न्यू डाँफे कप फुटबलको फाइनलमा बाग्मती र न्यु दर्पण भिड्ने

खेलकुद

गृहपृष्ठ
खेलकुद
न्यू डाँफे कप फुटबलको फाइनलमा बाग्मती र न्यु दर्पण भिड्ने

न्यू डाँफे कप फुटबलको फाइनलमा बाग्मती र न्यु दर्पण भिड्ने

सोमबार, माघ २२, २०८० बागेश्वरी पोस्ट

नेपालगञ्ज । बाँकेको खजुरामा जारी नवौँ डाँफे कप नक आउट फुटबल खेल प्रतियोगिताको दोस्रो सेमिफाइनल खेलमा न्यु दर्पण युवा क्लबले रेसिङ सहारालाई हराउँदै फाइनल प्रवेश गरेको छ ।

आज खजुराको मिनी रंगशाला मैदानमा भएको दोस्रो सेमिफाइनल खेलमा ३–० को गोल अन्तरले न्यु दर्पण विजयी भएको हो । खेलको पहिलो हाफसम्म कुनै पनि गोल हुन नसकेकोमा दोस्रो हाफको १३औँ मिनेटमा न्यु दर्पण युवा क्लबका धनसिंह विकले पहिलो गोल गरे । लगत्तै २१औँ मिनेटमा न्यु दर्पणका भुपेन्द्र शाहीले अर्को गोल गरेर टिमलाई थप अग्रता दिलाए । खेलको दोस्रो हाफको २६औँ मिनेटमा पुनः धनसिंह विकले थप अर्को गोल गरेका थिए । विकको थप गोल नै खेलको अन्तिम गोल रह्यो ।

म्यान अफ द म्याच न्यु दर्पणबाट दुई गोल गर्ने धनसिंह बने । प्रचार संयोजक खगेन्द्र दाहालका अनुसार म्यान अफ द म्याच घोषित खेलाडी विकले नेपालगञ्जमा रहेको थोपा प्रयोगशालाको तर्फबाट नगद ११ सय प्राप्त गरे । म्यान अफ द म्याचको पुरस्कार थोपा प्रयोगशालाका सिइओ सुलभ आचार्यले प्रदान गरेका थिए ।

खेल संयोजक तिलकवीर सुनारका अनुसार माघ १५ गतेदेखि सञ्चालनमा रहेको नवौँ डाँफे कप नक आउट फुटबल खेल प्रतियोगिताको फाइनल २३ गते मङ्गलवार दिनको १ बजेदेखि सञ्चालन हुनेछ । न्यु डाँफे स्पोर्ट्स क्लबका अध्यक्ष हरि प्रकाश विकका अनुसार नवौं डाँफे कप नक आउट फुटबल खेल प्रतियोगिताको विजेता टिमले नगद १ लाख ५५ हजार ५ सय ५५ रुपैयाँ नगद पाउनेछ ।

प्रथम पुरस्कार राशि हाल अमेरिकामा रहेका खजुरा गाउँपालिका वडा नम्बर ४ डिगाउँ निवासी लिल बहादुर थापाले सौजन्य गरेका हुन् । प्रतियोगितामा उपविजेता हुने टिमलाई ८५ हजार ५ सय ५५ रुपैयाँले पुरस्कृत गरिनेछ । दोस्रो पुरस्कार प्रतिक निर्माण सेवाले सौजन्य गरेको खेल संयोजक तिलकवीर सुनारले बताए । साथमा विजेता र उपविजेता टिमलाई मेडल तथा प्रमाणपत्रबाट पुरस्कृत गरिने प्रतियोगितामा उत्कृष्ट खेलाडी, गोलकिपर र सर्वाधिक गोलकर्तालाई पनि नगद २ हजार ५ सय प्रदान गरिने क्लबका अध्यक्ष बिकले बताए । प्रतियोगितामा १४ टिमले भाग लिएका छन् । फाइनल खेल अब बाग्मती स्पोर्ट्स क्लब र न्यु दर्पण युवा क्लबबीच हुनेछ ।

प्रकाशित मिति: सोमबार, माघ २२, २०८० २०:४३

प्रतिक्रिया दिनुहोस्