पोषण केसीको प्रतिबद्धताःआफ्नै कार्यालय भवन(प्रतिबद्धता-पत्रसहित)

राजनीति

गृहपृष्ठ
राजनीति
पोषण केसीको प्रतिबद्धताःआफ्नै कार्यालय भवन(प्रतिबद्धता-पत्रसहित)

पोषण केसीको प्रतिबद्धताःआफ्नै कार्यालय भवन(प्रतिबद्धता-पत्रसहित)

बुधबार, मंसिर ८, २०७८ बागेश्वरी पोस्ट

नेपालगञ्ज । नेपाली काँग्रेस बाँके क्षेत्र नम्बर १ का सभापतिका उम्मेदवार पोषण केसीले २० बुँदे प्रतिबद्धता पत्र सार्वजनिक गरेका छन् । उनले पार्टीको क्षेत्रीय कार्यालय भवन आफ्नै कार्यकालमा निर्माण सम्पन्न गरी संचालनमा ल्याउने पहिलो प्रतिबद्धता गरेका छन् । क्षेत्र नम्बर १ को पार्टी भवन नहुँदा अहिलेसम्म कोहलपुर नगर समितिको कार्यालयबाट क्षेत्रीय कार्यालय संचालन हुँदै आएको छ । युवा नेता केसीले आफू नेतृत्वको प्यानल विजयी भए कार्यालय र सचिवालयका हरेक क्रियाकलाप चुस्त दुरुस्त राख्ने र पारदर्शी ढंगबाट संचालनमा ल्याइने प्रतिबद्धता गरेका छन् । नवीन र सुदृढ काँग्रेस बनाउन गुट उपगुट एवं अस्वस्थ प्रतिष्पर्धा अन्त्य गर्दै भाइचारा, एकता र सहअस्तित्वलाई स्वीकारी आम कार्यकर्ताको उत्साहलाई बढोतरी गर्ने प्रतिबद्धता गरिएको छ ।

यस्तो छ केसीको प्रतिबद्धता पत्र(जस्ताको तस्तै)

व्यक्तिबादी चरित्र र अतिवादको अन्त्य आजको आवश्यकताः सृदृढ, संस्कारी र गतिशील 'एकतावद्ध कांग्रेस’ बनाउने मेरो प्रतिबद्धता’

नेपाली काँग्रेस पार्टी देशको सबैभन्दा ठूलो प्रजातान्त्रिक पार्टी हो । यसको सदस्यता प्राप्त गर्नु र वीपी कोइरालाको समाजवादको अनुयायी हुन पाउनु हरेक सदस्यका लागि गर्वको विषय हो । संघर्षपूर्ण गौरवमय इतिहास बोकेको पार्टीको १४औं महाधिवेशनले देशभर पर्व झैं उल्लासमय वातावरण तयार भएको छ । व्यक्तिको पार्टी प्रतिको योगदान र आम कार्यकर्ताको चाहना बजोजिम नेतृत्व वहन गर्न सक्ने क्षमता भएका नेतृत्वबाट विभिन्न पदमा उम्मेदवारी घोषणा गर्नु स्वभाविक नै हो ।

प्रजातन्त्रमा विश्वास गर्ने पार्टीलाई स्वच्छ एवम् स्वस्थ निर्वाचन यसको सुन्दर पक्ष मानिन्छ । सोही सौहार्दताको सिद्धान्त अवलम्वन गर्दै मैले पनि संघीय निर्वाचन क्षेत्र नम्बर १ को क्षेत्रीय सभापतिको रुपमा उम्मेदवारी दिएको छु । पार्टीमा परम्परागत शैली र सोचका आधारमा सदैब आफू नै पार्टी नेतृत्वमा रहिरहनु पर्छ भन्ने अतिबादी सोच रहेका ब्यक्तिलाई चुनौति दिँदै नयाँ सोच र बिचारका आधारमा परिवर्तनलाई आत्मसाथ गर्नका लागि मेरो उम्मेदवारी हो ।

म संघीय क्षेत्रीय सभापतिमा निर्वाचित भएपछि नवीन र सृदृढ कांग्रेस बनाउन दत्तचित्त भएर लाग्नेछु । अग्रजलाई सम्मान र नयाँ पुस्तालाई प्रोत्साहन गर्दै एकतावद्ध कांग्रेस बनाउन लाग्नेछु ।

मेरा चुनावी प्रतिबद्धता यसप्रकार रहेका छन्ः

१. पार्टीको क्षेत्रीय समितिको कार्यालय भवन आफ्नै कार्यकालमा निर्माण सम्पन्न गरी संचालनमा ल्याइनेछ ।

