उदयपुरमा स्करपियो दुर्घटना, ५ जनाको मृत्यु

सुरक्षा-अपराध

गृहपृष्ठ
सुरक्षा-अपराध
उदयपुरमा स्करपियो दुर्घटना, ५ जनाको मृत्यु

उदयपुरमा स्करपियो दुर्घटना, ५ जनाको मृत्यु

आइतबार, कात्तिक २, २०७७ बागेश्वरी पोस्ट

विराटनगर । उदयपुरको कटारी नगरपालिका–१४ भदौरेमा भएको सवारी दुर्घटनामा पाँच जनाको घटनास्थलमै मृत्यु भएको छ। तीन जना गम्भीर घाइते भएका छन्।

शनिबार राति भैरहवाबाट ओखलढुंगातर्फ जाँदै गरेको बा २० च ७१७१ नम्बरको स्करपियो दुर्घटनामा परेको प्रदेश १ ट्राफिक प्रहरी प्रमुख एसपी सञ्जीव शर्मा दासले जानकारी दिए।

मृतकमध्ये दुई जनाको पहिचान खुलेको छ। तीन जनाको पहिचान खुल्न बाँकी रहेको एसपी दासले बताए। उनका अनुसार दुर्घटनामा परेर ओखलढुंगा मानेभञ्ज्याङ–९ का ३० वर्षीय रामबहादुर सार्की र २६ वर्षीय कर्णबहादुर सार्कीको घटनास्थलमै मृत्यु भएको छ। यस्तै करिव ३२ वर्षका पुरुष, ३५ वर्षका जस्ता देखिने पुरुष र अर्की ३० वर्ष जस्तो देखिने महिलाको पहिचान भइ नसकेको उनले बताए । पहिचान नखुलेका उनीहरूको पनि घटनास्थलमै मृत्यु भएको हो ।

ट्राफिक प्रहरीले राति १२ बजेतिर ब्रेक फेल भएर जिप दुर्घटनामा परेको हुनसक्ने अनुमान गरेको छ। गाडी सडकबाट करिब नौ सय मिटर तल खसेको थियो।

दुर्घटनामा परेर ओखलढुंगाको मानेभञ्याङ–९ की २८ वर्षीय कुमारी सार्की, २२ वर्षीया कल्पना सार्की र स्कोरपिओ चालक रुपन्देही मधुवलिया–४ का २८ वर्षीय पनव खड्का गम्भीर घाइते भएका छन्।

घाइतेहरुको कटारी अस्पतालमा उपचार भइरहेको प्रहरीले जनाएको छ।

प्रकाशित मिति: आइतबार, कात्तिक २, २०७७ ०८:१२