गुजरातलाई हराउँदै चेन्नई सुपर किङ्स बन्यो आईपीएल च्याम्पियन

खेलकुद

गृहपृष्ठ
खेलकुद
गुजरातलाई हराउँदै चेन्नई सुपर किङ्स बन्यो आईपीएल च्याम्पियन

गुजरातलाई हराउँदै चेन्नई सुपर किङ्स बन्यो आईपीएल च्याम्पियन

मंगलबार, जेठ १६, २०८० बागेश्वरी पोस्ट

नेपालगन्ज । चेन्नई सुपर किंग्स आईपीएल टी–२० क्रिकेटको १६औँ संस्करणको च्याम्पियन बनेको छ । आज बिहान सम्पन्न भएको फाइनलमा साविक विजेता गुजरात टाइटान्सलाई ५ विकेटले पराजित गर्दै चेन्नईले जित हासिल गरेको हो ।

पहिलो दिन वर्षाले टस समेत हुन नसकेको अहमदाबादको नरेन्द्र मोदी स्टेडियममा रिजर्भ डेमा पनि वर्षाले असर गरेको थियो । खेलमा पहिले ब्याटिङ गरेको गुजरातले ४ विकेटको क्षतिमा २१४ रन बनायो ।

साइ सुदर्शनले ४७ बलमा ९६ रन जोडे । त्यस्तै ऋद्धिमन साहाले ३९ बलमा ५४, शुबमन गिलले २० बलमा ३९ तथा कप्तान हार्दिक पाण्डेयाले १२ बलमा अविजित रहँदै २१ रन जोडे । मथिशा पथिरानाले २ विकेट लिए ।

जवाफमा ३ बल खेल्दा वर्षाले केही समय प्रभावित भएपछि १५ ओभरमा १७१ रनको नयाँ चुनौती पाएको चेन्नईले ५ विकेट गुमाएर पूरा गर्यो । रविन्द्र जडेजाले अन्तिम बलमा चौका प्रहार गर्दै चेन्नईलाई जिताए ।

प्लेयर अफ द फाइनल देवोन कन्वेले २५ बलमा ४७, शिवम दुवेले २१ बलमा अविजित रहँदै ३२, अजिन्क्या रहानेले १३ बलमा २७, ऋतुराज गायकवाडले १६ बलमा २६, अम्बाति रायुडूले ८ बलमा १९ तथा रविन्द्र जडेजाले ६ बलमा अविजित रहँदै १५ रन जोडे । मोहित शर्माले ३ विकेट लिए ।

१० टोलीले सहभागीता जनाएको यो प्रतियोगितामा लिग चरणमा शीर्ष स्थानमा रहँदै गुजरात र दोस्रो स्थानमा रहँदै चेन्नईले पहिलो क्वालिफायर खेलेका थिए । उक्त खेल चेन्नईले जितेपछि गुजरातले दोस्रो क्वालिफायर खेल्दै मुम्बई इन्डियन्सलाई हराएर फाइनलमा पुगेको थियो ।

लखनउ सुपर जाइन्टस तेस्रो तथा मुम्बई इन्डियन्स चौथो हुँदै प्लेअफमा पुगेका थिए । इलिमिनेटरमा मुम्बईले लखनउलाई हराएको थियो । दोस्रो क्वालिफायरमा मुम्बई गुजरातसँग पराजित भयो ।

१६औं संस्करणको समाप्तिसम्म चेन्नईले मुम्बईको बराबरी गरेको छ । दुवै टिमले अहिलेसम्म समान ५ उपाधि जितेका छन् । कोलकाता नाइट राइडर्सले २ तथा सनराइजर्स हैदराबाद, डेक्कन चार्जर्स, राजस्थान रोयल्स र गुजरात टाइटन्सले १–१ उपाधि जितेका छन्।

प्रकाशित मिति: मंगलबार, जेठ १६, २०८० ०७:५६

प्रतिक्रिया दिनुहोस्