अपराजित बन्दै नेपाल सेमिफाइनलमा, ६ विकेटले साउदी पराजित

खेलकुद

गृहपृष्ठ
खेलकुद
अपराजित बन्दै नेपाल सेमिफाइनलमा, ६ विकेटले साउदी पराजित

अपराजित बन्दै नेपाल सेमिफाइनलमा, ६ विकेटले साउदी पराजित

बुधबार, वैशाख ५, २०८१ बागेश्वरी पोस्ट

काठमाडौं । ओमानमा जारी एसिसी प्रिमियर कप २०२४ को सेमिफाइनलमा पुगिसकेको नेपालले समूह "ए" अन्तर्गतको अन्तिम खेलमा साउदी अरेबियालाई पराजित गरेको छ । साउदी अरेबियाले दिएको ७४ रनको लक्ष्य भेटाउँदै नेपालले साउदी अरेबियालाई ६ विकेटले पराजित गरेको हो । यो लगातार नेपालको चौथो जित हो ।

निर्धारित समय भन्दा ढिलो सुरु भइ २० ओभरको खेललाई ८ ओभरमा झारिएको खेलमा नेपालले टस जितेर साउदी अरेबियालाई पहिलो ब्याटिङको निम्तो दिएको थियो । साउदीले ८ ओभर खेल्दै ७ विकेट गुमाएर ७३ रन बनाएको हो ।

जवाफी ब्याटिङमा उत्रिएको नेपालले ७.२ ओभरमा (४ बल बाँकि छँदै) ४ विकेट गुमाउँदै ७५ रन बनाएको हो । नेपालका लागि अविजित रहँदै गुल्शन झाले सर्वाधिक १९ बलमा ३२ र कप्तान रोहित पौडेलले ७ बलमा १६ रन बनाए । दीपेन्द्रसिंह ऐरीले १७ रन बनाए । ओपनर कुशल भुर्तेल शुन्यमा तथा आशिफ शेख र कुशल मल्ल २-२ रन बनाएर आउट भएका हुन् ।

नेपालविरुद्ध साउदीका इस्तियाक अहमदले २, उस्मान नजिब र बाजि उल हसनले १-१ विकेट लिए ।

साउदीले गरेको ब्याटिङमा अब्दुल वाहिदले १६ बलमा सर्वाधिक ३७ रन बनाए भने अन्य कुनै खेलाडीले दोहोरो अंकको रन बनाउन सकेनन् । साउदीविरुद्ध नेपालका करण केसी र अभिनाश बोहराले २-२ तथा प्रतिश जिसी र ललित राजवंशीले १-१ विकेट लिए ।

आजको जितसँगै नेपाल आफ्नो समूहमा सबै खेल जित्ने एक मात्र राष्ट्र बन्दै समूह विजेता बनेर अन्तिम चारमा पुगेको छ । त्यसो त नेपाल साउदी अरेबियासँग खेल्नु अघि नै सेमिफाइनलमा पुगे पनि आजको जितबाट सबै खेल जित्दै विजेता बन्दै औपचारिक रुपमा अन्तिम चारमा पुगेको हो ।

यसअघिको पहिलो खेलमा नेपालले मलेसियालाई ५ विकेट , कतारलाई ३२ रन र हङकङलाई ८ विकेटले पराजित गरेको थियो ।

नेपाल रहेको समूह ए मा कतार, साउदी अरेबिया, हङकङ र मलेसिया र हङकङ रहेको समूहबाट नेपाल समूह विजेता र हङकङ उपविजेता बन्दै सेमिफाइनलमा प्रवेश गरेका छन् ।

त्यस्तै समूह बी मा ओमान, यूएई, कम्बोडिया र बहराइन छन् । समूह बी को ओमान ३ खेल जित्दै सेमिफाइनलमा प्रवेश गरिसकेको अवस्थामा कुवेत ४ अंकका साथ दोस्रो, यूएई ४ अंकका साथ तेस्रो, बहाराइन २ अंकका साथ चौथो र कम्बोडिया शुन्य अंकका साथ पाँचौ स्थानमा छ ।

समूह बी को आजको खेल ओमान र कुवेतबीच र यूएई कम्बोडियाबीच हुँदैछ । समूह ए बाट सेमिफाइनलमा पुगिसकेको ओमानसँगै सेमिफाइनलमा पुग्ने अर्को राष्ट्रको टुंगो लाग्नेछ ।

सेमिफाइनलमा दुबै समूहका विजेता र उपविजेता टोली सेमिफाइनलमा जानेछन र दुई टोली फाइनलको यात्रा गर्नेछन् । फाइनल विजेता राष्ट्र आगामी एसिया कपमा सिधै छनौट हुनेछ । यसअघि नेपालले घरेलु मैदान यूएईलाई पराजित गर्दै एसिया कपमा पुगेको थियो ।

नेपाली टोलीमा रोहित पौडेल (कप्तान), कुशल भुर्तेल, आशिफ शेक, कुशल मल्ल, दीपेन्द्रसिंह ऐरी, विवेक यादव, अनिल साह, सन्दीप जोरा, गुल्शन झा, करण केसी, सोमपाल कामी, ललित राजवंशी, अभिनाश बोहरा र प्रतिश जिसी रहेका छन् ।

प्रकाशित मिति: बुधबार, वैशाख ५, २०८१ १६:१३