‘ए’ डिभिजन लिग फुटबलः रोयल र न्यु डाँफे विजयी

खेलकुद

गृहपृष्ठ
खेलकुद
‘ए’ डिभिजन लिग फुटबलः रोयल र न्यु डाँफे विजयी

‘ए’ डिभिजन लिग फुटबलः रोयल र न्यु डाँफे विजयी

आइतबार, असार २, २०८१ बागेश्वरी पोस्ट

नेपालगञ्ज । बाँके जिल्ला ‘ए’ डिभिजन लिग फुटबल प्रतियोगितामा रोयल नेपालगञ्ज फुटबल क्लब र न्यु डाँफे स्पोर्ट्स क्लबले आइतबार जीत हासिल गरेका छन् । कोहलपुरस्थित तेह्र विगाहा फुटबल मैदानमा भएको खेलमा रोयलले ओशोनिक क्लबलाई २–० ले पराजित गरेको छ । रोयलका लागि सुमित थापाले २ गोल गरे । उनले खेलको ८औं र ५०औं मिनेटमा गोल गरेका थिए । खेलमा रोयलका अविशेष यादव प्लेयर अफ द म्याचबाट पुरस्कृत भए । आइतबार बिहान भएको खेलमा न्यु डाँफे स्पोर्ट्स क्लबले जय किसान स्पोर्ट्स क्लबलाई १–० ले हरायो । न्यु डाँफेका लागि विशाल चन्दले निर्णायक गोल गरे । चन्द खेलको प्लेयर अफ द म्याचबाट पुरस्कृत भएका थिए ।

असारको १३ गतेसम्म चल्ने प्रतियोगिता लिगकम नकआउटको आधारमा भइरहेको छ । प्रतियोगितामा सहभागी क्लबलाई दुई समूहमा विभाजन गरिएको छ । प्रतियोगिताको समूह ‘ए’ मा कोहलपुर रेसिङ सहारा क्लब, धम्बोझी क्लब, नवदुर्गा युवा क्लब, कारकाँदो युवा स्पोर्ट्स क्लब, मिलन युवा स्पोर्ट्स क्लब रहेका छन् । यसैगरी समूह ‘बी’ मा न्यु डाँफे स्पोर्ट्स क्लब, जय किसान स्पोर्ट्स क्लब, रोयल नेपालगञ्ज एफसी र ओशोनिक क्लब रहेका छन् । समूह ‘ए’ र समूह ‘बी’ को विजेता र उप–विजेता टिमले सेमिफाइनलमा प्रतिष्पर्धा गर्नेछन् । प्रतियोगिताको विजेता टिमले बाँके जिल्लाको प्रतिनिधित्व गर्दै लुम्बिनी प्रदेश लिग फुटबलमा सहभागिता जनाउने अवसर पाउनेछ ।

प्रतियोगिता अन्तर्गत सोमबार बिहानको खेलमा मिलन युवा स्पोर्ट्स क्लब र नव दुर्गा युवा क्लबबीच प्रतिस्पर्धा हुनेछ । बेलुकाको खेलमा कोहलपुर रेसिङ सहारा क्लब र कारकाँदो युवा स्पोर्ट्स क्लबबीच प्रतिष्पर्धा हुने आयोजक बाँके जिल्ला फुटबल संघले जनाएको छ ।

प्रकाशित मिति: आइतबार, असार २, २०८१ २१:२४