एसीसी प्रिमियर कप: ओमानले जित्यो तेस्रो स्थानको उपाधि

खेलकुद

गृहपृष्ठ
खेलकुद
एसीसी प्रिमियर कप: ओमानले जित्यो तेस्रो स्थानको उपाधि

एसीसी प्रिमियर कप: ओमानले जित्यो तेस्रो स्थानको उपाधि

आइतबार, वैशाख १७, २०८० बागेश्वरी पोस्ट

नेपालगन्ज । काठमाडौंमा जारी एसीसी पुरुष प्रिमियर कप क्रिकेटको तेस्रो स्थानका लागि आज भएको भिडन्त वर्षाले गर्दा रद्द भएको छ । खेल रद्द भएसँगै समूह चरणको रन रेटका आधारमा ओमान विजयी भएको छ । ओमान विजयी घोषणा भएसँगै तेस्रो स्थानको उपाधि जितेको हो ।

खेलमा पहिले ब्याटिङ गरेको कुवेतले ३१.३ ओभरमा अलआउट हुँदै १३० रन बनायो । अद्नान इद्रिसले ३४ रन बनाएको इनिङ्समा सायेद मोनिबले १० बलमा २८ रन जोडे । ओमानका जय अडेड्राले १४ रन खर्चेर ५ विकेट लिए ।

जवाफमा ओमानले ६ ओभरमा कुनै विकेट नगुमाइ ४१ रन जोड्दा वर्षाले त्यस अगाडिको खेल सम्भव नभएपछि रद्द हुँदा समूह चरणको रन रेटका आधारमा ओमान तेस्रो भएको हो ।

समूह चरणमा समूह ए मा रहेको ओमान उपविजेता भएको थियो । उसको ६ अंक थियो र रन रेट ०.३७७ रहेको थियो । समूह बीको उपविजेता कुवेतको अंक ६ र रनरेट ०.२२३ रहेको थियो । रन रेट ०.१५४ ले अगाडि रहेर ओमान तेस्रो भएको हो ।

तेस्रो भएसँगै ओमान एसीसी इमर्जिङ कपका लागि छानिएको छ । जारी प्रतियोगिताको शीर्ष तीनमा रहने टिमले एसियाका टेष्ट खेल्ने राष्ट्रको यू–२३ टिमसँग इमर्जिङ कप खेल्न पाउनेछ ।

यो अवसर नेपाल र यूएईले पनि पाउनेछन् ।

फाइनल खेल सोमबार

फाइनल खेल सोमबार हुँदैछ । नेपाल र यूएई भिड्दैछन् । नेपालले सेमिफाइनलमा कुवेतसँग खेले पनि खेल वर्षाले रद्द भएपछि समूह विजेताको आधारमा नेपाल फाइनलमा पुगेको हो ।

त्यस्तै यूएईले ओमानलाई डक वर्थ लेविस नियमअनुसार २ रनले हराएर फाइनलमा स्थान बनाएको हो । सोमबार वर्षाले खेल अवरुद्ध भए मंगलबार हुनेछ । मंगलबार पनि नतिजा नआए समूह चरणको अंकका आधारमा नेपाल विजयी हुनेछ ।

प्रकाशित मिति: आइतबार, वैशाख १७, २०८० १८:०९

प्रतिक्रिया दिनुहोस्