भैरहवामा एयर राइफल प्रतियोगिता सम्पन्न, खेल क्षेत्रमा राज्यले लगानी नगरेको गुनासो

खेलकुद

गृहपृष्ठ
खेलकुद
भैरहवामा एयर राइफल प्रतियोगिता सम्पन्न, खेल क्षेत्रमा राज्यले लगानी नगरेको गुनासो

भैरहवामा एयर राइफल प्रतियोगिता सम्पन्न, खेल क्षेत्रमा राज्यले लगानी नगरेको गुनासो

शनिबार, वैशाख २, २०८० बागेश्वरी पोस्ट

रुपन्देही । दोस्रो जिल्ला स्तरीय १० मिटर एयर राइफल खुल्ला सुटिङ प्रतियोगिता बैशाख १ गतेदेखि शुरु भएको प्रतियोगिता आज सम्पन्न भएको छ ।

रुपन्देही सुटिङ संघ, सिद्धार्थनगर रुपन्देहीको आयोजनामा भएको दुई दिने सुटिङ प्रतियोगितामा विभिन्न क्षेत्रबाट ६१ जनाले सहभागी जनाएका थिए । विभिन्न कलेज, स्कुल, आर्मी, शसस्त्र र उद्योगीबाट सहभागी जनाएको सुटिङ संघले जनाएको छ ।

रुपन्देहीका सहायक प्रमुख जिल्ला अधिकारी धुव्र कुँवरले शारिरीक, मानसिक क्षेत्रको विकास हुने र खेलले देशलाई चिनाउने भएकाले खेललाई जोगाउन आवश्यकता औंल्याए ।

रुपन्देही सुटिङ संघका प्रमुख सल्लाहकार विजयजंग राणाले आफूहरुको पहिलेदेखि नै पारिवारिक सुटिङ खेलमा लगाब भएकाले सोही खेललाई यस भन्दा अगाडि प्रथम प्रतियोगिता गरेको र पुन: उक्त खेललाई निरन्तरता दिने उद्देश्यले दोस्रो प्रतियोगिता सञ्चालन गरेको वताए । उनले भने, 'यसमा राइफल खरिद र बिग्रिएपछि मर्मत गर्नलाई समेत भारतमा लैजानुपर्ने बाध्यतामा कानूनी बाधा रहेकाले राज्यले यसमा ध्यान दिन जरुरी छ ।'

रुपन्देही जिल्ला खेलकुद विकास समितिका अध्यक्ष भुपेन्द्रबहादुर थापा क्षत्री (हरि) ले खेलकुद क्षेत्रमा सरकारले बजेट विनियोजन गर्ला र खेल क्षेत्रको विकास गरौंला भन्ने आशा नै मरिसकेको भन्दै यसअघि जिल्ला स्तरीय राष्ट्रपति रनिङ शिल्ड प्रतियोगिता लगायत खेल सञ्चालन गर्दा व्यक्तिगत पैसा लगानी गरेर खेल सम्पन्न गरेको जनाए ।

नेपाल सुटिङ संघका केन्द्रीय उपाध्यक्ष धुव्र रायमाझीले नेपाल सरकारले खेलकुद क्षेत्रलाई उपेक्षा गर्दै आएको बताउँदै खेलकुद क्षेत्रका सम्बन्धित निकयहरुले पनि खासै चासो नदिएको गुनासो गरे । उनले खेलकुदका धेरै विधाहरु नखेलिएको भन्दै यसमा लगानी र खेलकुद स्थानको अभाव रहेको वताए । कार्यक्रममा रुपन्देही सुटिङ संघका ज्योति राणा, शसस्त्र प्रहरी बलका प्रमुख दीपक थापा, रुपन्देही प्रहरी प्रमुख भरत बहादुर विक लगायतले धारणा व्यक्त गरेका थिए ।

दुई दिनसम्म सञ्चालन भएको एयर राइफल सुटिङ प्रतियोगितामा छात्रतर्फ विनेश धोवी, १२८/२०० प्रथम, प्रतीक मल्ल १२०/२०० द्वितिय, प्रभुधन लोध ११७/२०० तृतिय भएका छन् । भने छात्रातर्फ चाँदनी पासी १५६/२०० प्रथम, रिमा थारु १६०/२०० द्वितिय, सन्ध्या पासी १४८/२०० तृतीय भएका छन् । प्रतियोगितामा प्रथम, द्वितिय र तृतीय भएका प्रतियोगीहरुलाई मेडल र प्रमाणपत्रले सम्मान गरिएको थियो ।

प्रकाशित मिति: शनिबार, वैशाख २, २०८० २०:२७