छैठौं धारा नेपालगन्ज म्याराथनको तयारी पूरा

खेलकुद

गृहपृष्ठ
खेलकुद
छैठौं धारा नेपालगन्ज म्याराथनको तयारी पूरा

छैठौं धारा नेपालगन्ज म्याराथनको तयारी पूरा

बिहीबार, मंसिर ४, २०७७ बागेश्वरी पोस्ट

नेपालगञ्ज । मंसिर ६ गते हुने छैठौं धारा नेपालगञ्ज म्याराथनको सम्पूर्ण तयारी पूरा भएको छ । आयोजक क्रियटिभ ह्याण्ड्सले आज नेपालगन्जमा पत्रकार सम्मेलन गरेर सम्पूर्ण तयारी पूरा भएको जनाएको हो । स्वास्थ्य सुरक्षाका मापदण्ड अपनाई प्रतियोगिता संचालन गरिने आयोजकले जनाएको छ । पुरुष म्याराथनमा २० भन्दा बढी खेलाडीले प्रतिष्पर्धा गर्न लागेको क्रियटिभ ह्याण्ड्सका अध्यक्ष टिएस ठकुरीले बताउनुभयो । त्यस्तै महिलातर्फ पनि १० जना बढीले सहभागिता जनाउनेछन् । कोरोनाका कारण ठूलो जमघट गर्ने अवस्था नरहेकाले यसपटक इभेन्ट घटाइएको ठकुरीले जानकारी दिनुभयो । यो पटक पुरुष खुल्लातर्फ म्याराथन, महिलाको हाफ म्याराथन र ३ किलोमिटरको कर्पोरेट रन समावेश गरिएको छ । नेपालगन्जको विपी चोकदेखि सुरु भएर कोहलपुर चौराहा अगाडि पुगेर पुनः विपी चोकमा पुगी म्याराथन टुंगिनेछ । यसपटक म्याराथन विजेताले ७५ हजार, दोस्रोले ३० हजार र तेस्रोले २० हजार रुपैयाँ पाउनेछन् । त्यस्तै चौथोले १०, पाँचौले ८, छैठौंले ७, सातौंले ६ र आठौं हुनेले ५ हजार रुपैयाँ पाउनेछन् । महिला हाफ म्याराथन विजेताले ३० हजार, दोस्रोले १५ हजार र तेस्रोले १० हजार रुपैयाँ पाउनेछन् । त्यस्तै चौथोले ७, पाँचौले ६ र छैठौंले ५ हजार रुपैयाँ पाउनेछन् । म्याराथन जित्ने खेलाडी जापानमा सन् २०२१ मा हुने ओलम्पिकमा सहभागी हुन पाउने आयोजकले जनाएको छ । नेपालगञ्ज म्याराथनको पहिलो संस्करणमा नेपाली सेनाका होमलाल श्रेष्ठ, दोस्रोमा सेनाकै कृष्ण बस्नेत, तेस्रोमा जुम्लाका दुर्ग बुढा, चौथो संस्करणमा नेपाल पुलिस क्लबका भुमिराज राई र सेनाका नवराज साउद विजेता भएका थिए । त्यस्तै महिला हाफ म्याराथनमा नेपालकी नम्बर एक धाविका कान्छीमाया कोजु दुई संस्करणमा विजेता भइन् । गत संस्करणमा सेनाकी पूर्णलक्ष्मी न्यौपाने प्रथम भएकी थिइन् । पत्रकार सम्मेलनमा खेलाडीले लगाउने टि-सर्ट पनि सार्वजनिक गरिएको छ ।

प्रकाशित मिति: बिहीबार, मंसिर ४, २०७७ १९:३६

प्रतिक्रिया दिनुहोस्