पीएनजीले यूएईलाई हरायो, नेपाललाई फाइदा

खेलकुद

गृहपृष्ठ
खेलकुद
पीएनजीले यूएईलाई हरायो, नेपाललाई फाइदा

पीएनजीले यूएईलाई हरायो, नेपाललाई फाइदा

शुक्रबार, फागुन २६, २०७९ बागेश्वरी पोस्ट

नेपालगन्ज । आईसीसी लिग २ को अन्तिम त्रिकोणात्मक क्रिकेट श्रृंखला अन्तर्गतको पहिलो खेलमा आज पपुवा न्यूगिनी (पीएनज) सँग युनाइटेड अरब इमिरेट्स( यूएई ) पराजित भएको छ ।

यो खेलमा पीएनजीसँग पराजित भएसँगै यूएई सिधै विश्वकप छनोट खेल्नबाट बन्चित बनेको छ । अब विश्वकप छनोटका लागि यूएईले प्लेअफ खेल्नु पर्नेछ ।

कीर्तिपुरस्थित त्रिभुवन विश्वविद्यालयको मैदानमा भएको खेलमा पीएनजी ५६ रनले विजयी भयो । पीएनजीले दिएको २ सय ४७ रनको लक्ष्य पछ्याएको यूएईले ४२ ओभर २ बलमा मात्र १ सय ९० रनमा अलआउट भयो ।

त्यसअघि पहिले ब्याटिङ गरेको पीएनजीले ५० ओभरमा ९ विकेट गुमाएर २ सय ४६ रन बनाएको हो ।

नेपाललाई विश्वकप छनोट खेल्ने सबैभन्दा ठूलो अवसर छ । घरेलु मैदान र घरेलु दर्शकको साथले गर्दा बलियो देखिएको नेपालले सबै चार खेल जित्ने हो भने विश्वकप छनोट खेल्नेछ । १२ औं खेलाडीका रुपमा दर्शकलाई लिने गरिन्छ । र, एसोसिएट राष्ट्रमा सबैभन्दा बढी दर्शक भएको देश नेपाल नै हो । नेपाललाई यो भन्दा बढी अवसर कुनै पनि हुनै सक्दैन ।

यूएईलाई भने निकै नै कठिनाई भएको छ । यूएई पीएनजीसँग पराजित भएसँगै विश्वकप छनोट सिधै खेल्ने अवसर त गुमाएको छ नै अब कम्तीमा दुई खेल नजित्ने हो भने एक दिवसीय मान्यता पनि गुमाउने खतरा छ । त्यो पनि फराकिलो अन्तरले जित्नुपर्नेछ ।

यूएई पीएनजीसँग पराजित भएसँगै उसको मनोबल खस्किँदा त्यसको फाइदा नेपाललाई हुनेछ । नेपालले अब खेल्न बाँकी सबै खेल जित्ना साथ सिधै विश्वकप छनोट खेल्न पाउनेछ ।

सात राष्ट्रमध्ये पुछारका तीन टिम बाहेक सबैले आफ्नो सबै खेल खेलेका छन् । शीर्ष स्थानको स्कटल्याण्ड ३६ खेलबाट ५० अंकसहित च्याम्पियन बनिसकेको छ । ४४ अंकबाट दोस्रो स्थानको ओमान पनि विश्वकप छनोटमा सुरक्षित भैसकेको छ ।

तेस्रो स्थानको नामिबियाको ३९ अंक छ । चौथो स्थानको अमेरिकाको ३५ अंक छ ।

पाँचौं स्थानको नेपालको ३३ खेलबाट ३४ अंक छ । यूएईको ३३ खेलबाट ३१ अंक छ भने पीएनजीको ३४ खेलबाट ११ अंक छ ।

नेपालले अबका बाँकी तनि खेल जित्दा ४० अंक हुनेछ र तेस्रो स्थानमा रहेर जिम्बावेमा हुने छनोट खेल्नेछ । यदि मौसमका कारण कुनै एक खेलमा बराबरी गरी अंक बाँडेर बाँकी सबै खेल जित्यो भने रन रेटमा नामिबिया भन्दा माथि हुनुपर्नेछ । अन्यथा कुनै एक खेल हार्नासाथ विश्वकप छनोटमा सिधै खेल्ने अवसरबाट बाहिरिनेछ ।

त्यस्तै यूएईले पनि अबका बाँकी खेल जितेमात्रै एक दिवसीय मान्यता जोगाउने छ । यूएई सिधै विश्वकप छनोट खेल्न भने नपाउने भएको छ ।

शीर्ष पाँचमा रहने टिममात्र एक दिवसीयमा रहन पाउने भएकाले यूएई निकै दबाबमा छ । पुछारका दुई टिम बाहिरिने छन् । यसका लागि भने अब नेपालले एक खेल जितेमात्र पनि पुग्नेछ । नेपालले आइतबार यूएईसँग खेल्दैछ ।

प्रकाशित मिति: शुक्रबार, फागुन २६, २०७९ १७:४६