जब रामकृष्णले लिलबहादुरले पठाएको सहयोग सामग्री पाए...

स्थानीय

गृहपृष्ठ
स्थानीय
जब रामकृष्णले लिलबहादुरले पठाएको सहयोग सामग्री पाए...

जब रामकृष्णले लिलबहादुरले पठाएको सहयोग सामग्री पाए...

आइतबार, मंसिर १७, २०८० बागेश्वरी पोस्ट

नेपालगन्ज । बाँकेको बैजनाथ गाउँपालिका वडा नम्बर ७ पेडारीका रामकृष्ण थारुकी श्रीमती लालमोहनी लामो समयदेखि खुट्टाले हिंड्न नसक्ने भइसकेकी थिइन् । घर बनाउने मिस्त्री सीपले अर्थोपार्जन गर्दै आएका रामकृष्णले श्रीमती अपांग हुँदा पनि तीन छोरोछोरी र एक वृद्ध आमाको लालनपालन राम्रैसँग गरिरहेका थिए । ईट्टाको घर बनाउनका लागि जग हालिसकेका थिए । तर, करिब चार वर्ष अघि उनी पनि एक्कासी खुट्टा नचल्ने अवस्थामा पुगे । उपचारका लागि भारतको लखनउसम्म गए । तर, उपचार हुन सकेन । अहिले उनी आफूपनि सहारा नभइकन उठ्न समेत नसक्ने अवस्थामा छन् । श्रीमतीलाई त दिशापिसाब गराउन पनि सहारा चाहिने अवस्था छ । दुई छोरी र एक छोराका पिता रामकृष्णको उक्त परिवारलाई खाना पकाइदिन समेत रामकृष्णकी ७४ वर्षीया वृद्ध आमा बाहेक अर्को सदस्य छैन । जग हालेको घर अधुरै छ ।

श्रीमती हिँडडुल गर्न नसक्ने अवस्थामा परिवारको एक मात्र आधार रहेका रामकृष्ण आफैं अपांग बने यताको दिनचर्या उक्त परिवारका लागि दुसाध्य भइरहेको छ । रामकृष्णले वैशाखी समेत किन्न नसक्दा लौरोको भरमा खुट्टा सार्ने प्रयास गरिरहेका थिए । रामकृष्णको परिवारमा परेको कहरका विषयमा खबरगन्जले भिडियो सामग्री प्रकाशित गरेपछि खजुरा घर भई हाल अमेरिकामा रहेका लिलबहादुर थापाले खाद्यान्न, लत्ताकपडा र वैसाखी समेत उपलब्ध गराएका छन् ।

खबरगन्जको टिममार्फत उक्त सामग्री पाएपछि रामकृष्णको परिवारमा थोरै भएपनि खुसीयाली छाएको छ । लिलबहादुरले उपलब्ध गराएको न्यानो कपडा लगाएको सानो छोरालाई हेर्दै रामकृष्णले भने-'मसँग त छोराछोरीका लागि जाडोमा शरीर ढाक्ने कपडा किनिदिन समेत पैसा थिएन । यति सामग्री पाएपछि अहिलेलाई ठूलो राहत भएको छ । चामल पनि कम्तिमा ६ महिना त पुग्छ होला ।'

लिलबहादुरले रामकृष्णको परिवारका लागि करिब ४० हजार रुपैयाँ बराबरको सामग्री उपलब्ध गराएका हुन् । चामल, दाल, पीठो, नुन, तेल, चिउरा, परिवारका ६ जनाका लागि एक एक जोर न्यानो कपडा, तीन वटा सिरक र अन्य घरायसी सामग्रीहरु खबरगन्ज मिडियाका प्रबन्ध निर्देशक खगेन्द्र दाहालले रामकृष्णको परिवारलाई हस्तान्तरण गरे । आफूहरुले सहयोग आवश्यक रहेका व्यक्तिहरुलाई सहयोग जुटोस् भनेर गरिरहेको प्रयासमा लिलबहादुरले निरन्तररुपमा साथ दिँदै आएको भन्दै दाहालले आभार व्यक्त गरे ।

यस अघि पनि लिलबहादुरले खबरगन्जले प्रकाशित गरेको सामग्री हेरेर खजुराकै अन्य दुई परिवारलाई आवश्यक खाद्यान्न र लत्ताकपडा सहयोग गरिसकेका छन् । लिलबहादुरले अमेरिकामा श्रम गरेर गरेको कमाईबाट नेपालमा विपन्न र सहाराविहीनहरुलाई आवश्यक सामग्री सहयोग गर्नेदेखि आवास समेत बनाइदिँदै आएका छन् । रामकृष्णलाई सन्चारकर्मी विश्वास सुवेदीले पनि साथीभाईहरुमार्फत संकलित १० हजार रुपैयाँ हस्तान्तरण गरेका थिए । रामकृष्णले आफूले स्थानीय तहबाट भने कुनै पनि आडभरोसा नपाएको गुनासो गरेका छन् । अपांगताको परिचय पत्रका लागि चिकित्सकले 'क' वर्गको दिनु भनेर सिफारिस गर्दा पनि गाउँपालिकाले दिन नमानेको गुनासो उनको छ । उनले आफ्नो सम्भाव्य उपचारका लागि समेत सहयोगको अपेक्षा व्यक्त गरेका छन् ।

प्रकाशित मिति: आइतबार, मंसिर १७, २०८० १९:२०