२. कार्यालय र सचिवालयका हरेक क्रियाकलाप चुस्त दुरूस्त राख्ने र पारदर्शी ढंगबाट संचालन गरिनेछ ।

३. आफ्नो क्षेत्रभित्र पार्टीको मजवुत संगठन निर्माणका लागि विचार बोकेका गतिशील बौद्धिक नेतृत्व उत्पादन एवम् क्रियाशील बनाइनेछ ।

४. आम कार्यकर्तामा सक्रियता एवम् उर्जा ल्याउन र समायानुकूल क्षमता अभिवृद्धि गर्न पार्टी प्रशिक्षण संचालन गरिनेछ ।

५. पार्टीभित्रको गुट उपगुट एवम् अस्वस्थ प्रतिष्पर्धालाई अन्त्य गर्दै भाइचारा, मेलमिलाप, एकता र सहअस्तित्वलाई स्विकारी कार्यकर्ताको उत्साहमा बढोत्तरी गरिनेछ ।

६. पार्टीका आकास्मिक कार्यक्रम बाहेक अरु सबै गतिविधि वार्षिक कार्यतालिका बनाएर गरिनेछ ।

७. पार्टीलाई नीति, विधि र पद्धतिमा संचालन गर्ने प्रणालीको विकास गरिनेछ ।

८. आम कार्यकर्ताको मनोवल उच्च राख्न र सदैव उत्साह ल्याउन जागरणका कार्यक्रम संचालन गरिनेछ ।

९. बदलिएको विज्ञान र प्रविधिको युगमा समानुकूल संचारमाध्यम मैत्री सूचना केन्द्रको व्यवस्थाका साथै पार्टीका क्रियाकलापलाई इन्टरनेट र वेवसाइट मार्फत् सुचनाको पहुंँच र विस्तार गरिनेछ ।

१०. नेपाल सरकारका तीन वटै तहमा संचालन हुने निर्वाचनमा पार्टीका उम्मेदवारलाई विजयी बनाउन आफ्नो क्षेत्रीय समिति तथा मातहतका सम्पूर्ण कमिटीलाई सक्रिय गराइनेछ ।

११. भातृ संगठन साथै शुभेच्छुक संघसंस्थाको समकक्षी नेतृत्वसँग नियमितरुपमा छलफल, परामर्श, संचालन गरी सहकार्य गर्दै सबै नेतृत्वलाई सक्रिय बनाइनेछ ।

१२. पार्टी कार्यालयलाई व्यवस्थित बनाई सम्पूर्ण अभिलेखीकरण डिजिटलाइज गरिनेछ ।

१३. कामको आधारमा सम्मानको मूल मर्मलाई आत्मसाथ गर्दै समय समयमा सम्मानका कार्यक्रमहरु आयोजना गरिनेछ ।

१४. कार्यसमितिभित्र क्षमताका आधारमा कार्य विभाजन गरी जिम्मेवारी प्रदान गरी प्रभावकारी कार्यसम्पादन गरिनेछ ।

१४. पार्टीका विभिन्न आन्दोलनका क्रममा ज्यान गुमाएका सम्मानित शहिद परिवारहरुप्रति आवश्यक सहयोग एवम् सम्मान र अपांगता भएका, घाइते र दुःख पाएका परिवारजनप्रति नेतृत्व जिम्मेवारी एवम् अभिलेखीकरण गराइनेछ ।

१५. क्रियाशील सदस्यहरुलाई प्रशिक्षण तथा अभिमुखीकरणको व्यवस्था मिलाइनेछ ।

१७. पार्टीका संघीय, प्रदेश, जिल्ला स्तरीय निर्देशनलाई सक्रियता पूर्वक पालना गरिनेछ ।

१८. क्षेत्रभित्रका आम नागरिकको जनजिविकाको सवालमा चासो राखी उनीहरुका समस्या समाधानका लागि आवश्यक कदम लिइनेछ ।

१९. क्षेत्रभित्रका विकासका पूर्वाधारको अवस्थाको सुक्ष्म अध्ययन गरी स्थानीय सरकारसँग विकासका लागि समन्वय गरिनेछ ।

२०. पार्टीभित्र आात्मसम्मान र स्वाभिमानको अवस्था सृजना गरी आफ्नो क्षेत्रभित्र एकरुपता र एक ढिक्काले पार्टीको अवस्थालाई मजवुत बनाउन नीति, विधि र पद्धतिलाई पूर्णरुपमा कार्यान्वयनमा लगिनेछ ।

No description available.