नेपालगञ्ज सेन्ट जेभियर्स र मंगल प्रसाद फाइनलमा भिड्ने

खेलकुद

गृहपृष्ठ
खेलकुद
नेपालगञ्ज सेन्ट जेभियर्स र मंगल प्रसाद फाइनलमा भिड्ने

नेपालगञ्ज सेन्ट जेभियर्स र मंगल प्रसाद फाइनलमा भिड्ने

मंगलबार, पुस १७, २०८० बागेश्वरी पोस्ट

नेपालगञ्ज । नेपालगञ्ज सेन्ट जेभियर्स स्कुल र मंगल प्रसाद उच्च माविले प्रथम किशोरसिंह राठौर यु–१६ कप क्रिकेट प्रतियोगिताको फाइनलमा प्रतिष्पर्धा गर्ने भएको छन् । आज भएको दोस्रो सेमिफाइनलमा नेपालगञ्ज सेन्ट जेभियर्स स्कुलले नेपालगञ्ज मोडेल एकेडेमीलाई ७ विकेटले हराउँदै फाइनलमा प्रवेश गरेको हो ।

नेपालगञ्जस्थित मंगल प्रसाद उच्च माविको खेल मैदानमा टस जितेर सुरुवातमा ब्याटिङ गरेको नेपालगञ्ज मोडेलले १७.१ ओभरमा १ सय ५ रन बनाएर अलआउट भएको थियो । टोलीका लागि विकास खनालले १५ रन, निश्चल पुन मगरले १३ रन र आयुश पुन मगरले ११ रन बनाए ।

नेपालगञ्ज सेन्ट जेभियर्सका सम्यक थापाले ३ विकेट, राजिव साहु र बिपिन खनालले २–२ विकेट लिएका थिए । मिन्टु शर्मा र भुपाल रावलले अविजित रहँदै उत्कृष्ट ब्याटिङ गरेपछि १ सय ६ रनको विजयी लक्ष्य पाएको सेन्ट जेभियर्सले ११.३ ओभरमा ३ विकेटको नोक्सानीमा जीत हासिल गरेको थियो । म्यान अफ द म्याच मिन्टु शर्माले अविजित ५० रन बनाए । उनले २७ बलमा ६ चौका र २ छक्का प्रहार गरेका थिए । सेन्ट जेभियर्सका अर्का ब्याट्सम्यान भुपालले अविजित ३६ रनको योगदान गर्दै टोलीलाई जीत दिलाउन महत्वपूर्ण भुमिका निर्वाह गरे । भुपालले ३० बलमा ६ चौका प्रहार गरेका थिए । नेपालगञ्ज मोडेलका विवेक पुन मगरले २ विकेट र सुमित विष्टले १ विकेट लिए । सेमिफाइनल खेलमा म्यान अफ द म्याच घोषित भएका नेपालगञ्ज सेन्ट जेभियर्सका शर्मालाई जयमंगलम् सिमेन्टका सेल्स डिरेक्टर रिसब अग्रवालले पुरस्कृत गरे ।

ज्योति स्पोर्ट्स एकेडेमीले आयोजना गरेको प्रतियोगितामा बाँकेका १६ टिमको सहभागिता रहेको छ । ज्योति स्पोर्ट्स एकेडेमीका अध्यक्ष सिद्धान्तजंग शाहीका अनुसार प्रतियोगिताको समूह ‘ए’ मा जिभिएन, एबिसी, ड्रिमल्यान्ड, सेन्ट जेभियर्स, फुल्टेक्रा मावि, श्रीचन्द्र मेवालाल र मंगल प्रसाद उच्च मावि रहेका छन् । यसैगरी समूह ‘बी’ मा सिद्धार्थ विद्या सदन, जय बागेश्वरी मावि, ब्राइटल्यान्ड, नेपालगञ्ज मोडेल एकेडेमी, पशुपति हाइस्कुल, आदर्श, मोडर्न, महेन्द्र र आइडियल पब्लिक स्कुल छन् ।

प्रतियोगितामा सहभागी टिमलाई दुई समुहमा विभाजन गरेर नकआउटको आधारमा प्रतिष्पर्धा गराइएको छ । प्रतियोगिताको विजेताले ५० हजार, उपविजेताले ३० हजार, उत्कृष्ट खेलाडीले १० हजार, उत्कृष्ट बलर, उत्कृष्ट फिल्डर, उत्कृष्ट ब्याट्सम्यानले समान ५ हजार रुपैयाँ पाउनेछन् । प्रत्येक खेलको प्लेयर अफ द म्याचले १ हजार पुरस्कार प्राप्त गर्नेछन् ।

प्रकाशित मिति: मंगलबार, पुस १७, २०८० २०:२३

प्रतिक्रिया दिनुहोस्