जानकीको प्रथम अध्यक्ष कप क्रिकेटमा मानपुर स्पोर्ट्स क्लब विजेता

खेलकुद

गृहपृष्ठ
खेलकुद
जानकीको प्रथम अध्यक्ष कप क्रिकेटमा मानपुर स्पोर्ट्स क्लब विजेता

जानकीको प्रथम अध्यक्ष कप क्रिकेटमा मानपुर स्पोर्ट्स क्लब विजेता

आइतबार, माघ ७, २०८० बागेश्वरी पोस्ट

नेपालगञ्ज । बाँकेको जानकी गाउँपालिकामा प्रथम अध्यक्ष कप क्रिकेट प्रतियोगिता सम्पन्न भएको छ । जानकी गाउँपालिका वडा नम्वर–३ मानपुरस्थित कन्या आधारभूत विद्यालय मानपुरको खेल मैदानमा प्रथम अध्यक्ष कप प्रतियोगिता यही माघ ४ गतेदेखि सुरु भई आज सम्पन्न भएको हो ।

प्रतियोगिताको समापन कार्यक्रममा बोल्दै गाउँपालिका अध्यक्ष छब्बन खाँले खेलाडीहरुले प्रदर्शन गरेको खेल प्रशंसनीय रहेको भन्दै यही तरिकाले जिल्ला, प्रदेश र संघमा समेत खेल प्रदर्शन हुने अपेक्षा गरे । "जानकी गाउँपालिकाको नाम राख्नुपर्छ त्यसको लागि पालिकाबाट गर्नुपर्ने सम्पूर्ण सहयोग गर्न म तयार छु," अध्यक्ष खाँले भने । सामाजिक विकास समितिका संयोजक राम आचल धोवीले विजेता र उपविजेता दुवै टिमलाई बधाई दिँदै अनुशासनमा रही खेल खेल्नुपर्ने बताए । कार्यपालिका सदस्य राजेन्द्र सिंहले आफू पनि खेलाडी भएकाले खेललाई आफूले धेरै नै माया गर्ने गरेको बताए ।

प्रतियोगिताको समापन कार्यक्रममा शिक्षा शाखाकी प्रमुख कृष्णाकुमारी भण्डारीले पनि बोलेकी थिइन् । कार्यक्रममा वडा नम्वर ३ का अध्यक्ष राजकुमार कुर्मी, पालिकाका कर्मचारीहरु, विभिन्न राजनीतिक दलका प्रतिनिधिहरुका साथै स्थानीयहरुको समेत उपस्थिति रहेको थियो ।

यसैबीच साविक नेरा प्रावि मानपुरका संस्थापक अध्यक्ष स्वर्गीय नगेन्द्र वहादुर कर्माचार्यका छोरा नवजित कर्माचार्यले आजको फाइनल खेलका खेलाडीहरुलाई ५००० हजार नगद पुरस्कारले सम्मान गरेका थिए । त्यस्तै कार्यपालिका सदस्य राजेन्द्र सिंहले पनि फाइनल जितेकका केही खेलाडीलाई नगद पुरस्कार प्रदान गरेका थिए ।

प्रथम अध्यक्ष कप क्रिकेट प्रतियोगिताको विजेता मानपुर स्पोर्ट्स क्लब भएको थियो भने गिजरा वारियर्स क्लव उपविजेता हुन सफल भएको थियो । पहिलो हुने मानपुर स्पोर्ट्स क्लबलाई ५० हजार पुरस्कार र दोस्रो हुने गिजरा वारियर्स क्लवलाई २५ हजार पुरस्कार प्रदान गरिएको थियो ।

प्रकाशित मिति: आइतबार, माघ ७, २०८० २०:३७

प्रतिक्रिया दिनुहोस्