एसिसी प्रिमियर कप: नेपालले पहिलो खेलमै मलेसियालाई ६ विकेटले हरायो

खेलकुद

गृहपृष्ठ
खेलकुद
एसिसी प्रिमियर कप: नेपालले पहिलो खेलमै मलेसियालाई ६ विकेटले हरायो

एसिसी प्रिमियर कप: नेपालले पहिलो खेलमै मलेसियालाई ६ विकेटले हरायो

मंगलबार, वैशाख ५, २०८० बागेश्वरी पोस्ट

नेपालगन्ज । काठमाडौंमा आजदेखि सुरु भएको एसीसी मेन्स प्रिमियर कप क्रिकेट प्रतियोगितामा नेपालले पहिलो खेलमै विजयी बनेको छ । नेपालले आज भएको पहिलो खेलमा मलेसियामाथि उत्कृष्ट प्रदर्शन गरेको हो। नेपाल ६ विकेटले विजयी भयो ।

त्रिभुवन विश्वविद्यालयको कीर्तिपुर मैदानमा भएको खेलमा मलेसियाले दिएको २३६ रनको चुनौती नेपालले ३६.२ ओभरमै ४ विकेटको क्षतिमा पूरा गर्यो ।

नेपालका लागि भीम सार्कीले संयमित तथा कुशल मल्लले आक्रामक खेल खेले । भीमले ९८ बलमा ७१ रन जोडे । सो क्रममा उनले ५ चौका प्रहार गरे । कुशलले भने ४० बलमा अविजित रहँदै ५ छक्का र ५ चौकाको मद्धतले ७० रन जोडे ।

दिपेन्द्र सिंह ऐरीले ३ बलमा ५ रन बनाएर अविजित रहे । नेपालले १० रन अतिरिक्तका रुपमा पाएको थियो ।

यसअघि कप्तान रोहित पौडेलले ४३ बलमा ४२ तथा कुशल भुर्तेलले ३१ बलमा ३८ रन बनाए । आसिफ शेख भने १ रनमा आउट भए ।

मलेसियाको इनिङ्स

खेलमा टस जितेर पहिले ब्याटिङ गरेको मलेसियाले निर्धारित ५० ओभरमा ९ विकेट गुमाएर २३५ रन बनायो ।

मलेसियाले शुरुआतमा उत्कृष्ट ब्याटिङ गरेसँगै नेपाली बलरले सफलता हासिल गर्न सकेका थिएनन् । तर, पछिल्लो क्रममा भने ब्याट्सम्यानहरु टिक्न नसकेपछि मलेसिया २३५ रनमै समेटियो ।

मलेसियाका लागि कप्तान अहमद फैजले ७६ रन जोडे । विरनदीप सिंहले ४६ रन जोडे । दुवैबीच दोस्रो विकेटका लागि ११६ रनको साझेदारी भएको थियो ।

त्यस्तै खिजर हायातले २२ तथा सयाजरुल इद्रुसले १३ बलमा २१ रन बनाए । नेपालका लागि सोमपाल कामी र सन्दीप लामिछानेले ३–३ विकेट लिए ।

त्यस्तै ललित राजवंशीले २ तथा गुल्सन झाले १ विकेट लिए ।

नेपाली टिममा अनुभवी खेलाडीहरु ज्ञानेन्द्र मल्ल र करण केसी बेन्चमा रहे ।

सो खेलको समूह ‘ए’ मा नेपाल, ओमान, कतार, मलेसिया र साउदी अरेबिया रहेका छन् । समूह ‘बी’ मा यूएई, हङकङ, कुवेत, सिंगापुर र बहराइन रहेका छन् ।

समूह बी को खेलमा हङकङले सिंगापुरलाई ८ विकेटले हराएको छ । यो खेल मूलपानीको मैदानमा भएको हो । विजयका लागि हङकङले १७५ रनको चुनौती पछ्याएकामा ३३ ओभरमै २ विकेट गुमाएर पूरा गर्यो । बाबर हायातले ९२ बलमा अविजित रहँदै १०८ रन बनाए ।

खेलमा टस हारेर सिंगापुरले पहिले ब्याटिङ गर्दै ४२।१ ओभरमा सबै विकेट गुमाएर १७४ रनमात्र बनायो ।

नेपालले दोस्रो खेल ओमानसँग बैशाख ८ मा खेल्नेछ । मूलपानी मैदानमा साउदी अरेबियासँग तेस्रो खेल बैशाख ११ गते खेल्ने नेपालले अन्तिम खेल बैशाख १४ गते कतारसँग खेल्नेछ।

