सदस्यता बिवाद नटुंगाई जबरजस्ती गरे आन्दोलनमा जाने प्रेस युनियनको चेतावनी

राजनीति

गृहपृष्ठ
राजनीति
सदस्यता बिवाद नटुंगाई जबरजस्ती गरे आन्दोलनमा जाने प्रेस युनियनको चेतावनी

सदस्यता बिवाद नटुंगाई जबरजस्ती गरे आन्दोलनमा जाने प्रेस युनियनको चेतावनी

बिहीबार, जेठ ३१, २०८१ बागेश्वरी पोस्ट

नेपालगञ्ज । नेपाल पत्रकार महासंघको सदस्यता वितरणमा देखिएको अन्योल र विवादप्रति नेपाल प्रेस युनियनले आफ्नो गम्भीर ध्यानाकर्षण भएको जनाएको छ । सदस्यता विवादकै कारण पत्रकार महासंघको २७औं महाधिवेशनले २०८१ जेठ २६ गते गर्ने तय गरेको शाखा, प्रदेश र केन्द्रीय समितिको निर्वाचन प्रभावित भएको छ । महासंघले २०८१ असार दोस्रो साताभित्र निर्वाचन गर्ने प्रतिवद्धता जनाएको छ । पूर्व निर्धारित मितिमा निर्वाचन हुन नसकेकोमा युनियनले दुःख व्यक्त गर्दै पछिल्लो पटक निर्धारण गरिएको मितिमा निर्वाचन सम्पन्न गर्न आवश्यक सहयोग गर्ने प्रतिवद्धता व्यक्त गरेको छ ।

"महासंघका शाखा र प्रदेशले पठाएका सदस्यको नाम केन्द्रीय नेतृत्वले हटाएर अमुक सङ्गठनमा आस्था राख्नेलाई सहयोग पुग्ने गरी विधि र प्रक्रिया विपरीत आफूखुशी केन्द्रबाट सदस्यको नाम थपेर गैरपत्रकारलाई सदस्यता दिई सूची तयार गरेका कारण यो अवस्था सिर्जना भएको हो । महासंघ नेतृत्वले सदस्यता विवाद टुंगाउन नसक्दा निर्वाचन प्रभावित भएको छ," अध्यक्ष शिव लम्सालद्वारा जारी विज्ञप्तीमा भनिएको छ ।

May be an illustration of blueprint and text

नेपाल प्रेस युनियनले महासंघको सदस्यतामा देखिएको विवाद सुल्झाउन पहलकदमी लिँदै पत्रकारका पेशागत सहकर्मी संगठनसँग निरन्तर छलफल र समन्वय गर्दै आएको उल्लेख गरेको छ । "महासंघकै शाखा र प्रदेश समितिले पठाएको नामावलीलाई आधार मानेर छुटेका सक्रिय पत्रकारलाई महासंघको विधि र प्रक्रिया अनुसार समावेश गरी सदस्यता टुंग्याएर अन्तिम मतदाता नामावली सार्वजनिक गरी निर्वाचन प्रक्रिया अघि बढाउन नेपाल प्रेस युनियन अधिकतम लचिलो हुँदै आएको छ," विज्ञप्तीमा भनिएको छ-"महासंघले सुरु गरेको सदस्यता शुद्धिकरण अभियानलाई साथ दिँदै सक्रिय पत्रकार नछुट्ने गरी सदस्यता सूची तयार गर्न पटक–पटक आग्रह गर्दा पनि सुनुवाई हुन सकेको छैन । नेपाल प्रेस युनियन महासंघको विधान अनुसार सदस्यता विवाद सुल्झाएर थप गरिएको मितिमा निर्वाचन सुनिश्चित गर्ने वातावरण तयार गर्न नेपाल पत्रकार महासंघको नेतृत्व लगायत पत्रकार सम्बद्ध सबै पेशागत संस्थाहरूलाई अपिल गर्दछ ।"

विवाद समाधान नगरेरै यथास्थितिमा पत्रकार महासंघले सदस्यताको नामावली सार्वजनिक गरेर जबरजस्ती ढंगले एकपक्षीय रूपमा निर्वाचन प्रक्रिया अघि बढाए नेपाल प्रेस युनियनले त्यसलाई अस्वीकार गरी आन्दोलनमा उत्रिने चेतावनी समेत दिएको छ ।

प्रकाशित मिति: बिहीबार, जेठ ३१, २०८१ २१:०१