थारुहरुको ऐतिहासिकता जोडिएको सुकौरामा थारु संग्रहालय बनाउन लागिपर्छुः गिरी

राजनीति

गृहपृष्ठ
राजनीति
थारुहरुको ऐतिहासिकता जोडिएको सुकौरामा थारु संग्रहालय बनाउन लागिपर्छुः गिरी

थारुहरुको ऐतिहासिकता जोडिएको सुकौरामा थारु संग्रहालय बनाउन लागिपर्छुः गिरी

शुक्रबार, फागुन ८, २०८२ बागेश्वरी पोस्ट

तुलसीपुर । दाङ क्षेत्र नम्बर ३ का नेपाली कांग्रेसका उम्मेदवार दीपक गिरीले थारुहरुको ऐतिहासिकता जोडिएको सुकौरामा थारु संग्रहालय बनाउन लागिपर्ने बताएका छन् । चुनावी सभाका क्रममा शुक्रबार साँझ तुलसीपुर ११ सुकौरा पुगेका गिरीले थारु जातिको संस्कार र संस्कृति जोगाउन आवश्यक रहेकोमा जोड दिँदै दंगीशरण राजाको ऐतिहासिक दरबार रहेको क्षेत्र सुकौरामा थारु संग्रहालय बनाउन लागिपर्ने बताए । उनले थारुको संस्कृतिभित्र बैज्ञानिकता रहेको बताउँदै थारु संस्कृति जगेर्ना गर्न आफू प्रतिबद्ध रहेको उल्लेख गरे । आफूले सधैं किसानको हितमा काम गर्दै आएको स्मरण गराउँदै उनले सिंचाई सहजताका लागि डिप बोरिङ्ग बनाउने प्रतिबद्धता समेत बताए । रुख चिन्हमा मतदान गरेर आफूलाई जिताउन उनले आग्रह गरे ।

प्रदेश सांसद एवम् पूर्व मुख्यमन्त्री डिल्ली बहादुर चौधरीले देशमा विकसित विषम् परिस्थितिका कारण गिरीले आफ्नो कार्यकाल पूरा गर्न नपाएकोले अपूरा काम पूरा गर्न फेरि जिताएर पठाउन आग्रह गरे । उलने पनि थारुको पुर्खाको इतिहास सुकौराबाट सुरु भएको भन्दै प्रदेश सरकारबाट पनि संग्रहालय बनाउन बजेट विनियोजनका लागि भूमिका खेल्ने बताए । दंगीशरण राजाको दरबार भएको सुकौरा गाउँलाई होमस्टेमार्फत संस्कृति संरक्षणमा जोड्ने आफ्नो योजना रहेको सुनाउँदै उनले होमस्टे स्थानीय कला संस्कृतिको प्रचारप्रसार र आयअर्जनको माध्यम बन्ने बताए ।

उनले थारुले बनाउने जाँड रक्सीको ब्राण्डिंग र बजारीकरणका लागि लुम्बिनी प्रदेश सरकार कानुन निर्माणको चरणमा रहेको जानकारी दिँदै यसले थारुहरुको आर्थिक प्रगतिमा टेवा पुग्ने बताए । शुक्रबार साँझ नै तुलसीपुर ११ कटाहाँ पुगेका कांग्रेस उम्मेदवार गिरीले त्यस क्षेत्रमा यस अघि एउटा डिप बोरिंग जडान गरिदिएको जानकारी गराउँदै थप बोरिंगका लागि पनि काम गर्ने प्रतिबद्धता जनाउँदै थारु जातिको विकास र उत्थानका लागि आफू क्रियाशील रहँदै आएको बताए । त्यहाँ पूर्व मुख्यमन्त्री चौधरीले पनि बोलेका थिए । उनले विकास र समृद्धिका लागि गिरीलाई जिताउन आग्रह गरे । तुलसीपुर ११ का वडा सभापति हेमराज ओलीको अध्यक्षतामा कार्यक्रम सम्पन्न भएको थियो । कटाहाँमा स्थानीय जनकलाल चौधरीले गाउँका आवश्यकता र अपेक्षाबारे जानकारी गराएका थिए ।

प्रकाशित मिति: शुक्रबार, फागुन ८, २०८२ २२:२१

प्रतिक्रिया दिनुहोस्