बदनाम गराउन आफू विरुद्ध मुद्दा दायर गरिएको कमरुद्दिन राईको स्पष्टोक्ति

स्थानीय

गृहपृष्ठ
स्थानीय
बदनाम गराउन आफू विरुद्ध मुद्दा दायर गरिएको कमरुद्दिन राईको स्पष्टोक्ति

बदनाम गराउन आफू विरुद्ध मुद्दा दायर गरिएको कमरुद्दिन राईको स्पष्टोक्ति

बिहीबार, चैत २, २०७९ बागेश्वरी पोस्ट

नेपालगन्ज । नेपालगन्ज उपमहानगरपालिकाका उपप्रमुख कमरुद्दिन राईले आफ्नो बदनाम गराउन पूर्व मन्त्री सर्वदेवप्रसाद ओझाले सर्वोच्च अदालतमा मुद्दा दायर गरेको बताएका छन् । उनले बुधवार पत्रकारमाझ यस्तो बताएका हुन् । मनिषा एग्री कन्सर्नका संचालक ओझाले ०६२ सालमा देवानसिंह चौधरी, अर्जुन उप्रती, आसिफ रियाज खान र कमरुद्धिन राई विरुद्ध बाँके जिल्ला अदालतमा ठगी तथा कागजात किर्ते मुद्दा दायर गरेका थिए । उक्त मुद्दामा प्रतिवादी सवैलाई बाँके जिल्ला अदालतले सफाई दिएको थियो । त्यसपछि उनी पुनरावेदनका लागि नेपालगन्जस्थित तत्कालेवन पुनरावेदन अदालत गए । उक्त मुद्दामा पनि प्रतिवादीहरुले सफाई पाएको उपप्रमुख राईले स्पष्ट पारे ।

जिल्ला र पुनरावेदन अदालतले सफाई दिएपछि अन्तिम सुनुवाईका लागि ओझा सर्वोच्च अदालत पुगे । अहिले उक्त मुद्दा विचाराधीन छ । ‘सर्वोच्च अदालतमा मुद्दा चलिरहेकै बेला ओझाजीले अर्को मुद्दा दर्ता गराएको भन्ने सामाजिक संजालबाट थाहा पाएँ,’ उनले भने, ‘अहिलेसम्म मलाई आधिकारिक पत्र वा जानकारी आएको छैन । आधिकारिक पत्र आए प्रहरी र अदालतमा हाजिर हुन तयार छु । म लुकेर बस्दैन । सम्मानित अदालतको फैसलालाई शिरोधार्य गरी अगाडि बढ्ने छु ।

’उनले २०६२ सालमा भएको घटनालाई लिएर अहिले उजुरी दिनु अशोभनीय भएको बताए । कानून बन्नु अघिको घटनालाई १० वर्षपछि बनेको कानूनमा टेकेर मुद्दा दायर गर्न नमिल्ने बताउँदै उनले यसको खुलेर प्रतिवाद गर्ने स्पष्ट पारे । ‘उहाँ (ओझाजी) ले चुनावमा पनि मलाई हराउन ठूलो प्रयास गर्नुभयो, तर सक्नु भएन । अब मुद्दा हालेर मेरो बदनाम गर्न खोज्दै हुनुहुन्छ,’ उपप्रमुख राईले भने, ‘बदनियतपूर्ण ढंगले हालिएको मुद्दामा उहाँ सफल हुनुहुन्न भन्नेमा म ढुक्क छु । दुई ओटा सम्मानित अदालतले सफाई दिइसकेछ । सर्वोच्चले पनि सफाई दिनेमा दुई मत छैन ।’

उनले आफूले अहिलेसम्म कुनै सरकारी कार्यालयमा झुठा कागजात तथा बयान नदिएको जिकिर गरे । उनले ठगी र कागजात किर्ते मुद्धामा चार जना विरुद्ध मुद्दा दायर भए पनि सार्वजनिक न्याय विरुद्धको कसुरमा आफू विरुद्ध मात्र मुद्दा दायर भएको बताए । ‘सार्वजनिक न्याय विरुद्धको कसुरमा पनि चार जना विरुद्ध मुद्दा दायर हुनु पथ्र्यो, तर ओझाजीले म विरुद्ध मात्र उजुरी दिएको सुनेको छु । यो सत्य हो भने उहाँको नियतमाथि खोट छ भन्ने स्पष्ट हुनेछ,’ राईले भने । मनिषा एग्री कन्सर्न नेपालगन्जको तर्फबाट ओझाले ठगी कसुरमा मुद्दा हालेका थिए । मनिषा एग्री कन्सर्न र भारतमा रहेको मनिषा एग्री बायो टेक कम्पनी प्रालि हैदराबाद बीच भएको सम्झौता अनुसार आयात हुने सामग्रीको भन्सार क्लीरिङ्गको जिम्मेवारी पाएका कमरुद्दिन विरुद्ध ठगीको मुद्दा परेको हो ।

२०६२ सालदेखि २०६९ सालसम्म कमरुद्दिनले भन्सार एजेन्टको रूपमा काम गर्ने क्रममा भन्सार, क्वारिन्टिन र अदालत समेतलाई भ्रममा पारेको आरोप ओझाले लगाएका छन् । उनले अनुसन्धानको क्रममा कमरुद्दिन राईको नागरिकता र अन्य कागजातमा बाबुको नाम फरक भएको पुष्टि भएको दाबी गरेका छन् । नागरिकतामा बाबुको नाम गोवरे कवडिया छ भने भारतबाट पैठारी गर्ने मनिषा एग्री बायो टेक कम्पनी प्रालिको कागजातमा अकबर अलि उल्लेख भएको दावी ओझाले गरेका छन् । तर, उपप्रमुख कमरुद्दिन राईले आफूले बाबुको नाम र ठेगाना फरक नराखेको दावी गर्दै आएका छन् ।

प्रकाशित मिति: बिहीबार, चैत २, २०७९, १३:१४:००

प्रतिक्रिया दिनुहोस्