नेपालगञ्जमा राष्ट्रिय व्याडमिन्टन प्रतियोगिता सुरु

खेलकुद

गृहपृष्ठ
खेलकुद
नेपालगञ्जमा राष्ट्रिय व्याडमिन्टन प्रतियोगिता सुरु

नेपालगञ्जमा राष्ट्रिय व्याडमिन्टन प्रतियोगिता सुरु

बिहीबार, माघ ११, २०८० बागेश्वरी पोस्ट

नेपालगञ्ज । नेपालगञ्जमा आजदेखि प्रथम नेपालगञ्ज कप राष्ट्रिय व्याडमिन्टन प्रतियोगिता सुरु भएको छ । नेपालगञ्जमा २५ वर्षपछि राष्ट्रिय स्तरको व्याडमिन्टन प्रतियोगिता आयोजना भएको हो । यसअघि नेपालगञ्जमा २०५५ सालमा राष्ट्रिय व्याडमिन्टन प्रतियोगिता भएको थियो । त्यसयता व्याडमिन्टनको राष्ट्रिय प्रतियोगिता सञ्चालनमा आएको थिएन । करिव २५ वर्षपछि नेपालगञ्जमा राष्ट्रिय स्तरको व्याडमिन्टन प्रतियोगिता गरिएसंगै बाँकेमा व्याडमिन्टनको सम्भावना खोजिँदैछ ।

लुम्बिनी प्रदेश खेलकुद परिषद्का सदस्य सचिव जयप्रकाश भट्टराईले एक समारोहका बीच आज प्रतियोगिताको औपचारिक रूपमा उद्घाटन गरे । बाँके जिल्ला व्याडमिन्टन संघको आयोजना तथा प्रदेश खेलकुद परिषद् लुम्बिनी प्रदेशको मुख्य प्रायोजनमा प्रतियोगिता सञ्चालन गरिएको हो । नेपालगञ्ज रंगशालास्थित कवर्ड हलमा सुरु भएको उक्त प्रतियोगिताको उद्घाटन गर्दै प्रमुख अतिथि समेत रहेका सदस्य सचिव भट्टराईले नयाँ पुस्ताको व्याडमिन्टनप्रति आकर्षण बढाउन र खेलिरहेका खेलाडीलाई टिकाउन प्रतियोगिता कोषेढुङ्गा सावित हुने बताए ।

बाँके जिल्ला व्याडमिन्टन संघका अध्यक्ष संजय थापाले प्रतियोगितामा देशभरबाट राष्ट्रिय तथा अन्तर्राष्ट्रियसहित करिब २ सय ५० जना खेलाडी सहभागी भएको बताए । तीन दिनसम्म हुने प्रतियोगितामा करिब २२ लाख खर्च हुने अध्यक्ष थापाले जानकारी दिए । अध्यक्ष थापाले पछिल्ला वर्षहरुमा खेलाडीहरुको उपस्थिति कम हुदैँ गएपछि नयाँ पुस्ताका खेलाडीहरु उत्पादन गर्ने उद्देश्यले प्रतियोगिता आयोजना गरिएको बताए ।

माघ १३ गतेसम्म चल्ने प्रतियोगितामा पाँच वटा विधा राखिएको छ । जसमा पुरुष एकल खुल्ला, पुरुष युगल, महिला एकल, पुरुष युगल ‘बी लेभल’ र ४५ प्लस भेट्रान्स डबल्स रहेको छ । प्रतियोगितामा अम्पायर ११ जना, लाइन जज २५ जना, म्याच रेफ्री २ जना र प्राबिधिक निर्देशक १ जना सहभागी भएको पनि थापाले बताए । प्रतियोगिताका विजेता खेलाडीलाई ट्रफी, मेडल र प्रमाणपत्र सहित नगद पुरस्कारको ब्यवस्था गरिएको आयोजक बाँके जिल्ला व्याडमिन्टन संघले जनाएको छ । आयोजकका अनुसार पुरुष एकलका विजेताले नगद ७० हजार, दोस्रोले ३५ हजार तथा तेस्रो हुनेले १५/१५ हजार पाउनेछन् ।

महिला एकलका विजेताले ६० हजार, दोस्रो हुनेले ३० हजार तथा तेस्रो हुनेले १५/१५ हजार प्राप्त गर्नेछन् । पुरुष युगलका विजेताले नगद ५० हजार, दोस्रोले २५ हजार तथा तेस्रो हुनेले १५/१५ हजार पाउनेछन् । यस्तै पुरुष युगल (बी लेभल) ले ३० हजार, दोस्रोले २० हजार तथा तेस्रो हुनेले १०/१० हजार पाउनेछन । यसैगरी पुरुष युगल (भेट्रान्स ४५ प्लस) का विजेताले ३० हजार, दोस्रोले २० हजार तथा तेस्रो हुनेले १०/१० हजार रुपैयाँ पाउने आयोजकले जनाएको छ ।

मुख्य रेफ्री किरण कारञ्जितका अनुसार प्रतियागिताको पहिलो दिन पहिलो र दोस्रो चरणका ६७ खेल सम्पन्न भएका छन् भने भोली शुक्रबार प्रिक्वाटर र क्वाटर फाइनलका खेलहरु बिहान ८ः३० बजेदेखि सञ्चालन हुनेछ ।

प्रकाशित मिति: बिहीबार, माघ ११, २०८० २०:०७

प्रतिक्रिया दिनुहोस्