‘राजितराम पाठक स्मृति नागरिक समाज सेवा पुरस्कार’ स्थापना

शिक्षा

गृहपृष्ठ
शिक्षा
‘राजितराम पाठक स्मृति नागरिक समाज सेवा पुरस्कार’ स्थापना

‘राजितराम पाठक स्मृति नागरिक समाज सेवा पुरस्कार’ स्थापना

बुधबार, फागुन २, २०८० बागेश्वरी पोस्ट

नेपालगञ्ज । शिक्षा र सामाजिक सेवाको क्षेत्रमा विशेष योगदान पुर्याएका स्वर्गीय राजितराम पाठकको स्मृतिमा पुरस्कार स्थापना गरिएको छ । उनको सम्मानका लागि शिक्षा, सामाजिक सेवा र नागरिक समाजको क्षेत्रमा काम गर्ने एक जनालाई वार्षिकरुपमा नगदसहित पुरस्कार प्रदान गरिनेछ । बाँके शिक्षा क्याम्पस नेपालगञ्जमा आज बसन्त पञ्चमीमा सरस्वती पूजा तथा सांस्कृतिक कार्यक्रमको अवसरमा क्याम्पसका संचालक कृष्णा पाठकले पुरस्कारका लागि अक्षयकोष स्थापना गरेकी हुन् ।

नागरिक अभियानको क्षेत्रमा सक्रियरुपमा काम गर्दै आएको सूचना र मानव अधिकार अनुसन्धान केन्द्र संस्थालाई उक्त पुरस्कार स्थापनाका लागि रु. ५० हजार बराबरको अक्षयकोषमा रकम हस्तान्तरण गरिएको छ । क्याम्पसमा आज आयोजित विशेष कार्यक्रममा उक्त पुरस्कारको घोषणा गरिएको संस्थाका अध्यक्ष विश्वजित तिवारीले बताए ।

स्वर्गीय पाठक बाँके शिक्षा क्पाम्पसको संस्थापक, महेन्द्र बहुमुखी नेपालगञ्जका क्याम्पस प्रमुख भएका थिए । उनले नेपालगञ्जमा बसेर लामो समयदेखि शिक्षा, सामाजिक सेवा र नागरिक समाजको अभियानमा सक्रियरुपमा भुमिका निर्वाह गरेका थिए । क्यान्सर रोगबाट पीडित पाठकको २०७८ साल साउन १७ गते निधन भएको थियो ।

क्याम्पसले उनको स्मृतिमा छात्रबृत्ति कोष समेत स्थापना गरेको छ । विद्यालयमा प्रारम्भिक कक्षादेखि १२ कक्षासम्म प्रत्येक कक्षाका दुई जना विद्यार्थीलाई वर्षभरि निःशुल्क अध्ययन गराइनेछ । त्यसका लागि गरिब, जेहेन्दार र लगनशील विद्यार्थी मापदण्डका आधारमा छनौट गरिने स्वर्गीय पाठककी श्रीमती समेत रहेकी क्याम्पस सञ्चालक कृष्णाले बताइन् । आज स्थापना गरिएको पुरस्कार स्वर्गीय पाठकको जन्मोत्सव तथा स्मृतिको अवसरमा प्रदान गरिने संस्थाले जनाएको छ ।

प्रकाशित मिति: बुधबार, फागुन २, २०८० २०:०४

प्रतिक्रिया दिनुहोस्