मेयर कप फुटबलः जय बागेश्वरी, सेन्ट थोमस, नेपालगञ्ज मोडेल र ड्रिमल्याण्ड क्वाटरफाइनलमा

खेलकुद

गृहपृष्ठ
खेलकुद
मेयर कप फुटबलः जय बागेश्वरी, सेन्ट थोमस, नेपालगञ्ज मोडेल र ड्रिमल्याण्ड क्वाटरफाइनलमा

मेयर कप फुटबलः जय बागेश्वरी, सेन्ट थोमस, नेपालगञ्ज मोडेल र ड्रिमल्याण्ड क्वाटरफाइनलमा

बिहीबार, माघ १८, २०८० बागेश्वरी पोस्ट

नेपालगञ्ज । जय बागेश्वरी स्कुल, सेन्ट थोमस, नेपालगञ्ज मोडेल एकेडेमी र ड्रिमल्याण्ड स्कुल नेपालगञ्जमा जारी मेयर कप अन्तर विद्यालय छात्र–छात्रा फुटबल प्रतियोगिताको क्वाटरफाइनलमा प्रवेश गरेका छन् ।

नेपालगञ्ज उपमहानगरपालिका वडा नम्बर १ स्थित एन्फा ग्रासरुट फुटबल स्पोर्ट्स एकेडेमीमा भएको खेलमा जय बागेश्वरीले बागेश्वरी एकेडेमी कोहलपुरलाई २–० ले हरायो । खेलमा म्यान अफ द म्याच पुरस्कार जित्न सफल जय बागेश्वरीका पुष्कर साउदले ३४औं र ५३औं मिनेटमा गोल गरेका थिए । म्यान अफ द म्याच बनेका पुष्करलाई नेपालगञ्ज उद्योग वाणिज्य संघका महासचिव भीम रानाभाटले पुरस्कृत गरे ।

दोस्रो खेलमा सेन्ट थोमसले ग्रीनपिस मावि कोहलपुरलाई २–० ले हरायो । सेन्ट थोमसको जीतमा मनिष डाँगीले ४३औं र ४८औं मिनेटमा गरी दुई गोल गरे । म्यान अफ द म्याच घोषित भएका डाँगीलाई एन ब्याव्सनका केन्द्रिय सदस्य बामदेव न्यौपाने र युरो बेबी जोन स्कुलका निर्देशक कमल पछाईले पुरस्कृत गरे ।

यसैगरी तेस्रो खेलमा नेपालगञ्ज मोडेल एकेडेमीले मोडर्न पब्लिक स्कुलाई ३–२ ले पराजित गरेको छ । नेपालगञ्ज मोडेल एकेडेमीको जीतमा बिनोद शाहीले ३० र ६०औं मिनेटमा दुई गोल र रुपेश बोहराले ४५औं मिनेटमा गोल गरेका थिए । यता मोडर्न पब्लिक स्कुलको तर्फबाट विमल ओलीले २९औं मिनेट र विवेक विष्टले ५७औं मिनेटमा गोल गरेका थिए । खेलमा निर्णायक गोल गरेका नेपालगञ्ज मोडेल एकेडेमीका बिनोदले म्यान अफ द म्याचको पुरस्कार जिते । उनलाई नेपाल प्रोफेसनल गल्फ एशोसियसनका अध्यक्ष एवम् पुर्व राष्ट्रिय खेलाडी रबिन्द्रमान श्रेष्ठ र नेपाल पत्रकार महासंघ बाँकेका अध्यक्ष दामोदर भण्डारीले पुरस्कृत गरे ।

चौथो खेलमा ड्रिमल्याण्डले लक्ष्मी मावि बर्दहवालाई ३–० ले हरायो । ड्रिमल्याण्डको जीतमा विवश न्यौपानेले २२औं र ५३औं मिनेटमा दुई गोल र अमृत रोकाले ४२औं मिनेटमा गोल गरेका थिए । खेलमा ड्रिमल्याण्डका विवश न्यौपाने म्यान अफ द म्याच घोषित भए । उनलाई महिला उद्यमी संघ नेपाल बाँकेको प्रथम उपाध्यक्ष एवम् जिल्ला खेलकुद विकास समिति बाँके सदस्य रेवती सिंहले पुरस्कृत गरिन् ।

बाँके जिल्ला फुटबल संघको आयोजना र नेपालगञ्ज उपमहानगरपालिकाको सहयोगमा भइरहेको प्रतियोगितामा २८ छात्र टिमको सहभागिता रहेको छ । प्रतियोगिताको फाइनल खेल माघ २४ गते हुनेछ ।

प्रकाशित मिति: बिहीबार, माघ १८, २०८० १९:५८

प्रतिक्रिया दिनुहोस्