स्थानीय तह निर्वाचन:बाँकेमा सुरक्षाकर्मीसहित ६ हजार बढी जनशक्ति परिचालन

स्थानीय

गृहपृष्ठ
स्थानीय
स्थानीय तह निर्वाचन:बाँकेमा सुरक्षाकर्मीसहित ६ हजार बढी जनशक्ति परिचालन

स्थानीय तह निर्वाचन:बाँकेमा सुरक्षाकर्मीसहित ६ हजार बढी जनशक्ति परिचालन

बुधबार, वैशाख २८, २०७९ बागेश्वरी पोस्ट

नेपालगन्ज । यही शुक्रबार अर्थात् बैशाख ३० गते हुने स्थानीय तहको निर्वाचनका लागि बाँकेमा रहेका १ सय ३६ मतदान केन्द्र र ३ सय ७९ मतदान स्थलका लागि सुरक्षाकर्मी, निजामती कर्मचारी र संस्थानका कर्मचारी गरी ६ हजार २ सय जनशक्ति परिचालन भएका छन् ।

बाँकेका प्रमुख जिल्ला अधिकारी सूर्यबहादुर खत्रीले दिएको जानकारी अनुसार निर्वाचनका लागि जिल्लाभरका ८ वटै पालिकामा निजामती कर्मचारी र संस्थानका कर्मचारी गरी २ हजार २ सय जना जनशक्ति परिचालन गरिएको छ ।

८ वटै पालिकामा स्थानीय तह निर्वाचनका लागि ४ हजार बढी नेपाली सेना, नेपाल प्रहरी, सशस्त्र प्रहरी र म्यादी प्रहरी परिचालन गरिएको प्रमुख जिल्ला अधिकारी खत्रीले जानकारी दिएका छन् ।

उनले बाँकेका १ सय ३६ मतदान केन्द्र मध्ये १ सय ६ मतदान केन्द्र अत्यन्तै संबेदनशील भएको र ३० मतदान केन्द्र संबेदनशील रहेको सुरक्षा विश्लेषण गरी त्यसै अनुरुप सुरक्षा प्रबन्ध मिलाइएको बताए । स्थानीय तह निर्वाचनको सुरक्षाको लागि नेपाली सेना, नेपाल प्रहरी, सशस्त्र प्रहरी र म्यादी प्रहरीको छुट्टछुट्टै सुरक्षा जिम्मेवारी रहेको प्रमुख जिल्ला अधिकारी खत्रीले बताए ।उनले भने–‘बाँके भारतसँग खुला सीमा जोडिएको जिल्ला भएकोले पनि यहाँको सुरक्षा संवेदनशिलतालाई ध्यानमा राखेर मतदान केन्द्रलाई अति संवेदनशील र संबेदनशीलको रुपमा बर्गीकरण गरी सुरक्षा प्रबन्ध मिलाएका छौं ।’ भारतसंग सीमा जोडिएका पालिकाको वडामा रहेका मतदान केन्द्रहरु अत्यन्तै संवेदनशील रहेको सुरक्षा विश्लेषण रहेको छ ।

उनले मतदान केन्द्रको सुरक्षा तीन प्रकारका सुरक्षा निकायले आपसी समन्वयमा गर्ने र शान्तिपूर्वक मतदान गराउन मतदान केन्द्रमा खटिएका मतदान अधिकृत, सहायक मतदान अधिकृत, कर्मचारी र स्वयंसेवकको भूमिका रहने गरी व्यवस्था मिलाइएको बताए । उनले मतदानमा खटिने मतदान अधिकृत, सहायक मतदान अधिकृत र कर्मचारीलाई आवश्यक तालिम दिएर पठाइएको बताए ।

उनले निर्वाचनलाई शान्तिपूर्वक सम्पन्न गराउनको लागि नेपाल–भारत सीमा ७२ घण्टाको लागि शील गर्ने दुई पक्षीय सहमति भएर बैशाख २७ गते राती १२ बजेदेखि ३० गते राती १२ बजेसम्म सीमा क्षेत्रबाट आवगमन पूर्ण रुपले बन्द गरिसकेको जानकारी दिए ।

प्रकाशित मिति: बुधबार, वैशाख २८, २०७९, १७:४९:००