नेपालगञ्जमा बागेश्वरी फुट्सल सञ्चालनमा आयो

खेलकुद

गृहपृष्ठ
खेलकुद
नेपालगञ्जमा बागेश्वरी फुट्सल सञ्चालनमा आयो

नेपालगञ्जमा बागेश्वरी फुट्सल सञ्चालनमा आयो

आइतबार, पुस १, २०८० बागेश्वरी पोस्ट

नेपालगञ्ज । बाँके जिल्लामा अर्को फुट्सल पनि सञ्चालनमा आएको छ । आजदेखि बागेश्वरी फुट्सल एण्ड स्पोर्ट्स हव सञ्चालनमा आएसँगै जिल्लामा फुट्सलको संख्या तीन पुगेको हो । तीन वटै फुट्सल नेपालगञ्जमा रहेका छन् । जस मध्ये आज उद्घाटन गरिएको बागेश्वरी फुट्सल एण्ड स्पोर्ट्स हव जिल्लाकै सबैभन्दा ठूलो फुट्सल रहेको जनाइएको छ ।

बागेश्वरी फुट्सलका अध्यक्ष प्रितम विष्टका अनुसार बागेश्वरी फुट्सलको आकार २०×३८ मिटर रहेको छ । जुन नेपालगञ्जमा रहेका अन्य फुट्सल भन्दा ठूलो हो । ‘हामीले नेपालगञ्जमा केही नयाँ गरौंं भनेर 'स्वास्थ्यका लागि खेलकुद' नारा राखेर बागेश्वरी फुट्सल सुरु गरेका छौं र नेपालगञ्जमा रहेका अन्य फुट्सल भन्दा पनि यो ठूलो छ,’ अध्यक्ष विष्टले भने ।

विष्टले हालसम्म बागेश्वरी फुट्सलमा ७० लाख रुपैयाँको लगानी भइसकेको बताउँदै बाँकी केही संरचना निर्माण गर्नका लागि थप रकम खर्च हुने बताए । हाल बागेश्वरी फुट्सलमा खेल मैदानसँगै शौचालय, चेन्जिङ कोठ लगायतका संरचना निर्माण भइसकेको उनले बताए ।

बागेश्वरी फुट्सलको उद्घाटन नेपालगञ्ज उपमहानगरपालिकाका प्रमुख प्रशान्त विष्टले गरेका छन् । विष्टले रिबन काटेर बागेश्वरी फुट्सलको उद्घाटन गरे । सो क्रममा विष्टले नेपालगञ्जमा फुट्सलप्रति युवाहरुको आकर्षण बढ्दै गएको बताउँदै बागेश्वरी फुट्सलले नेपालगञ्जसंगै समग्र जिल्लालाई समेट्न सकोस् भन्ने शुभकामना व्यक्त गरे ।

बागेश्वरी फुट्सलले नियमित फुट्सल खेल्न आउने प्रति ब्यक्तिका लागि मासिक २ हजार र समूहका लागि २२ हजार रुपैयाँ मासिक शुल्क तोकेको छ । उद्घाटनको अवसरमा आयोजकले फुट्सल प्रतियोगिता आयोजना गर्नुको साथै छुटको पनि व्यवस्था गरेको जनाएको छ ।

प्रकाशित मिति: आइतबार, पुस १, २०८० १७:५४