सुशील कोइराला मेमोरियल महिला क्रिकेटः कोहलपुर मेयर-११ फाइनल प्रवेश

खेलकुद

गृहपृष्ठ
खेलकुद
सुशील कोइराला मेमोरियल महिला क्रिकेटः कोहलपुर मेयर-११ फाइनल प्रवेश

सुशील कोइराला मेमोरियल महिला क्रिकेटः कोहलपुर मेयर-११ फाइनल प्रवेश

मंगलबार, फागुन १, २०८० बागेश्वरी पोस्ट

नेपालगञ्ज । कोहलपुर मेयर-११ एक खेल अगावै बाँकेको कोहलपुरमा जारी सुशील कोइराला मेमोरियल अन्डर नाइन्टिन महिला राष्ट्रिय टि-ट्वान्टी क्रिकेट प्रतियोगिताको फाइनलमा प्रवेश गरेको छ ।

प्रतियोगिता अन्तर्गत चौथो दिन सम्पन्न दुई खेलमा बागमती प्रदेश र कोहलपुर मेयर-११ विजयी भएका छन् । बागमतीले गण्डकीलाई तथा मेयर-११ ले सुदूरपश्चिम प्रदेशलाई पराजित गर्यो ।

कोहलपुर प्रस्तावित अन्तर्राष्ट्रिय मैदानमा आज सम्पन्न पहिलो खेलमा गण्डकी प्रदेशले बागमती प्रदेशलाई ७ विकेटले पराजित गर्यो । गण्डकीले दिएको ५७ रनको लक्ष्य बागमतीले ३ विकेट गुमाएर पुरा गर्यो । बागमतीको लागि एली यादवले १५ तथा बिपिशा शाहीले १२ रन योगदान दिए । गण्डकीको बलिंगमा निरुता जीटि, रचना चौधरी र सिमाना केसीले १/१ विकेट लिए ।

यसअघि टस जितेर ब्याटिंग गरेको गण्डकीले पूरै २० ओभर ब्याटिंग गरेता पनि ८ विकेट क्षतीमा ५६ रन बनायो । गण्डकीको लागि कप्तान कुसुम गोदरले सर्वाधिक १७ रन, रचना चौधरीले १० रन बनाउनु बाहेक अन्य ब्याटरले दोहोरो अंकमा रन जोड्न सकेनन् । बागमतीकी बलर मनिषा उपाध्यायले २ विकेट तथा क्रिश्मा गुरुङले १ विकेट लिए । प्लेयर अफ द म्याच घोषित देब्रे हाते स्पिनर मनिषाले ४ ओभरमा २ ओभर मेडन गर्दै ३ रन मात्र खर्चिन् । बागमतीले अन्य ५ विकेट रन आउटमार्फत पायो ।

आज सम्पन्न दोश्रो खेलमा कोहलपुर मेयर-११ ले सुदूरपश्चिम प्रदेशलाई ६ विकेटले पराजित गर्यो । सुदूरपश्चिमले दिएको ९२ रनको लक्ष्य कोहलपुर मेयर-११ ले ४ विकेट गुमाएर १७.४ ओभरमा भेटायो । कोहलपुर मेयर-११ को ब्याटिंगमा साना प्रविनले सर्वाधिक ३९ रन बनाइन्, जुन क्रममा ४८ बलमा ४ चौका र १ छक्का प्रहार गरिन् । प्रतिमा शाहले अविजित १८ रन बनाइन् । सुदूरपश्चिमको बलिंगमा रबिना साउदले २ तथा स्नेहा महरा र निशा खडायतले १/१ विकेट लिए ।

टस जितेर ब्याटिंग गरेको सुदूरपश्चिमले १९.३ ओभरमा सबै विकेट गुमाएर ९१ रन बनायो । सुदूरपश्चिमको लागि सावित्री धामीले सर्वाधिक ४६ रन योगदान दिइन्, जुन क्रममा उनले ४४ बलमा ४ चौका प्रहार गरिन् । रबिना साउदले ११ तथा अनु कडायतले १० रन बनाइन् । कोहलपुर मेयर-११ को बलिंगमा भवानी कमातीले सर्वाधिक ३ विकेट लिइन् । प्लेयर अफ द म्याच घोषित कमातीले ३.३ ओभरमा १४ रन खर्चिन् । आरती महतोले २ विकेट लिँदा हैमवती रोय र तृष्णा बिश्वकर्माले १/१ विकेट लिए ।

सबै तीन खेलमा जित दर्ता गरेको कोहलपुर मेयर-११ कुल ६ अंकसहित अंकतालिकाको शिर्षमा छ, जसले फाइनलमा स्थान पक्का गरेको छ । यस्तै बागमती प्रदेश ३ खेलमा २ जित र १ हारपछि ४ अंक सहित तेश्रो स्थानमा छ । समान नतिजा र अंकसहित गण्डकी प्रदेश नेट रन रेटमा अघि रहँदै दोश्रो स्थानमा छ । ३ खेलमा २ अंकसहित सुदूरपश्चिम चौथो तथा तीन खेलमा पराजित हुँदै अंकविहिन लुम्बिनी प्रदेश पाँचौ स्थानमा छ ।

प्रतियोगिता अन्तर्गत पाँचौ दिन पनि दुई खेल हुनेछन् । पहिलो खेलमा विहान ९.३० बजे सुदूरपश्चिम प्रदेश र लुम्बिनी प्रदेश तथा दोश्रो खेल दिउँसो १.३० बजे बागमती प्रदेश र कोहलपुर मेयर ११ प्रतिस्पर्धा गर्नेछन् ।

प्रतियोगितामा कोहलपुर मेयर-११, लुम्विनी प्रदेश, गण्डकी प्रदेश, बागमती प्रदेश र सुदूरपश्चिम प्रदेश सहभागी छन् । सबै टिमले एकअर्कासंग एक खेल खेलेपछि अंकतालिकाको शिर्ष स्थानमा रहने दुई टिमले फाइनल खेल्नेछन् ।

प्रकाशित मिति: मंगलबार, फागुन १, २०८० २०:३६