चितवन-२ र तनहुँ-१ मा भारी मतान्तरले जितेको रास्वपाको बारा-२ मा जमानत जफत

राजनीति

गृहपृष्ठ
राजनीति
चितवन-२ र तनहुँ-१ मा भारी मतान्तरले जितेको रास्वपाको बारा-२ मा जमानत जफत

चितवन-२ र तनहुँ-१ मा भारी मतान्तरले जितेको रास्वपाको बारा-२ मा जमानत जफत

बुधबार, वैशाख १३, २०८० बागेश्वरी पोस्ट

नेपालगन्ज । वैशाख १० गते सम्पन्न भएको उपनिर्वाचनमा चितवन-२ र तनहुँ -१ मा भारी मतान्तरले जितेको राष्ट्रिय स्वतन्त्र पार्टी (रास्वपा) को बारा–२ मा जमानत जफत भएको छ ।

बारा-२ मा रास्वपाका उम्मेदवार रमेश खरेलको जमानत जफत भएको छ । त्यहाँ खरेलसहित ३१ उम्मेदवारको जमानत जफत भएको हो ।

बारा २ मा उपनिर्वाचनमा खसेको कुल सदर मतको १० प्रतिशत मत नल्याउने खरेलसहितका उम्मेदवारहरुको जमानत जफत भएको हो ।

बारा–२ का मुख्य निर्वाचन अधिकृत मुकेश उपाध्यायका अनुसार बारा- २ मा आज बिहान सम्पन्न भएको मतगणनाको अन्तिम परिणाममा ६९ हजार २२ मत खसेकोमा ६८ हजार १९२ मत सदर हुँदा खरेलले २ हजार ८ सय २९ मत मात्र पाएका छन् । खरेलले पाएको मत ४.१४ प्रतिशत रहेकाले उनको जमानत जफत भएको हो ।

त्यस्तै बारा-२ मा ३४ उम्मेदवारमध्ये ३ जनाले मात्र १० प्रतिशत मत कटाउन सफल भएका छन् । त्यहाँ सत्ता गठबन्धनको तर्फबाट जनता समाजवादी पार्टी (जसपा) का अध्यक्ष उपेन्द्र यादव २८ हजार ४१५ मतसहित निर्वाचित भइसकेका छन् ।

यादवका निकटतम् प्रतिद्वन्द्वी जनमत पार्टीका शिवचन्द्र कुशवाहाले २३ हजार ३३४ मत पाए भने नेकपा एमालेका पुरूषोत्तम पौडेलले १० हजार २१६ मत ल्याएका छन् ।

बारा-२ मा प्रभु शाहको आम जनता पार्टीबाट उम्मेदवार बनेका अरूणकुमार ज्ञवालीले २ हजार ७३८ मतमात्रै पाएका छन् । उनको पनि जमानत जफत भएको छ ।

त्यस्तै राष्ट्रिय प्रजातन्त्र पार्टी (राप्रपा) का उम्मेदवार सोनालाल प्रसाद तेली, नागरिक उन्मुक्ति पार्टीका कमरूल्लाह अन्सारी, नेमकिपाका मुक्ति प्रसाद यादवको पनि जमानत जफत भएको छ ।

त्यस्तै नेपाल संघीय समाजवादी पार्टीका नेजारूल अन्सारी, मंगोल नेशनल अर्गनाइजेसनका प्रमोदराम चमार र २४ स्वतन्त्र उम्मेदवारको जमानत जफत भएको छ । बारा-२ मा गत मंसिर ४ मा सम्पन्न निर्वाचनमा जसपाबाट निर्वाचित बनेका रामसहाय प्रसाद यादव उपराष्ट्रपतिमा निर्वाचित बनेपछि उपनिर्वाचन भएको थियो ।

प्रकाशित मिति: बुधबार, वैशाख १३, २०८०, १०:२०:००

प्रतिक्रिया दिनुहोस्