेत्र नम्बर २ अन्तर्गत् नेपालगञ्ज उपमहानगरपालिकाका वडा नम्बर १२ बेलासपुर, ४ को घोसी टोल, ७ को पिपलचौतारा, ७ मै एमपी स्कुल र ५ को भट्टी टोलमा प्रचारप्रसार सम्पर्क कार्यालयहरू खोलिएका थिए ।

प्रकाशित मिति: आइतबार, असोज ३०, २०७९ १४:४१