वेष्ट इन्डिज नेपालसँग ४ विकेटले पराजित, रोहित पौडेलको उत्कृष्ट प्रदर्शन

खेलकुद

गृहपृष्ठ
खेलकुद
वेष्ट इन्डिज नेपालसँग ४ विकेटले पराजित, रोहित पौडेलको उत्कृष्ट प्रदर्शन

वेष्ट इन्डिज नेपालसँग ४ विकेटले पराजित, रोहित पौडेलको उत्कृष्ट प्रदर्शन

शनिबार, वैशाख १५, २०८१ बागेश्वरी पोस्ट

काठमाडौं । आजदेखि काठमाडौंमा सुरु भएको नेपाल र वेष्ट इन्डिज ए बीचको ५ टी-२० को पहिलो खेलमा नेपाल विजयी बनेको छ । वेष्ट इन्डिजलाई ४ विकेटले पराजित गर्दै नेपालले विजयी सुरुवात गरेको हो ।

टस हारेर पहिलो ब्याटिङ गरेको वेष्ट इन्डिज ए ले नेपाललाई दिएको २०५ रनको लक्ष्य पछ्याउँदै नेपालले १९.४ ओभरमा ६ विकेट गुमाउँदै २०६ रन बनाएको हो ।

नेपालका लागि कप्तान रोहित पौडेलको प्रदर्शन उत्कृष्ट रह्यो । उनले ५४ बलमा ११२ रन हाने । त्यस्तै दीपेन्द्रसिंह ऐरीले २४, कुशल भुर्तेलले १६, बिबेक यादव ७ तथा अनिल साहले ५ रन बनाए । गुल्शन झा र प्रतिश जिसीले नटआउट रहँदै क्रमश: ९ रन र ५ रन बनाए ।

वेष्ट इन्डिजका माय्थ्यु फोर्देले २, ओबेद म्याक्कोयले २ विकेट लिए ।

वेष्ट इन्डिज ए का लागि रोस्टन चेसले सर्वाधिक ७४ रन बनाए । त्यस्तै एलिक एत्जानाजेले ४७ रन जोडे । वेष्ट इन्डिज ए का अर्का केसी कार्टीले ३९ रन बनाएर आउट भए । वेष्ट इन्डिजका मुख्य ओपनर ब्याट्सम्यान जोनसन चार्ल्स शुन्य रनमै आउट भएका थिए ।

वेष्ट इन्डिज ए विरुद्ध नेपालका कमल ऐरी, रोहित पौडेल,अबिनाश बोहराले १-१ विकेट लिए ।

वेष्ट इन्डिज ए विरुद्धको खेलमा नेपाल रोहित पौडेलको कप्तानी उत्रेको छ । आज नेपालको प्लेइङ ११ मा कुशल भुर्तेल, अनिल शाह (विकेटकिपर), कप्तान रोहित पौडेल, गुलशन झा, दीपेन्द्रसिंह ऐरी, कुशल मल्ल, अभिनाश बोहरा, प्रतिश जिसी, विवेक यादव, ललित राजवंशी र कमलसिंह ऐरी छन् ।

त्यस्तै नेपाल टुरमा आएको वेस्ट इन्डिज ए टिममा रोस्टन चेस (कप्तान), एलिक एथानाजे , फेबियन एलन, कादिम एलीने, जोशुआ बिशप, केसी कार्टी, जोनसन चार्ल्स, मार्क देयल, आन्द्रे फ्लेचर, म्याथ्यू फोर्ड, ओबेद म्याककोय, गुडाकेश मोटी, किमो पल, ओशाने थोमस र हेडेन वाल्श रहेका छन् ।

सार्वजनिक खेल तालिका अनुसार नेपाल र वेस्ट इण्डिज ए बीचको दोस्रो खेल अप्रिल २८ मा, तेस्रो मे १ मा चौथो मे २ मा र पाँचौ मे ४ मा हुनेछ ।

त्यस्तै वेष्ट इन्डिज नेपालमा पहिलोपटक टी-२० खेल्न आउँदा जुन २ तारिखमा वेष्ट इन्डिज र अमेरिकाको संयुक्त आयोजनामा हुने विश्वकपको तयारीका लागि नेपाललाई यो निकै राम्रो अवसर रहेको छ ।

प्रकाशित मिति: शनिबार, वैशाख १५, २०८१ १६:१२