डाँफे कप फुटबलमा धम्बोझी र न्यू दर्पण स्पोर्ट्स क्लब विजयी

खेलकुद

गृहपृष्ठ
खेलकुद
डाँफे कप फुटबलमा धम्बोझी र न्यू दर्पण स्पोर्ट्स क्लब विजयी

डाँफे कप फुटबलमा धम्बोझी र न्यू दर्पण स्पोर्ट्स क्लब विजयी

बुधबार, माघ १७, २०८० बागेश्वरी पोस्ट

नेपालगञ्ज । न्यु डाँफे स्पोर्ट्स क्लबको आयोजनामा बाँकेको खजुरा गाउँपालिकाको डि-गाउँस्थित मिनी रंगशालामा जारी नवौं डाँफे कप नक आउट फुटबल खेल प्रतियोगितामा आज धम्बोझी क्लब नेपालगञ्ज र न्यु दर्पण स्पोर्ट्स क्लब खजुरा ई-गाउँले फराकिलो जीत हासिल गरेका छन् ।

प्रतियोगिताको तेश्रो दिनको पहिलो खेल धम्बोझी क्लब नेपालगञ्ज र नेपाल प्रहरीको लुम्बिनी गण खजुराबीच भएको थियो । धम्बोझी क्लबले प्रहरीको लुम्बिनी गणलाई शुन्यका विरुद्ध ५ गोलले पराजित गरेको थियो । धम्बोझीका तर्फबाट निराजन शाहीले ह्याट्रिक गरे भने भक्त भण्डारी र अशोक केसीले एक-एक गोल गरेका थिए । शाहीले खेल शुरु भएको ७, ११ र ५८ मिनेटमा गोल गरे । खेलको ३५ मिनेटमा भक्तले र ६१ मिनेटमा अशोकले थप एक गोल गरेका थिए । धम्बोझी क्लब र प्रहरीको लुम्बिनी गणको खेलमा धम्बोझीकै खेलाडी निराजन म्यान अफ द म्याच घोषित भए ।

त्यस्तै दोस्रो खेलमा न्यु दर्पण स्पोर्ट्स क्लब खजुरा ई-गाउँले जीत हासिल गरेको छ । न्यु दर्पणले जय किसान स्पोर्ट्स क्लब सैनिकलाई फराकिलो गोल अन्तरले हराएको थियो । दर्पणले शुन्यका विरुद्ध ४ गोल गर्दै जीत हासिल गर्यो । न्यु दर्पणका तर्फबाट भुपेन्द्र शाही (चाइना) ले ह्याट्रिक गरे । थप एक गोल मनिस सुनारले गरेका थिए । खेल शुरु भएको ३, ३२ र ५५ मिनेटमा भुपेन्द्रले गोल गरेका थिए भने ५७औ मिनेटमा मनिसले एक गोल गरी जीत निकालेको प्रचार संयोजक खगेन्द्र दाहालले जानकारी दिए । दोस्रो खेलको म्यान अफ द म्याच न्यु दर्पणका भुपेन्द्र घोषित भए । दुबै म्यान अफ द म्याच घोषित खेलाडीले नेपालगञ्जमा रहेको थोपा प्रयोगशालाको तर्फबाट नगद ११ सयका दरले प्राप्त गरे ।

खेल संयोजक तिलकविर सुनारका अनुसार नवौं डाँफे कप नक आउट फुटबल खेल प्रतियोगिताको विजेता टिमले नगद १ लाख ५५ हजार ५ सय ५५ रुपैयाँ नगद पाउनेछ । उक्त पुरस्कार राशी हाल अमेरिकामा रहेका खजुरा गाउँपालिका वडा नम्बर ४ डि-गाउँ निवासी लिल बहादुर थापाले सौजन्य गरेका छन् । न्यु डाँफे स्पोर्ट्स क्लबका अध्यक्ष हरि प्रकाश विकले प्रतियोगितामा उपविजेता हुने टिमलाई ८५ हजार ५ सय ५५ हजारका साथमा मेडल तथा प्रमाणपत्रबाट पुरस्कृत गरिने बताए । यसैगरी प्रतियोगितामा उत्कृष्ट खेलाडी, गोलकिपर र सर्बाधिक गोलकर्तालाई पनि नगद २ हजार ५ सय रुपैयाँ प्रदान गरिने क्लबका अध्यक्ष बिकले बताए । प्रतियोगितामा १४ टिमले भाग लिएका छन् ।

प्रकाशित मिति: बुधबार, माघ १७, २०८० २०:३३

प्रतिक्रिया दिनुहोस्