नवविवाहित दम्पतीद्वारा विद्यार्थीलाई शैक्षिक सामग्री सहयोग

शिक्षा

गृहपृष्ठ
शिक्षा
नवविवाहित दम्पतीद्वारा विद्यार्थीलाई शैक्षिक सामग्री सहयोग

नवविवाहित दम्पतीद्वारा विद्यार्थीलाई शैक्षिक सामग्री सहयोग

मंगलबार, पुस ३, २०८० बागेश्वरी पोस्ट

नेपालगञ्ज । नवविवाहित दम्पतीले बाँकेको राप्तीसोनारी गाउँपालिका–१ बाघखोरस्थित ज्ञानपूर्णोदय प्राविका विद्यार्थीलाई शैक्षिक सामग्री प्रदान गरेका छन् । मंसिर २९ गते विवाह बन्धनमा बाँधिएका स्थानीय माधव रावत र कोमल खड्काले आज २० हजार बढी मूल्य बराबरको शैक्षिक सामग्री विद्यार्थीलाई सहयोग गरेको विद्यालयका प्रधानाध्यापक भरत खड्काले जानकारी दिए ।

माधव सोही विद्यालयका पूर्व विद्यार्थी हुन् भने कोमल पूर्व शिक्षिका हुन् । उनीहरुले विद्यार्थीहरुलाई कापी, कलम र पेन्सिल सहयोग गरेको प्रधानाध्यापक खड्काले बताए । एक जना विद्यार्थीलाई ६/६ वटा कापी, कलम र पेन्सिलका दरले ५० जना विद्यार्थीलाई उक्त सामग्री सहयोग प्राप्त भएको खड्काको भनाई छ । त्यसैगरी विद्यालयलाई फुटवल र साउण्ड सिस्टम एक एक थान सहयोग गरिएको रावतले बताए ।

कक्षा पाँचसम्म पढाई हुने ज्ञानपूर्णोदय प्राविमा ५० जना विद्यार्थी छन् । उक्त विद्यालयमा निम्न आयस्तर भएका बालबालिकाहरु अध्ययन गर्छन् । विपन्न तथा गरिव समुदायका बालबालिकाहरुलाई अध्ययनमा सहज होस् भन्ने उद्देश्यका साथ शैक्षिक सामग्री सहयोग गरिएको नवविवाहित दम्पतीले बताए । शैक्षिक सामग्री प्रदान कार्यक्रममा सहभागी वडा अध्यक्ष यमबहादुर खड्काले नवविवाहित दम्पतीबाट बालबालिकाको शिक्षाका लागि गरिएको सहयोग अनुकरणीय कार्य भएको प्रतिक्रिया दिए ।

त्यसैगरी पालिकाका शिक्षा विज्ञ गोरख हमालले विहेवारीपछि घुमघाम र रमाइलोका नाममा खर्च गर्नु भन्दा सामाजिक कार्यमा लगानी गर्नु स्रहानीय कार्य भएको बताए । विद्यालय व्यवस्थापन समितिका अध्यक्ष केशरी विकले विपन्न र गरिव बालबालिकाका लागि प्राप्त सहयोगले उनीहरुलाई ठूलो राहात मिलेको भन्दै खुसी व्यक्त गरिन् ।

प्रकाशित मिति: मंगलबार, पुस ३, २०८० २०:०८