नेपालगञ्जमा सञ्चालित 'एन्फा कम्युनिटी कोचिङ कोर्श' सम्पन्न

खेलकुद

गृहपृष्ठ
खेलकुद
नेपालगञ्जमा सञ्चालित 'एन्फा कम्युनिटी कोचिङ कोर्श' सम्पन्न

नेपालगञ्जमा सञ्चालित 'एन्फा कम्युनिटी कोचिङ कोर्श' सम्पन्न

शुक्रबार, चैत ९, २०८० बागेश्वरी पोस्ट

नेपालगञ्ज । बाँके जिल्ला फुटबल संघको आयोजनामा भएको एन्फा कम्युनिटी कोचिङ कोर्श सम्पन्न भएको छ । चैत ६ देखि सञ्चालन भएको एन्फा कम्युनिटी कोचिङ कोर्शमा बाँके, बर्दिया, सुर्खेत, दाङ, कैलाल, डोटी, कालिकोट, काठमाडौं लगायतका जिल्लाबाट ४३ जनाको सहभागिता रहेको थियो ।

कोर्शमा सहभागी भएकाहरुलाई आज प्रमाणपत्र प्रदान गरिएको थियो । एन्फा कम्युनिटी कोचिङ कोर्शमा सहभागी भएकाहरुलाई नेपालगञ्ज उप–महानगरपालिकाका प्रमुख प्रशान्त विष्ट, आयोजक बाँके जिल्ला फुटबल संघका अध्यक्ष एवम् एन्फा केन्द्रिय सदस्य भोजराज शाही, एन्फाका पूर्व उपाध्यक्ष गोवर्धन सिंह सम्झना, राप्रपा नेपालका सहायक महामन्त्री तेजबिक्रम शाह, एन्फा कार्यवहाक प्राविधिक निर्देशक एवम् नेपाली राष्ट्रिय फुटबल टिमका पूर्व कप्तान हरि खड्का, एन्फा हेड अफ कोच एजुकेशन संजित सिंह लगायतले प्रमाणपत्र प्रदान गरेका थिए ।

चार दिनसम्म चलेको एन्फा कम्युनिटी कोचिङ कोर्शमा सहभागी भएकाहरुलाई एन्फा कार्यवहाक प्राविधिक निर्देशक एवम् नेपाली राष्ट्रिय फुटबल टिमका पूर्व कप्तान खड्का र एन्फा हेड अफ कोच एजुकेशन सिंहले प्रशिक्षण दिएका थिए । एन्फाले ५ वर्ष अघिदेखि एन्फा कम्युनिटी कोर्शको सुरुआत गरेको हो । बाँकेमा सम्पन्न कोर्शमा ३२औं ब्याचले प्रशिक्षण लिएको छ ।

प्रमाणपत्र वितरण कार्यक्रममा नगर प्रमुख विष्टले फुटबलको विकासमा प्रशिक्षण कार्यक्रमले प्रभावकारी भूमिका निर्वाह गर्ने बताए । फुटबलको विकासमा नगरपालिका सधैं सकारात्मक भएर अगाडि बढिरहेको भन्दै विष्टले आगामी दिनमा पनि संघसँग सहकार्य गरेर अगाडि बढ्ने बताए । पूर्व कप्तान खड्काले दक्ष प्रशिक्षक बिना फुटबलमा सफलता हासिल गर्न असम्भव भएको भन्दै प्रशिक्षणलाई व्यवहारमा प्रयोग गर्नुपर्ने बताए ।

आयोजक बाँके जिल्ला फुटबल संघका अध्यक्ष शाहीले प्रशिक्षण सम्पन्न गर्न सहयोग गर्ने अखिल नेपाल फुटबल संघ, प्रशिक्षकहरु र सहभागीहरुलाई धन्यवाद दिए । संघले आगामी दिनमा फुटबलको विकासका लागि अन्य थुप्रै कार्यक्रम गर्ने तयारी गरेको उनले जानकारी गराएका थिए । कार्यक्रममा बाँके जिल्ला फुटबल संघका उपाध्यक्ष निर्मल चन्दले थुप्रै चुनौतिका बीच संघले फुटबल विकासका लागि काम गर्ने प्रयास गरिरहेको बताए । एन्फाका पूर्व उपाध्यक्ष सम्झनाले तालिम लिएका प्रशिक्षकले लगनशील भएर फुटबल प्रशिक्षण गराउँदै प्रतिभाशाली खेलाडी उत्पादनमा योगदान दिनुपर्ने बताए ।

प्रकाशित मिति: शुक्रबार, चैत ९, २०८० १९:२२