भुम राजनीतिको नयाँ भूमी खोज्दै

आम निर्वाचन-२०७९

गृहपृष्ठ
आम निर्वाचन-२०७९
भुम राजनीतिको नयाँ भूमी खोज्दै

भुम राजनीतिको नयाँ भूमी खोज्दै

शुक्रबार, कात्तिक ४, २०७९ बागेश्वरी पोस्ट

नेपालगन्ज । बुद्धनगरको बसाँईमा एक दिन तत्कालीन नेपाली कांग्रसेका कार्यवाहक सभापति सुशील कोइरालाले भनेका थिए-'भुमले रजनीतिक भूमी फराकिलो बनाउनुपर्छ ।'

नेपाल विद्यार्थी संघका युवाहरुको एक समुह कोइरालालाई चुनाव हारेको समयमा सान्त्वना दिन पुगेका थिए, बुद्धनगर कोइराला बस्ने घरमा । कुरा २०६४ को पहिलो संविधानसभा निर्वाचन पछिको हो । समय आफ्नै रफ्तारमा अघि बढिरह्यो । भुम भण्डारी २०७० देखि २०७३ सम्ममा नेविसंघ केन्द्रिय सदस्य पनि भए ।

पार्टी राजनीतिमा उनेव कोहलपुर नगर कार्य समिति सचिव भएर अग्रपंक्तिमा कांग्रेसका एजेण्डा स्थापित गराउन संघर्ष गरिरहे । जतिबेला नेकपाको बलियो सरकार थियो । उनी राजनीतिक र सामाजिक मुद्दामा जनताका पक्षमा आवाज बुलन्द गरिरहे । तर, उनै भुम यतिबेला राजनीतिको भूमी फराकिलो पार्न रुखलाई छाडेर 'ढकिया' चुनाव चिन्ह लिएर चुनावी मैदानमा होमिएका छन् ।

राजनीतिको नयाँ भूमी खोज्न भूमीपुत्रहरुले स्थापना गरेको पार्टी राष्ट्रिय उन्मुक्ति पार्टीमा जोडिए । उनको राजनीतिक संघर्ष निकै उतारचढावपूर्ण रह्यो । राज्यबाट राजनीतिक मुद्धामा दर्जनौं पटक पक्राउ परे । द्वन्द्वकालमा २०५८ मंसीर देखि २०५८ पुस सम्म इमामनगर राँझामा नेपाल आर्मीको ब्यारेकमा नजरबन्दमा समेत परे । तर, उनको नजरमा लोकतन्त्रको दूर दृष्टि थियो ।

सेनाको यातनापछि २०६० असोज १४ गतेसम्म भारतको नासिकमा निर्वासित भएर बस्नुपर्यो । बाँके प्रदेश क्षेत्र नं. १ (२) बाट उम्मेद्वारी दिएका भण्डारीको जन्म रुकुम जिल्ला चौरजहारीमा २०३८ जेठ २० भएको हो । २०५१ सालमा शितल उच्च माध्यामिक विद्यालय चौरजहारी रुकुमबाट नेविसंघको यात्रा शुरु गरेका भण्डारी स्पष्ट वक्ता हुन् । जब नेपालगन्जको महेन्द्र बहुमुखी क्याम्पस पुगे उनको विद्यार्थी राजनीति थप अघि बढ्यो ।

राजनीतिशास्त्र र नेपाली साहित्यमा एमए, शिक्षा शास्त्रमा विएड सम्मको अध्ययन पूरा गरेका भण्डारीले यतिबेला आफ्नो राजनीतिको धार परिवर्तन गरेका छन् । नागरिक उन्मुक्ति पार्टीबाट राजनीतिको भूमी विस्तार गर्ने निर्णयमा पुगे । राज्य श्रोतको दोहन गर्नेहरुलाई कांग्रेसले संरक्षण गरिरहेको भन्दै जनताको अधिकारका लागि उनले बाटो मोडेको बताएका छन् ।

यतिबेला कांग्रेस नेतृत्व एउटा होनहार युवालाई गुमाइरहँदा उन्मुक्ति पार्टीले उनलाई कांग्रेसबाट उन्मुक्ति त दिलायो अब जनतालाई उन्मुक्ति दिलाउने भुम भण्डारीको सफर कति उन्मुक्त रहन्छ भविष्यले देखाउला ।

प्रकाशित मिति: शुक्रबार, कात्तिक ४, २०७९ १०:११