नेपालसँग अमेरिका ६ विकेटले पराजित

खेलकुद

गृहपृष्ठ
खेलकुद
नेपालसँग अमेरिका ६ विकेटले पराजित

नेपालसँग अमेरिका ६ विकेटले पराजित

मंगलबार, असार ५, २०८० बागेश्वरी पोस्ट

नेपालगन्ज । भारतमा आयोजना हुने आइसीसी एक दिवसीय विश्वकप छनोट क्रिकेट प्रतियोगिता अन्तर्गत आज भएको खेलमा नेपालले अमेरिकालाई ६ विकेटले पराजित गरेको छ ।

अमेरिकाले दिएको २०८ रनको लक्ष्यलाई नेपालले ४२ बल बाँकी छँदै २११ रन बनाउँदै विजयी बनेको हो । यो जीतसंगै अब नेपाल सुपरसिक्समा पुग्ने सम्भावना जिवितै रह्यो ।

पहिलो खेलमा आयोजक जिम्बाब्वेसँग ८ विकेटले पराजित भएको नेपाल दोस्रो खेलमा मंगलबार अमेरिकामाथि ६ विकेटको सहज जित हासिल गर्न सफल भएको हो ।

हरारेमा रहेको टागासिंगा स्पोर्टस् क्लबमा जितका लागि २०८ रनको सामान्य चुनौती पछ्याएको नेपालले ४३ ओभरमै ४ विकेट गुमाएर जित हासिल गरेको हो ।

नेपालका लागि भीम शार्कीले ११४ बलमा अविजित रहँदै ७७ रन बनाए । त्यस्तै पाँचौँ विकेटका लागि अविजित ७४ रनको साझेदारी गर्ने क्रममा दिपेन्द्र सिंह ऐरीले ३३ बलमा ३९ रन बनाए । त्यस्तै ओपनर कुशल भुर्तेलले ५४ बलमा ३९, कप्तान रोहित पौडेलले १६, कुशल मल्लले १३ तथा आसिफ शेखले १२ रन बनाए ।

यसअघि टस जितेर पहिले बलिङ गरेको नेपालले अमेरिकालाई २०७ रनमा रोेकेको थियो। अमेरिका ४९ ओभर खेल्दै सबै विकेट गुमाएर २०७ रनमा रोकिएको हो ।

कमजोर शुरुआत गरेको अमेरिकालाई शायन जहांगिरले सम्मानजनक योगफलसम्म लगेका हुन् । उनले ७९ बलमा अविजित रहँदै १०० रन बनाए । त्यस्तै शुशान्त मोदानीले ४२ रन बनाए । त्यसबाहेक दुई खेलाडीले मात्र दोहोरो स्कोर जोडेका थिए ।

खेलमा ओपनिङ बलर करण केसीले सनसनीपूर्ण बलिङ गरेपछि अमेरिका निरीह जस्तै भएको हो । अमेरिकाले १८ रन जोड्दा शुरुआती ४ विकेट गुमाएको थियो ।

शुरुआती चार वटै विकेट करण केसीले लिएका हुन् । उनले ९ ओभरमा ३ मेडन राख्दै ३३ रन खर्चेर ४ विकेट लिएका हुन् ।

त्यस्तै गुल्सन झाले ३, दिपेन्द्र सिंह ऐरीले २ तथा ललित राजवंशीले १० ओभरमा २० रन खर्चेर १ विकेट लिए । सन्दीप लामिछानेले भने लगातार दोस्रो खेलमा विकेट लिन सकेनन् ।

यो जितसँगै नेपालले अर्को चरणमा पुग्ने दावेदारीलाई बलियो बनाएको छ । अमेरिकाले भने लगातार दोस्रो हार बेहोरेको छ । अमेरिकाले वेस्ट इन्डिजसँग ३९ रनले पराजित भएको थियो।

यस्तो छ विश्वकप छनोटको प्रतियोगिता

जिम्बाब्वेमा जारी विश्वकप छनोटमा सहभागी १० टोलीमा दुई टोलीले भारतमा हुने विश्वकप खेल्न पाउनेछन् । टोलीलाई दुई समूहमा विभाजन गरिएको छ । समूह ए मा नेपाल, जिम्बाब्वे, अमेरिका वेष्ट इन्डिज र नेदरल्यान्ड्स रहेका छन् । समूह बी मा श्रीलंका, आयरल्यान्ड, ओमान, यूएई र स्कटल्याण्ड छन् ।

हरेक समूहबाट शीर्ष तीन टोलीले सुपर सिक्समा स्थान बनाउने छन् । जसबाट सुपर सिक्समा अर्को समूहबाट आउने तीन टोलीसँग खेल्नुपर्ने हुन्छ ।

सुपर सिक्समा शीर्ष दुई टोलीले विश्वकपमा स्थान बनाउने छन् । पूर्व विश्व च्याम्पियन वेस्टइन्डिज र श्रीलंकालाई प्रमुख दाबेदार मानिएको छ । जिम्बाब्वे पनि घरेलु मैदानको फाइदा उठाउँदै विश्वकप खेल्न चाहन्छ ।

नेपाल, स्कटल्यान्ड र ओमान आईसीसी विश्वकप लिग टु मा शीर्ष तीनमा रहँदै विश्वकप छनोट खेलिरहेका हुन् । अमेरिका र यूएई लिग टुबाट घटुवा हुँदै विश्वकप छनोट प्लेअफमा शीर्ष दुईमा रहँदै विश्वकप छनोटमा आएका हुन् ।

श्रीलंका, आयरल्यान्ड, नेदरल्यान्ड्स, वेस्ट इन्डिज र जिम्बाब्वे आईसीसी विश्वकप सुपर लिगमा पुछारमा रहँदै छनोट खेलिरहेका हुन् ।

प्रकाशित मिति: मंगलबार, असार ५, २०८० २०:१०

प्रतिक्रिया दिनुहोस्