कांग्रेस उपसभापतिमा उम्मेदवारी दिने दीपक गिरीको घोषणा

राजनीति

गृहपृष्ठ
राजनीति
कांग्रेस उपसभापतिमा उम्मेदवारी दिने दीपक गिरीको घोषणा

कांग्रेस उपसभापतिमा उम्मेदवारी दिने दीपक गिरीको घोषणा

आइतबार, असोज १८, २०८३ बागेश्वरी पोस्ट

नेपालगञ्ज । नेपाली कांग्रेसका प्रभावशाली नेता दीपक गिरीले पार्टीको १५औँ महाधिवेशनमा उपसभापति पदमा उम्मेदवारी दिने घोषणा गरेका छन् ।

उम्मेदवारी घोषणा गर्दै गिरीले अनुभवी नेतृत्वको मार्गदर्शन र युवाशक्तिको ऊर्जा एवं सहभागितालाई सँगसँगै अघि बढाएर पार्टीलाई नयाँ गति दिने बताए । उनले अनुभव र युवाबीचको सहकार्यबाट संगठनलाई थप बलियो, एकताबद्ध र जनमुखी बनाउने आफ्नो प्राथमिकता रहेको स्पष्ट पारे ।

लामो राजनीतिक यात्राका क्रममा नेपाली कांग्रेसका विभिन्न चुनौती, आन्दोलन तथा संगठन निर्माणका अभियानमा निरन्तर सहभागी हुँदै आएको उल्लेख गर्दै गिरीले आफ्नो राजनीतिक अनुभव, संघर्ष र पार्टीप्रतिको निष्ठालाई आगामी नेतृत्वमा उपयोग गर्ने प्रतिबद्धता व्यक्त गरे ।

उनले समयानुकूल संगठन सुदृढ गर्दै कार्यकर्तामैत्री, जनमुखी र प्रभावकारी कांग्रेस निर्माणका लागि आफ्नो उम्मेदवारी रहेको बताए ।

“अनुभवी नेतृत्वको मार्गदर्शन र युवाशक्तिको ऊर्जा एवं सहभागितालाई साथमा लिएर पार्टीलाई नयाँ गति दिन चाहन्छु,” गिरीले भने, “अनुभव र युवाबीचको सहकार्यबाट संगठनलाई थप बलियो बनाउँदै नेपाली कांग्रेसको आगामी यात्रामा जिम्मेवार भूमिका निर्वाह गर्ने मेरो प्रतिबद्धता छ ।”

गिरीले पार्टीभित्रको एकता, पुस्ताबीचको सहकार्य र संगठनको सुदृढीकरणलाई आफ्नो उम्मेदवारीको मुख्य आधारका रूपमा अघि सारेका छन् ।

दाङका गिरी नेपाली कांग्रेसको १४औँ महाधिवेशनबाट केन्द्रीय सदस्यमा निर्वाचित भएका थिए । पार्टी संगठन तथा राजनीतिक गतिविधिमा लामो समयदेखि सक्रिय गिरीले यसपटक उपसभापति पदमा उम्मेदवारी घोषणा गरेका हुन् ।

प्रकाशित मिति: आइतबार, असोज १८, २०८३ ०८:२२

प्रतिक्रिया दिनुहोस्