पहिलो पटक मूलपानी क्रिकेट मैदानले यो स्तरको अन्तर्राष्ट्रिय खेल खेलाउने अवसर पाएको छ ।

सो खेलको सेमिफाइनल बैशाख १६ गते र फाइनल बैशाख १८ गते हुनेछ । प्रतियोगिताको विजेता टिम आगामी सेप्टेम्बरमा हुने एसिया कपका लागि छनोट हुनेछ ।

भारत र पाकिस्तानसँग खेल्ने नेपालको लक्ष्य

यो खेलको विजेताले सेप्टेम्बरमा भारत र पाकिस्तान जस्ता टिमसँग एसिया कपमा खेल्ने भएकाले नेपालका लागि निकै नै चुनौतीपूर्ण र राम्रो अवसर दुवै रहेको छ । नेपालले विश्वकप लिग २ मा पछिल्लो समय गरेको सनसनीपूर्ण प्रदर्शनलाई निरन्तरता राख्ने हो भने एसिया कपमा छानिन सक्छ ।

नेपाललाई यसपालि घरेलु मैदानको पनि साथ रहेको छ । त्यसैले पनि खेलअघि कप्तान रोहित पौडेलले सोमबार एसीसी प्रिमियर कप जित्दै एसिया कपमा खेल्ने नेपालको लक्ष्य रहेको बताएका छन् ।

रोहितको कप्तानीमा नेपालले पछिल्लो समय चामत्कारिक प्रदर्शन गर्दै आइरहेको छ । यदि रोहितले देखेको सपना साकार भयो भने नेपालले छिमेकी भारत र पाकिस्तानजस्ता राष्ट्रसँग खेल्ने सपना पूरा हुनेछ ।

फेरि संयोग पनि मिलेको छ कि यसपालि प्रिमियर कप विजेताले एसिया कपमा भारत र पाकिस्तानको समूहमा रहेर खेल्न पाउने छ । नेपालले वर्षौंदेखि देखेको सपना यसपालि पूरा हुने निकै ठूलो अवसर छ ।

नेपाल सन् २०१८ मा एक दिवसीय अन्तर्राष्ट्रिय मान्यता प्राप्त गरेपछि भारत र पाकिस्तानसँग खेल्ने सपना खेलाडीहरुले देखिसकेका छन् । त्यो यसपालि पूरा हुन सक्छ ।

मोन्टी फ्याक्टर असर

भारतीय प्रशिक्षक मोन्टि देसाई यतिबेला नेपालका मूख्य प्रशिक्षक छन् । उनको आगमनसँगै नेपालले चामत्कारिक प्रदर्शन गरेको छ ।

विश्वकप लिग २ मा नेपालले गत दुई महिनामा खेलेका १२ मध्ये ११ खेल जितेर विश्वकप छनोटको यात्रा तय गरिसकेको छ । नेपालले एक खेल मात्र हार्दा पनि विश्वकप छनोटमा सिधै छानिन सक्ने थिएन । तीन खेल हारेको भए विश्वकप एक दिवसीयको मान्यता गुमाउने थियो।

सन् २०२३ नेपालका लागि निकै नै महत्वपूर्ण र फलदायी बनेर आएको छ । अब बस् नेपालले घरेलु मैदानमा यही एसीसी कप जित्ने हो भने अर्को सफलता पनि पूरा हुने थियो ।

घरेलु मैदानमा खेलेका सबै ८ खेल जितेकाले पनि नेपाललाई प्रिमियर कपको बलियो दाबेदारका रुपमा हेरिएको छ ।

जसरी मोन्टिले खेलाडीहरुको मनोबल उच्च बनाउने काम गरेर नेपाललाई विश्वकपमा सिधै छनोट गराए त्यसरी नै नेपालले यो एसीसी कप जित्न कठिन छैन । मोन्टिले हरेर खेलाडीको क्षमता हेरिसकेका छन् ।

त्यसैले पनि मैदानमा दुई तीन खेलाडी नचल्दैमा नेपालले हार्ने अवस्था आउन छोडेको छ । अहिले युवा खेलाडीहरु एकसे एक देखिएका छन् ।

मोन्टिले जसरी ड्रेसिङ रुमलाई वातानुकूलित बनाउन खोजिरहेका छन्, त्यसले मैदानमा पनि खेलाडीबीच राम्रो तालमेल देखाउँछ ।

प्रकाशित मिति: मंगलबार, वैशाख ५, २०८० १७:३६