लागूऔषध बिरुद्धको कारबाहीमा ठूलो परिमाणमा ब्राउनसुगर बरामद

सुरक्षा-अपराध

गृहपृष्ठ
सुरक्षा-अपराध
लागूऔषध बिरुद्धको कारबाहीमा ठूलो परिमाणमा ब्राउनसुगर बरामद

लागूऔषध बिरुद्धको कारबाहीमा ठूलो परिमाणमा ब्राउनसुगर बरामद

मंगलबार, पुस २, २०८१ बागेश्वरी पोस्ट

नेपालगञ्ज । बाँके प्रहरीले गत मंसिर महिनामा मात्रै लागूऔषध ओसारपसार बिरुद्धको कारबाहीमा ठूलो परिमाणमा ब्राउनसुगर बरामद गरेको छ । उक्त अभियानमा जिल्ला प्रहरी बाँकेले १६१ ग्राम ९५० मिलिग्राम ब्राउनसुगर, प्रतिबन्धित औषधि ८० ट्याब्लेट नाइट्राजेपाम र ४३६ ट्याब्लेट ट्रामाडोलसहित १६ जना ओसारपसारकर्ताहरुलाई पक्राउ गरेको छ । पक्राउ परेकाहरुलाई कानुनी दायरामा ल्याइएको जिल्ला प्रहरी कार्यालय बाँकेले जानकारी दिएको छ ।

त्यस्तै जिल्लाभरबाट अवैध तस्करी बरामदतर्फ ९ लाख ३३ हजार ७६० रुपैयाँ बराबरको अवैध सामग्री बरामद गरिएको छ । जिल्ला प्रहरी बाँकेका अनुसार बरामद गरिएको सबै सामग्रीलाई नेपालगञ्ज भन्सार कार्यालयमा बुझाइएको छ । जिल्ला प्रहरी बाँकेबाट खटिएको टोलीले मंसिरमा ५४ जना फरार प्रतिवादीलाई पक्राउ गर्न सफल भएको छ । जस अन्तर्गत पक्राउ परेका प्रतिवादीबाट ७ बर्ष २ महिना २० दिन कैद र ८ लाख ६३ हजार ८ सय रुपैयाँँ जरिवाना असूल उपर गरिएको जिल्ला प्रहरी बाँकेले जानकारी दिएको छ ।

त्यसैगरी जिल्ला प्रहरी कार्यालय बाँकेमा दर्ता भएका जम्मा ८४ वटा मुद्दामा ५२ जना ब्यक्तिहरुलाई पक्राउ गरी कानुनी दायरामा ल्याइएकोमा पेन्डिङमा रहेका ३८ वटा मुद्दालाई फर्छ्यौट गरिएको बाँके प्रहरीले जानकारी दिएको छ । ठाडो उजुरीतर्फको ४२८ वटा मुद्दामा ४१६ फर्छ्यौट भएको र १२ वटा बाँकी निबेदन फर्छ्यौट प्रक्रियामा रहेका छन् ।

यता जिल्लाभरमा अबैधरुपमा नदीजन्य पदार्थ उत्खनन् गर्ने ४ वटा ट्याक्टर नियन्त्रणमा लिएर आबश्यक कारबाहीका लागि सम्बन्धित निकायमा बुझाएर ४६ हजार रुपैयाँ जरिवाना गराएको जिल्ला प्रहरी बाँकेले जनाएको छ ।

यसैगरी, जिल्लाका विभिन्न स्थानबाट हराएका २ वटा मोटरसाइकल र १० थान स्मार्ट मोबाइल फोन फेला पारेर सम्बन्धित धनीलाई बुझाइएको जिल्ला प्रहरी बाँकेले जनाएको छ ।

जिल्ला प्रहरी बाँकेमा महिला बालबालिकासँग सम्बन्धित ६ मुद्दा दर्ता हुँदा ६ जनालाई पक्राउ गरी कानुनी दायरामा ल्याइएको थियो भने घरेलु हिंसासम्बन्धि दर्ता भएका ५० वटा उजुरीमा ३६ वटा उजुरी फछर्यौट गरिएको छ । १४ वटा उजुरी अनुसन्धान कारबाही प्रक्रियामा रहेको प्रहरीले जानकारी दिएको छ भने हराएका महिला, बालबालिका तथा जेष्ठ नागरिकतर्फको १० वटा निबेदनमा ६ जनालाई फेला पारी अभिभावकको जिम्मा लगाइएको र बाँकी खोजतलासको क्रममा रहेको जिल्ला प्रहरी बाँकेले जानकारी दिएको छ ।

त्यसैगरी ट्राफिक कारबाहीतर्फ मंसिरमा मात्रै २८ सय ८६ सवारीसाधनलाई कारबाही गर्दै २४ लाख ७१ हजार ५ सय रुपैयाँ रुपैयाँ राजश्व संकलन गरिएको छ । जिल्ला प्रहरी बाँकेले मंसिर २८ गते मात्रै १ सय ५० ग्राम ब्राउन सुगरसहित ३ जनालाई पक्राउ गरेको थियो । उक्त परिमाण अत्यधिक हो ।

त्यसैगरी समुदाय प्रहरी सहकार्यतर्फ जिल्लाभरमा बाँके प्रहरीले १०८ पटक सचेतनामूलक कार्यक्रम गरेको छ । जसमा २८ पटक लैङ्गिक हिंसा, लागूऔषधतर्फ ७ पटक सचेतना कार्यक्रम गरिएको छ । आत्महत्यासम्वन्धि सचेतना ७ वटा, २ पटक अल्पसंख्यकसंग प्रहरी, ३ पटक नागरिक सुनुवाई र चोरीसम्बन्धि सचेतना १० पटक सञ्चालन गरिएको थियो ।

ट्राफिक सचेतनातर्फ १६२ पटक सचेतनामूलक कार्यक्रम गरिएको थियो । जसमा (लेन अनुशासन, जेब्रा क्रसिङ, ट्राफिक लाइट) कार्यक्रम सञ्चालन गरीएको थियो ।

जिल्ला प्रहरी बाँकेको आन्तरिक सुदृढीकरण प्रयास अन्तर्गत मंसिर महिनामा जिल्ला ट्राफिक प्रहरी कार्यालय कोहलपुर उत्कृष्ट प्रहरी इकाई घोषणा गरिएको छ भने जिल्ला प्रहरी कार्यालय बाँकेको बाटो मर्मत, रङरोगन तथा कार्यालय परिसर मर्मत तथा सौन्दर्यकरण गरी सेवाग्राहीमैत्री वातावरण तयार पारिएको जिल्ला प्रहरी बाँकेले जानकारी दिएको छ ।

प्रकाशित मिति: मंगलबार, पुस २, २०८१ २१:००

प्रतिक्रिया दिनुहोस्