माघ ६ गतेदेखि मेयर कप छात्र–छात्रा फुटबल प्रतियोगिता हुने

खेलकुद

गृहपृष्ठ
खेलकुद
माघ ६ गतेदेखि मेयर कप छात्र–छात्रा फुटबल प्रतियोगिता हुने

माघ ६ गतेदेखि मेयर कप छात्र–छात्रा फुटबल प्रतियोगिता हुने

बुधबार, पुस १८, २०८० बागेश्वरी पोस्ट

नेपालगञ्ज । बाँके जिल्ला फुटबल संघको आयोजनामा माघको पहिलो सातादेखि मेयर कप छात्र÷छात्रा फुटबल प्रतियोगिता–२०८० हुने भएको छ । प्रतियोगिता माघ ६ देखि १३ गतेसम्म नेपालगञ्जमा हुनेछ । प्रतियोगितामा बाँके जिल्लामा रहेका ८ वटा स्थानीय तहरुको विद्यालयहरुको छात्र/छात्रा टिमहरुले सहभागिता जनाउनेछन् ।

प्रतियोगिता आयोजनाका लागि नेपालगञ्ज उप–महानगरपालिकाले आर्थिक सहयोग गरेको छ । आज प्रतियोगिता आयोजना बारेमा नेपालगञ्ज उप–महानगरपालिका र बाँके जिल्ला फुटबल संघ बीच सम्झौता भएको छ । सम्झौतापत्रमा नेपालगञ्ज उप–महानगरपालिका शिक्षा महाशाखाका उप–सचिव गोर्खबहादुर थापा र बाँके जिल्ला फुटबल संघका महासचिव कमल खत्रीले हस्ताक्षर गरेका थिए ।

नेपालगञ्ज उपमहानगरपालिकाको आर्थिक सहयोगमा हुन लागेको प्रतियोगितामा करिब ४० विद्यालयहरुको सहभागिता रहने प्रतियोगिता संयोजक एवम् बाँके जिल्ला फुटबल संघका उपाध्यक्ष निर्मल चन्दले बताए । नेपालगञ्ज उप–महानगरपालिकासँग सम्झौता भए लगत्तै प्रतियोगिताको तयारी तीव्र गतिमा अगाडि बढेको चन्दले जानकारी गराए ।

बाँके जिल्ला फुटलल संघले विगतका वर्षमा मेयर कप जिल्ला स्तरीय छात्र–छात्रा प्रतियोगिता आयोजना गर्दै आएको थियो । कोभिड–१९ का कारण दुई वर्ष प्रतियोगिता हुन सकेको थिएन । माघको ६ गतेबाट सुरु हुने प्रतियोगिताले विद्यालय स्तरबाट फुटबल खेलाडी उत्पादनमा सहयोग गर्ने अखिल नेपाल फुटलब संघका केन्द्रिय सदस्य एवम् बाँके जिल्ला फुटबल संघका अध्यक्ष भोजराज शाहीले बताए ।

उनले भने, ‘हामी निकै उत्साहका साथ विद्यालय स्तरको मेयर कप प्रतियोगिता आयोजना गर्न लागिरहेका छौं । यसले बाँके जिल्लाको फुटबल विकासमा योगदान गर्नेछ । प्रतियोगितालाई भव्य बनाउने तयारी गरिरहेका छौं । मेयर कपले बाँकेको विकासमा नयाँ सम्भावनाको उजागार गर्नेछ ।’

नेपालगञ्ज उपमहानगरपालिका वडा नम्बर १ स्थित एन्फा ग्रासरुट फुटबल टे«निङ सेन्टरमा प्रतियोगिताका खेलहरु हुनेछ । नेपालगञ्ज रंगशालामा सिन्थेटिक ट्रयाक निर्माणको काम जारी रहेकोले प्रतियोगिता धम्बोझीमा गर्नु परेको बाँके जिल्ला फुटबल संघले जनाएको छ । प्रतियोगिताको विजेता टिमले २१ हजार, उपविजेताले ११ हजार र सर्वोत्कृष्ट खेलाडीलाई पुरस्कृत गरिने संघले जनाएको छ ।

प्रकाशित मिति: बुधबार, पुस १८, २०८० २०:३२