पल शाहविरुद्ध १२ बर्ष कैद दाबीसहित तनहुँ जिल्ला अदालतमा मुद्दा दर्ता

सुरक्षा-अपराध

गृहपृष्ठ
सुरक्षा-अपराध
पल शाहविरुद्ध १२ बर्ष कैद दाबीसहित तनहुँ जिल्ला अदालतमा मुद्दा दर्ता

पल शाहविरुद्ध १२ बर्ष कैद दाबीसहित तनहुँ जिल्ला अदालतमा मुद्दा दर्ता

मंगलबार, चैत ८, २०७८ बागेश्वरी पोस्ट

नेपालगन्ज । नायक पल शाहविरुद्ध सरकारी वकिलको कार्यालयले आज तनहुँ जिल्ला अदालतमा मुद्दा दर्ता गरेको छ । नाबालिगलाई जबरजस्ती करणी गरेको अभियोगमा तनहुँ प्रहरीको थुनामा रहेका नायक पल शाहको जिल्ला प्रहरी कार्यालय तनहुँले अनुसन्धान सकेर रायसहितको प्रतिवेदन सोमबार सरकारी वकिलको कार्यालयलाई बुझाएको थियो ।

जिल्ला न्यायाधिवक्ता रामचन्द्र शर्माले शाहविरुद्ध कैद सजाय मागसहित मुद्दा दर्ता गरिएको जानकारी दिए । उनका अनुसार शाहविरुद्ध १२ देखि १४ वर्षसम्म कैद सजाय माग गरिएको छ । “पीडित १६ वर्ष कम भएका कारण शाहविरुद्ध १२ देखि १४ वर्षसम्म कैद दाबीसहित मुद्दा दर्ता गरेका छौँ”, उनले भने, “साथै मनासिब क्षतिपूर्तिको माग दावी गरेका छौँ ।”

नायक शाहका म्यानेजर भनिएका कृष्ण जोशीविरुद्ध सो सजायको आधा सजाय माग गरिएको पनि उनले बताए । जोशीलाई मतियारका रूपमा शाहको भन्दा आधा सजाय माग दावी गरिएको उनले जानकारी दिए ।

गत फागुन ११ गते नाबालिगकले शाहविरुद्ध जबरजस्ती करणीको जाहेरी दर्ता गरेपछि शाहले फागुन १५ गते प्रहरीमा आत्मसमर्पण गरेका थिए। सोही दिन प्रहरीले शाहविरुद्ध सात, २१ गते १२ र चैत ४ गते पाँच दिनको म्याद थप गरेको थियो ।

शाहविरुद्ध जिल्ला अदालत नवलपुरमा मुद्दा दर्ता भइसकेको छ । शाहविरुद्ध नवलपुरमा मुलुकी अपराध संहिता २०७४ को दफा २१९ को १ र २ अनुसारको कसुर गरेको दावी गर्दै मुद्दा दायर भएको थियो ।

कानुनको उक्त दफामा महिलाको मन्जुरी नलिई करणी गरेमा बलात्कार हुने र १८ वर्षभन्दा कम उमेरकी महिलासँग मञ्जुरीमै करणी गरे पनि बलात्कार हुने उल्लेख छ ।

नवलपरासी पूर्वको एक रिसोर्टमा २०७७ चैत ७ गते आफूमाथि बलात्कार भएको दावी गर्दै किशोरीले जाहेरी दिएकी थिइन् । त्यसपछि शाहलाई नवलपरासी पूर्वमा पनि झिकाएर प्रहरीले बयान लिएको थियो ।

प्रकाशित मिति: मंगलबार, चैत ८, २०७८ १६:३७