एसीसी प्रिमियर कपको फाइनलमा आज ओमान र यूएई भिड्दै

खेलकुद

गृहपृष्ठ
खेलकुद
एसीसी प्रिमियर कपको फाइनलमा आज ओमान र यूएई भिड्दै

एसीसी प्रिमियर कपको फाइनलमा आज ओमान र यूएई भिड्दै

आइतबार, वैशाख ९, २०८१ बागेश्वरी पोस्ट

काठमाडौं । ओमानमा जारी एसीसी प्रिमियर कप २०२४ को फाइनल खेल आज हुँदैछ । एसिया कपको छनौटका लागि हुने फाइनलमा प्रतियोगिताकै बलियो मानिएको ओमानले यूएईविरुद्ध खेल्दैछ । आजको फाइनल नेपाली समय अनुसार सवा ४ बजे हुनेछ ।

समूह चरणका सबै खेल जित्दै सेमिफाइनलमा पुगेको ओमानले हङकङलाई पराजित गर्दै फाइनलको यात्रा तय गरेको हो । त्यस्तै समूह चरणका ४ मध्ये ३ खेल जितेर सेमिफाइनलमा पुगेको यूएईले नेपाललाई हराउँदै फाइनल पुगेको हो । सेमिफाइनलमामा ओमानले हङकङलाई ४ विकेट तथा यूएईले नेपाललाई ६ विकेटले पराजित गरेका हुन् । फाइनल पुगेर एसीसी इमर्जिङ टिम्स एसिया कपमा छनौट भइसकेका ओमान र यूएई मध्येको फाइनल विजेता आगामी एसिया कपमा छनौट हुनेछ ।

यसअघि ओमान र यूएईबीच भएका ७ खेलमा ओमान ४ र यूएई ३ खेलमा विजयी बनेका छन् भने अल अमेरात मैदानमा भएका दुबै खेल ओमानले जितेको छ । यस प्रतियोगिताको पहिलो चरणको खेलमा पनि ओमान यूएईलाई ९ विकेटले पराजित गरेको थियो ।

समूह चरणको खेलमा ओमानले यूएईसहित कुवेत, बहराइन र कम्बोडियालाई पराजित गरेको थियो भने यूएईले कुवेत, बहराइन र कम्बोडियालाई पराजित गर्दा ओमानसँग हार बेहोरेको थियो ।

प्रतियोगिताको अपराजित ओमान एक बलियो टोली हो भने उपाधिको दाबेदार टोली नेपाललाई पराजित गरेको यूएईको मनोबल उच्च रहेको छ । गत एसिया कपमा छनौट हुन असफल रहेको यूएई यसपटक सफल हुन चाहन्छ भने घरेलु मैदानको फाइदा उठाउँदै अपराजित टोली ओमान उपाधि जित्ने दाउमा छ ।

प्रकाशित मिति: आइतबार, वैशाख ९, २०८१ १०:०२