पूर्वसांसद गायत्री साह मेडिसिटी अस्पतालविरूद्ध १० करोड क्षतिपूर्ति माग्दै अदालतमा

राजनीति

गृहपृष्ठ
राजनीति
पूर्वसांसद गायत्री साह मेडिसिटी अस्पतालविरूद्ध १० करोड क्षतिपूर्ति माग्दै अदालतमा

पूर्वसांसद गायत्री साह मेडिसिटी अस्पतालविरूद्ध १० करोड क्षतिपूर्ति माग्दै अदालतमा

बिहीबार, कात्तिक ७, २०७६ बागेश्वरी पोस्ट

काठमाडौं ।पूर्वसांसद गायत्री साहले ललितपुरस्थित मेडिसिटी अस्पतालविरूद्ध १० करोड क्षतिपूर्ति माग्दै जिल्ला अदालत ललितपुरमा मुद्दा दायर गरेकी छिन्। मेडिसिटी अस्पताल र त्यहाँका डाक्टरका कारण आर्थिक, मानसिक र शारीरिक क्षति भएको भन्दै उनले असोज २८ गते मुद्दा दायर गरेकी हुन्।

उपभोक्ता हित संरक्षण ऐन २०७५ को दफा ५० बमोजिमको क्षतिपूर्ति माग गर्दै साहले मुद्दा दायर गरेको अदालतले जनाएको छ। ‘अस्पतालले गलत रिपोर्ट दिएका कारण डाउन सिन्ड्रोम भएको बच्चा जन्माउनु परेको र त्यसको जीवनभरको उपचार खर्च भन्दै सो बराबरको रकम क्षतिपूर्तिस्वरूप मागिएको छ,’ स्रेस्तेदार नगेन्द्र कालाखेतीले बताए। उक्त मुद्दालाई अदालतले प्रक्रियामा लगेको छ। पेशीमा भने चढिसकेको छैन।साहले गत फागुन २८ गते मेडिसिटी अस्पतालमा छोरालाई जन्म दिएकी थिइन्।

तर, शारीरिक विकास नहुने किसिमको ‘डाउन सिन्ड्रोम’ शिशु जन्मिएपछि उनले लामो समयसम्म बच्चा अस्पतालबाट लगिनन्। उच्च अदालत पाटनले आदेश दिएपछि उनले बच्चालाई घर लगेकी छिन्। तर, नियमित उपचार खाँचो रहेको भन्दै उनले बच्चालाई कुनै बेला अस्पताल लैजानुपर्ने बताएकी छिन्। गर्भवती भएका बेला आफूलाई बच्चाको अवस्था सामान्य रहेको रिपोर्ट दिइएको दाबी साहको छ। तर, जन्मँदा ‘डाउन सिन्ड्रोम’ देखिएपछि उनले अस्पताल र डाक्टरले लापरबाही गरेको आरोप लगाउँदै आएकी छिन्।

जीवनभरको उपचारको ग्यारेन्टी माग्दै बच्चा नलगेपछि मेडिसिटी र साहबीच लामो समयसम्म विवाद रहँदै आएको छ। ‘हाम्रो बच्चाको स्वास्थ्य अवस्था अब जीवनभर सुधार हुँदैन, जीवनभर औषधि उपचार गरिरहनुपर्छ र राम्रो उपचार नपाएमा कुनै पनि समयमा ज्यान तलमाथि हुनसक्ने अवस्था रहेकाले जीवनभरको उपचार ग्यारेन्टी मागेका हौं,’ साहका श्रीमान् राजेश महतोले भने, ‘विकलाङ्ग बच्चा जन्मिँदा अस्पतालमा लाखौं रुपैयाँ खर्च गर्नुपरेको छ, शारीरिक र मानसिक यातना भोगेका छौं।

मेडिसिटीले यो कुरा पटक्कै मनन् नगरेका कारण क्षतिपूर्तिको मुद्दा दायर गर्न बाध्य भयौं।’सेतोपाटीबाट साभार।

प्रकाशित मिति: बिहीबार, कात्तिक ७, २०७६ १२:४२

प्रतिक्रिया दिनुहोस्