बाँकेको यु–१३ छनोट फुटबलमा उत्साहजनक सहभागिता

खेलकुद

गृहपृष्ठ
खेलकुद
बाँकेको यु–१३ छनोट फुटबलमा उत्साहजनक सहभागिता

बाँकेको यु–१३ छनोट फुटबलमा उत्साहजनक सहभागिता

शनिबार, चैत १७, २०८० बागेश्वरी पोस्ट

नेपालगञ्ज । बाँके जिल्ला फुटबल संघले गरेको यु–१३ छात्र–छात्रा फुटबल छनोट कार्यक्रममा उत्साहजनकरुपमा खेलाडीहरुको सहभागिता देखिएको छ । संघले शनिबार नेपालगन्जमा एक दिन छनोट कार्यक्रमको आयोजना गरेको थियो । तर, सहभागी खेलाडीहरुको संख्या धेरै भएपछि छनोट कार्यक्रम लम्बाएर आइतबार पनि गर्ने बाँके जिल्ला फुटबल संघका अध्यक्ष भोजराज शाहीले बताए । अखिल नेपाल फुटबल संघको युवा विकास परियोजना अन्तर्गत २०८१ को लागि छनोट कार्यक्रम गरिएको हो ।

जिल्ला, प्रदेश हुँदै राष्ट्रिय स्तरको छनोटमा परेका खेलाडीहरुलाई एन्फा अन्तर्गतका विभिन्न टेक्निकल सेन्टरमा संचालन भएका एकेडेमीमा रहेर फुटबल खेल्ने मौका मिल्नेछ । बाँकेमा भएको छनोट फुटबलमा २ सय १५ जनाको सहभागिता रहेको अध्यक्ष शाहीले बताए । त्यसमा १ सय ८५ छात्र र ३० छात्रा खेलाडी रहेका छन् । पहिलो चरणको छनोटमा ८९ जना छात्र र ९ जना छात्रा खेलाडी छनोट गरिएको संघले जानकारी गराएको छ । आइतबार अन्तिम चरणको छनोट हुनेछ । शनिबार भएको छनोट कार्यक्रमले फुटबल विकासमा निकै उत्साह थपेको अध्यक्ष शाहीले बताए ।

उनले भने, ‘फुटबलमा बालबालिकाको क्रेज निकै राम्रो छ । यति धेरै सहभागिता हुन्छ भन्ने हामीले सोचेको थिएनौं । अभिभावकहरुले आफना बालबालिकालाई फुटबल खेलाउन निकै चासो दिनु भएको छ । यसले भविष्यमा हाम्रो फुटबलको स्तर र राम्रा खेलाडी उत्पादनमा सहयोग गर्नेछ ।’ नेपालगन्ज रंगशालमा धेरैपछि फुटबलको गतिविधि भइरहेको बताउँदै अध्यक्ष शाहीले बाँकेमा अब फुटबलको लोकप्रियता फेरि बढ्न थालेको बताए । पछिल्लो समय बाँके जिल्ला फुटबल संघले सक्रिय भएर गतिविधिहरु संचालन गरिरहेको छ । संघले कोभिड–१९ पछि पहिलोपटक गत माघ महिनामा मेयर कप अन्तर विद्यालय छात्र–छात्र फुटबल प्रतियोगिताको आयोजना गरेको थियो । जुन प्रतियोगितामा बाँके जिल्लाका विभिन्न विद्यालयबाट तीन दर्जन विद्यालय सहभागिता रहेको थियो । फागुनमा संघले कैलाली जिल्लाको मेयर कप फुटबलको पुर्व विजेता गुरुकुल इङलिस र बाँकेको मेयर कप फुटबलको विजेता टिम नेपालगन्ज सेन्ट जेभियर्स छात्र टिमबीच मैत्रीपुर्ण फुटबलको आयोजना गरेको थियो ।

समुदाय स्तरबाट फुटबलका प्रतिभावान खेलाडी उत्पादन गर्न महत्वपूर्ण भूमिका खेल्ने प्रशिक्षकहरुको लागि संघले समेत कार्यक्रम गरेको थियो । अखिल नेपाल फुटबल संघका केन्द्रिय सदस्य समेत रहेका शाहीका अनुसार संघले चैतको ६ देखि ९ गतेसम्म नेपालगन्जमा एन्फा कम्युनिटी कोचिङ कोर्षको आयोजना गरेको थियो । जहाँ बाँके, बर्दिया, सुर्खेत, दाङ, कैलाली, डोटी, कालिकोट, काठमाडौं लगायतका जिल्लाबाट ४३ जना प्रशिक्षकको सहभागिता रहेको थियो । नेपालगन्जमा रंगशालामा दुई दिनसम्म भएको छनोट कार्यक्रमबाट छानिएका खेलाडीहरुलाई प्रदेश स्तरको छनोटमा समावेश गराइनेछ ।

प्रकाशित मिति: शनिबार, चैत १७, २०८० २१:३६

प्रतिक्रिया दिनुहोस्