मेयर कप फुटबलः सेन्ट जेभियर्स र नेपालगञ्ज मोडेल एकेडेमी च्याम्पियन

खेलकुद

गृहपृष्ठ
खेलकुद
मेयर कप फुटबलः सेन्ट जेभियर्स र नेपालगञ्ज मोडेल एकेडेमी च्याम्पियन

मेयर कप फुटबलः सेन्ट जेभियर्स र नेपालगञ्ज मोडेल एकेडेमी च्याम्पियन

बुधबार, माघ २४, २०८० बागेश्वरी पोस्ट

नेपालगञ्ज । नेपालगञ्ज सेन्ट जेभियर्स स्कुल (छात्र) र नेपालगञ्ज मोडेल एकेडेमी (छात्रा) मेयर कप अन्तर विद्यालय छात्र–छात्रा फुटबल प्रतियोगिताको च्याम्पियन बनेका छन् ।

नेपालगञ्जमा आज भएको फाइनल खेलमा नेपालगञ्ज सेन्ट जेभियर्सले नेपालगञ्ज मोडेल एकेडेमीलाई २–० ले पराजित गरेको छ । सेन्ट जेभियर्सको जीतमा सुमित थापाले ६०औं र ६७औं मिनेटमा गोल गरेका थिए । फाइनल खेलको म्यान अफ द म्याच समेत भएका सुमितलाई नेपालगञ्ज उप–महानगरपालिका उप–मेयर कमरुद्दिन राईले पुरस्कार प्रदान गरेका थिए ।

आजै भएको छात्रा तर्फको फाइनलमा खेलमा नेपालगञ्ज मोडेल एकेडेमीले बाँके खजुराको मनकामना माविलाई २–० ले हराउँदै च्याम्पियन बनेको छ । नेपालगञ्ज मोडेल एकेडेमीको जीतमा तिलसरा बुढाले २०औं मिनेट र चमेली चौधरीले ५०औं मिनेटमा गोल गरेका थिए ।

फाइनल खेलमा वुमन अफ द म्याच नेपालगञ्ज मोडेल एकेडेमीकी तिलसरा बुढा हुन सफल भइन् । उनलाई युवा व्यवसायी ओम सप्लायर्सका प्रमुख बल बहादुर विष्ट (बबी) ले पुरस्कुत गरेका थिए ।

बाँके जिल्ला फुटबल संघको आयोजना र नेपालगञ्ज उप–महानगरपालिकाको सहयोगमा भएको प्रतियोगितामा नेपालगञ्ज सेन्ट जेभियर्सका सुमित थापा र मनकामना मावि खजुराकी खेलाडी लक्ष्मी विक सर्वोत्कृष्ट खेलाडी घोषित भए । प्रतियोगितामा अनुशासित टिमको पुरस्कार जीवन ज्योती स्कुल कोहलपुरले प्राप्त गरेको छ ।

प्रतियोगिताका विजयी खेलाडीलाई नेपालगञ्ज उप–महानगरपालिका मेयर प्रशान्त विष्ट, उप–मेयर कमरुद्दिन राई, आयोजक बाँके जिल्ला फुटबल संघका अध्यक्ष एवम् एन्फा केन्द्रिय सदस्य भोजराज शाही, नेपालगञ्ज उप–महानगरपालिका वडा नम्बर १ अध्यक्ष एवम् प्रवक्ता प्रमोद रिजाल, सदस्य जगमोहन कादु, एचसीआरसी हस्पिटलका व्यवस्थापक रमेश सिटौला, जीवन ज्योती स्कुलका प्रिन्सिपल फादर जोमन जेम्स, नेपालगञ्ज उप–महानगरपालिका शिक्षा महाशाखा प्रमुख उप–सचिव गोर्ख बहादुर थापा, एन्फा बाँके उपाध्यक्ष एवम् प्रतियोगिता संयोजक निर्मल चन्द, एन्फाका पूर्व उपाध्यक्ष गोबद्र्धन सिंह सम्झना, नेपाल इ–रिक्सा व्यवसायी संघ बाँकेका अध्यक्ष कुमार सिंह ठकुरी लगायतले पुरस्कृत गरेका थिए ।

धम्बोझीस्थित एन्फा ग्रासरुट फुटबल एकेडेमीमा ११ दिनसम्म चलेको प्रतियोगितामा बाँके जिल्लाका ८ स्थानीय तहका ३३ विद्यालयका ६ सय भन्दा बढी खेलाडीको सहभागिता रहेको थियो ।

प्रतियोगितामा छात्रतर्फ २८ वटा र छात्रातर्फ ५ वटा स्कूलले भाग लिएका थिए । प्रतियोगिताको विजेताले २१ हजार र उपविजेता टिमले ११ हजार प्राप्त गरेको छ ।

प्रकाशित मिति: बुधबार, माघ २४, २०८० २०:२२